الثلاثاء، مايو 01، 2012

تخاريف مجنونة

في حياتنا التخاريف بتاخد مكان واسع جدا .....

يمكن بتاخد أكتر من أي حاجة تانية ، انت أصلا ممكن تكون عايش في تخاريف فاكرها واقع والواقع بتاعك وقت التخاريف ..

وفي تخاريفنا بتعيش الواقع بصورة مخرفة والصورة المخرفة بتاعتنا لازم تبص لكل حاجة بتحصل من حواليك مش بصورة واقعية لكن بصورة مخرفة يمكن توصل للحقيقة ...

ومن النهاردا احب أقولك أهلا وسهلا بيك في ........ عالم التخاريف ....

**********************

لما تحب تخرف يبقى لازم تخرف بجد ، ليه لإن مجتمعنا بيحصل فيه تخاريف حقيقية ، بمعنى أدق ( حلوة أدق دي ) لما نحب نتكلم عن التخاريف اللي بتحصل في حياتنا والبعض يقول إنها واقع يبقى انتخابات رئيس جمهورية مناخوليا اللي احنا فيها دي ........

ما هو من التخاريف لما تلاقي شروط ملوخية لمنصب رئيس جمهورية ويطلبوا منك كمان إنك توافق عليها كإنك بصمجي أو كفتجي !!!

وفيه ناس يقولوا لك شمال أو يمين وما عليك غير إنك تقول آااامين وكلامي مش موجه للأخوان والسلفيين ..

طب بخصوص الشروط دي لما يقولوا منصب الرئيس لازم يكون مصري من أبوين مصريين ، طب المفروض احنا في انتماءاته ولا مقيدين بجنسية أمه على حماته ؟؟

والغريبة إن المرشح دا لم الناس كلها عشان مشكلته دي ، يا عم المرشح عايزين مرشح يحل مشاكل الشعب ، مش الشعب كله يتجمع عشان يحل مشاكله وفي كل مرة تجمع الناس وتسيبها وتخلع وقت الضرب واهو يا ينعيش احنا الكل يا تموتوا لوحدكم ...

المرشح التاني اللي معانا بردو استبعدوه لإن عليه قضايا وجاب لنا مرشح احتياطي ( استبن يعني ) بنفس المشروع ونفس البرنامج اللي هو أصلا بتاع ناس تانيين ، وبردو مطلوب نقول آمين لمجرد إنه احتياطي للمرشح الأولاني ، وكل شوية يجيبوا سيرة أنبياء ومرسلين للمرشحيّن دول هو مفيش بشر عادية ينفع نكلمها عندكم يعني ؟

احنا شعب غلبان محتاج حد يحس بيه مش أنبياء ورُسل وبعدين أنتم لا أنبياء ولا رُسل لإن آخر نبي ورسول كان سيدنا محمد صلى الله عليه وسلم ...

وفيه نقطة بقى في المرشحين دول لإن اللي مش هيختارهم هيدخل النار ، يعني اتحولتم من أنبياء ورُسل لآلهة كمان ؟؟

مرشح معانا كمان قال عن نفسه إن البلد دي محتاجة رئيس جراح ، رئيس قادر وفاجر ، يا عم القادر برنامجك بيقول ايه ؟ برنامجي بيقول هدي البلد لصبح كدا على غيار الريق 6 مليار جنيه اصطباحة ..

احنا قاعدين على القهوة يا عم ، طيب هتنزل بالمشاريب امتى ؟؟ انتم ليه بتستخفوا بعقول الناس ؟

وعندنا مرشحين فلول كتير ، زي عومير سولومون ، يعني يا راجل لما اتعينت نائب مخلوع كان رد الناس عليك في الميدان برفع الجذم كمان عايز تترشح لمنصب رئيس الجمهورية ، وكانت الفضيحة إنك ملحقتش تلم التوكيلات ..

ويخرج مدير حملته يقول إنه لو خرج حق الشهداء هيضيع ، ايه يا عم انت بتهزر عايز تفهمنا إنك كنت في الميدان

والفلولي التاني اللي بيفكرني بأين أشيائي اللي ما بيموتش دا ، كل ما تحصل له حاجة يقول كلمته الشهيرة : ايه ؟ ويكمل حياته عادي ، طب ليه يا عم الشبح دا كله عشان قتلت واتقتلت ؟ يعني تخرج من السباق وترجع في خلال 48 ساعة ليه هرقليز يا وله ..

وكمان انت بتقول إنك لو خرجت الثورة هتضيع تكونش فاكر نفسك من حركة كفاية ؟؟

أما الفلولي الأخير بصراحة تحفة بعد أكتر من 20 سنة خدمة في حضن النظام جاي يقول إنه ضد النظام ولازم كان يقع ، حسسني إنه عبد الوهاب المسيري ولا جورج اسحاق ويمكن يكونش كمال خليل وأنا مش واخد بالي ، فيه ايه يا مرشح مالك ، دا انت كنت في حضن النظام آكل شارب نايم في حضنه ولا هتعملنا انت كمان ثورجي ؟؟

نيجي بقى للمرشحين اللي بينهم وبين بعض منافسة ، المرشح الأول يساري ناصري ، بتاع غلابة يعني ، لكن هيقاس بناصر اللي هو أساسا عسكري ( جملة اعتراضية أساسية تحليلية يسقط يسقط حكم العسكر ) ، عنده برنامج حالم أوي ، لكنه محترم وصاحب نضال ضد النظام السابق لكن لا يمنع إنه هيعيش نفس حلم عبد الناصر ، وإنه بيؤيد أنظمة زي نظام الأسد وكان بيؤيد نظام ديكتاتوري أخر زي صدام حسين ، ومشروعه لو قسناه ملئ بالعيوب ...

المرشح التاني اليساري قالوا إنه بتاع الغلابة حبيب الملايين ومع احترمنا مقدرش يلم أصوات الملايين فراح جاب توقيعات أعضاء مجلس شعب هو أصلا معترض على وجوده ( إن لم تستطع محاربتهم فانضم إليهم يعني ) ، مشروعه مش حالم لإن مفيش مشروع أصلا ، همه كله العمال ، معاك إن للعمال دور مهم لكن فيه برنامجك للسياحة والزراعة والصناعة والتجارة ، هتواجه التخاريف اللي في البلد ازاي ؟ ، برنامجك قايم على إيه قضية وفزت فيها فهتبقى مرشح رئاسي ، ما عندنا مرشح وقف ضد النظام وقاضي مش محامي لكن بدو انتما لا تصلحان ...

المرشح اليساري الأخير وهو من الحرير ، محترم صاحب نضال لكن زيه زي معظم الفكر اليساري يهتم بالعمال والكادحين ، ومع احترامي الشديد لنظرتهم لكن البلد ليست كلها عمال ، ولكن بنظرتكم هذه تصلحون نقباء عمال أو وزراء ولكن ليس رؤساء جمهورية ..

المرشح الأخير الذي جمع كل طوائف الشعب حوله ( عايزه ليبرالي تلاقيه ، يساري يمشي ، أخواني ممكن ، سلفي يجوز ، جهادي معندوش مانع ) برنامجه مليان بالألفاظ القوية والعبارات الخلابة ، حاول يغطي كل الجوانب من تعليم لصحة ، سياحة ، صناعة ، إلخ .. لكن يعيبه حاجتين أولا إنه اخواني والاخواني بيعيش اخواني ويموت اخواني ، يعني هو مش معترض على الاخوان لكن ع المكتب فقط ... ثانيا فيه حيطة خرسانية في مشروعه زيه زيهم وهم العسكر ..

فتفتكروا إن كل المشرحين سواء اللي طلعوا أو ما طلعوش ، ذكروا أو لم يذكروا ، هيقدروا يزحزحوا العسكر من السلطة ؟ ، وياخدوا مكانهم حتى لو العسكر قال خارجين ؟

العسكر أكيد هيعمل معاهم اتفاق وموالسة على الشعب ، أو من الآخر هم ضامنين إنهم مكملين ، لإن فيه حاجة فايتة على الناس في التخاريف دي كلها ...

مفيش دستور واضح نمشي عليه

وكل تخاريف وانتم طيبين ..

I.M.S.A

M.S.M.O

***********

* البوست من فترة مش طويلة ، يمكن الكلام قديم ، لكن حبيت انزله ، عشان هترجع المدونة للكتابة من تاني

هناك 3 تعليقات:

  1. welcome back

    ردحذف
  2. غير معروف :
    شكرا لمتابعتك :)

    ردحذف
  3. معاك حق فى كل كلامك وتحليل منطقى لكل مرشح

    وعلشان نختار صح لازم الاول نتعلم ازاى

    بتقول بيضحكوا علينا ما طبعا ليهم حق

    اللى يلاقى شعب حابب ينضحك عليه وحابب يتوه عقله وميضحكش عليه يبقى ....

    ردحذف

خد راحتك في الجنان معنا حرية الرأي مكفولة للجميع حتي لو هتجنن علينا
نظرا لوجود مشاكل في نظام التعليقات لغير معرفين برجاء عدم التعليق بغير معرف منعا لاختفاء التعليقات