الثلاثاء، مايو 25، 2010

أخـــبــــار في أخـــــبـــــار .....(1)

بعد فترة بُعاد عن التدوينات والبوستات فكرت في البوست دا ، بما إني كنت بعيدا عن عالم الأخبار والحياة وما يحدث فيها إلا أنه حدث يوم ودخلت فيه جريدة وقرأت ما فيها وأوقفتني عدة أخبار زي الفل ودا كان يوم 30 /4 / 2010 م طبعا التاريخ قديم أوي ، لكن اعتقد إن الأخبار ظريفة وخفيفة وممكن تلاقي صدى ..

أول الأخبار دي كان عن إجتماع رئيس وزراء الهند مع رئيس وزراء الباكستان للبحث في حل المشكلات التي بينهما وتذكرت أحداث الحروب بين الباكستان والهند في حروب كشمير وغيرها وعدت وتذكرت ما بعد ذلك فلقد أصبحت الهند دولة ساعية لتكون دولة عظمى وكذلك الباكستان على الرغم من كونهما كانتا دولة واحدة قبل عام 1947 م وتساءلت لماذا لم يحدث هذا معنا نحن مثلا وسوريا أو السودان بعد أن تم الفصل بيننا وبينهم ولكن لا حياة لمن تنادي !!!

ومن الأخبار الظريفة هو كون الحاصلات على جوائز الأوسكار قد تعرضن لحالات طلاق وإنفصال بعد الحصول على جوائز الأوسكار وكانت آخرهن هي ساندرا بوليك وحككت رأسي وتساءلت ألهذا السبب لم تفز أي ممثلة لدينا بجائزة الأوسكار خوفا من الإنفصال عن شريك حياتها ولكن عدت وقلت ما هذا الخرف ؟ ، بالتأكيد لأ ، لكونهن حاصلات على أكبر حوائز في رصيد عدد أخبار الإنفصال والطلاق ..

حسنا إن لم يكن هذا هو السبب لماذا لا تحصل ممثلة من ممثلاتنا على جوائز الأوسكار ؟!!!

ومن الأخبار الرياضية كان فوز الأهلي على المنصورة بثلاثية نظيفة واحتفاظه ببطولة الدوري قبل نهاية الدوري وقلت هذا هو المعتاد فمع إحترامي لكافة الفرق والمنافسين إلا أن الأهلي منذ ستة أعوام يصر على الإحتفاظ بلقب بطل الدوري قبل نهايته لدرجة تجعل الجمهور يفكر بإعطاء البطولة للأهلي قبل بداية الموسم ولكن السؤال الحقيقي هل يعلم أحد شيئا عن باقي بطولات الدوري وأقصد به الدرجة الثانية والثالثة وبقي الرياضات الموجودة داخل البلد ؟ !!

وكان بودي أن اتمم باقي الأخبار ولكن للأسف لم أجد باقي الأخبار لكوننا قمنا بفرش الجريدة لكي نأكل عليها فهذا هو المعهود فحين تحضر البطون تغيب العقول ...

I.M.S.A

M.S.M.O

تـــــحـــــيــة من القـــــــــلـــب ..

بكل الإحترام والتقدير ، بكل ما تحمله الكلمة الطيبة من معنى ، بكل المعاني الإنسانية والقيم والروح السامية أوجه تحية قوية لكل من :

* أصدقائي الذين سألوا عني في الفترة الماضية .

* زوار المدونة الذين سألوا عني في فترة الغياب .

* رفيق الدرب والزمالة والدراسة وشقي الثاني والمجنون رقم 2 الذي أرهق في المدونة في فترة غيابي بحق أخي وصديقي " محمد سيد محمود M. S. M. O"

* تحية خاصة لأصدقائي الذين تعايشت معهم في الفترة الماضية داخل الجيش وعلى رأسهم قوة حفظ السلام ، ومن داخل قوة حفظ السلام أوجه التحية لأصدقائي بداخلها ألا وهم :

" باسم طارق خطاب ، أحمد الشورة ، أحمد ثابت ، محمود مرزوق ، إيهاب صلاح الدين ، أحمد عبد الله ، أحمد عاصم ، وباقي أعضاء قوة حفظ السلام "

اتمنى لهم التوفيق الدائم في حياتهم وادعو الله تعالى أن يعودوا سالمين بإذن الله من دارفور وادعوا لهم بأن يحفظهم الله .

ملحوظة :

أي فرد من القوة لم اكتب اسمه اتمنى أن يغفر لي هذا فليس نسيانا ولكن حتى لا تكون التدوينة كبيرة .

* تحية أخيرة لعدة أشخاص جمعني بهم إيواء واحد ومكان واحد أحب أن اوجه لهم تحية ألا وهم :

" شقي طنطا أحمد أبو يوسف ، ساكن السرير العلوي محمد الهادي ، ساكن السرير المجاور عمرو فهيم ، رجولة قنا سليم محمد سليم ، ابناء أسوان صلاح نصر الدين ومصطفى حسين ، البلبيسي الجدع مصطفى شلبي ، الأجنبي مصطفى أحمد الشهير بجاك ، برج طنطا مصطفى نشأت ، المهندس محمد إبراهيم ، جدو محمد علي ، الروش ياسين تحسين ، ومحمد جنينة وأحمد عامر ، وأحمد عبد الرحمن ، وأحمد سيد ، محمد خليفة ، والزملكاوي محمد نبيل ، وكل من مينا نبيل ومينا ونيس وباقي الشباب والجنود الذين جمعني بهم مكان واحد ..

التحية كل التحية لهم واتمنى أن يوفقهم الله في حياتهم وأن يكونوا في خير حال وصحة وعافية ..

كما اشكركم مرة أخرى على السؤال عني وإرهاقكم في قراءة تلك التدوينة الطويلة .

I.M.S.A

M.S.M.O


الثلاثاء، مايو 04، 2010

كل سنة وإنت ريس يا ريس



كل سنة وأنت طيب يا ريس ، وكل سنة وأنت ريس يا ريس .

أنا أعلم إنك حزين من أعين الناس المدورة التي تحسدك- يا حسرة بتحسدوا الريس علي ايه-

علي منصبك متجاهلين المهام القوية التي تحملها علي عاتقك .

حتي من كثرة الحسد أصبت بالمرض وأنت في عز شبابك

لم تكمل عامك الثلاثين بعد في حكم البلاد

فعمر الإنسان الحقيقي يبدأ من لحظاته السعيدة فما بالك بسيادة الرئيس؟

وأعلم إنك حزين من جوجل لعدم وضعه صورتك يوم عيد ميلادك

ووضعه لصورة أم كلثوم ماذا فعلت أم كلثوم لهذه البلد

مقارنة بما قدمته أنت يا سيادة الرئيس؟

وأعلم إنك حزين أيضا من تلك القلة المنحرفة المندسة بين الجماهير العريضة

والتي تسعي إلي نشر الفساد والخراب في تلك البلاد .

هذه الفئة الشريرة التي تتدعي أن 180 جنيه في الشهر لا تكفي لحياة كريمة

واتفرج يا سيادة الرئيس علي الطلبات بتاعتهم هتحس إنهم مش هيستريحوا غير لما ينهبوا البلد في جيوبهم

الجماعات دي مش بتستريح غير لما ينظموا وقفات احتجاجية ومظاهرات ومسيرات

كل ده علشان يعملوا شو إعلامي ياريس عايزين يتصوروا ويطلعوا في التليفزيون

بس ربنا كشفهم علي حقيقتهم وفضحهم شوفوا بيتخانقوا إزاي ناس معندها دم صحيح

لأ وكمان بيطالبوا إن الناس تستمتع بالمظاهرات والاعتصامات

شوفت الريس الدعوة للفساد وصلت لحد فين

قال اعتصام قال بسبب تلك القلة التي لا تتجاوز عشرات الملايين من الشعب

جعلوا دولة مثل إسرائيل ترسل نصائح لك من أن نصبح إيران آخري

بس حضرتك السبب بعتلهم تهنئة بمناسبة الاستقلال

- هو مين استقل عن مين وكان سنة كام حد عارف حاجة -

فافتكروا إن ده كده كارت أخضر علشان يرسلوا لنا نصائح في سياسة الدولة

إسرائيل دي تيجي ايه جنب حضارة السبعتلاف سنة ده أحنا الفراعنة يا ريس .

بس ارجع واقول اللي شجع هذه القلة علي الثورة هو قلبك الطيب

ياأبو قلب أبيض زي اللبن الحليب

يكفي دليل علي طيبتك هو ما اعترفت به الجماعة المحظورة

بأنك أب لكل المصريين بل لا يجدوا مانع في أن يرشحوا

ابن فخامتك للرئاسة إذا كان برنامجه الانتخابي جيد

ولكن لا تقلق سيادة الرئيس فمازالت مصر بخير وأبناءها سيدافعون عنك

وعن عائلتك ويهاجمون أي فرد قد تسول له نفسه الطعن في حكمك ونزاهتك

في فترة تجاوزت الربع قرن لم نجد فيها سوي كل خير ورخاء.

وما قام به المطرب محمد حماقي لمواجهة تلك الجماعة المنحرفة المسماة 6 إبريل

واعترافه بالسعادة الغامرة لمنعه المظاهرات وتمنيه إن كان يستطيع

أن يغني لك بمناسبة الشفاء لكن الظروف لم تساعده هو خير دليل علي إن مصر لسه بخير .

بس عارف يا ريس أكتر حاجة زعلت بسببها

اعتداء تلك الجماعات علي إخوانهم من رجال الأمن

أنا عارف يا ريس إنك شخص مرهف الحس بس استحمل ذلك المنظر

الذي اعتدي فيه بهاء صابر علي قوات الأمن وأفسد حركة المرور في الشارع

لأ وكمان عاملين ألبوم صور تحت اسم موسوعة الجلادين

مع إنهم هم الجلادين المفتريين اللي اعتدوا علي الأمن والصور خير دليل علي صحة كلامي

هل شاهدت يا سيدي الرئيس افتراء وكذب أكثر من هذا ؟

المصيبة أنه يدعي أن الأمن هو من اعتدي عليه

حسبي الله ونعم الوكيل هتروحوا من ربنا فين يا كدابين

و زعلت كمان يا ريس من الهتافات اللي كانت بتتقال

شوف ياريس بيقولوا ايه

وحرفوا الأغاني الوطنية زي نشيد بلادي بلادي شوفت عدم الوطنية وصل لحد فين يا ريس

قعدوا يغنوا ويقولوا بلاد بلادي مش لاقي قوت عيالي

ويقولوا مصر ابنك علي الرصيف مش معاه تمن الرغيف

وقالوا كمان الله حى الله حى سرقوا بلدنا وهربوا ياخى

مع إنك يا ريس لسه قاعد معانا لم تهرب بعد خارج البلاد

لأ وكمان مش عجبهم لبس الخيش

وبيقولوا مش كفاية لبسنا خيش عايزين يأخدوا رغيف العيش

لأ وكمان عملوا أغنية وسموها أغنية عمال مصر حتي اسمعها كده

شوفت يا ريس الافترا مش عاجباهم العيش بالتقسيط عايزين يشتروا بالفيزا

عايزين يخلوا كل الناس تاخد فيزا قلة أدب ووقاحة منهم

وشوفت الحقد بتاعهم وصل لحد فين حاقدين علي عمي نظيف العريس الجديد

اللي تعب وشقي عقبال ما عرف يجيب شقة قانون جديد

مش قادرين يقدروا قيمة الكفاح والعمل علشان يكون نفسه فيهم

ويكون قد المسئولية ويتجوز ويفتح بيت

عالم قلوبها سودا من جوه ونفوسهم مليانة حقد

وغل علي الناس الشريفة البريئة المكافحة .


والله ياريس الشعب ده شعب ظالم وجاحد ده

مع إن كل الناس اعترفت بمعاملة الداخلية الحنينة المليئة بالإنسانية

ده حتي حبوا يروقوا الجو ونزلوا لهم شوية حريم علشان تطري المظاهرة

بس نقول ايه بقي في ناس معندهاش دم

والله الداخلية تعبت مع المفسدين في الأرض دول

نسوان ونزلتلكم نسوان

الدنيا حر جابت أحسن خراطيم مياه في الدنيا ورشت عليكم علشان الحر اللي تاعبكم

قولوا عايزين ايه؟ ايه اللي مش عاجبكم ؟

أحب أقول لكل واحد معتصم أو متظاهر عيب كده عليك يا أستاذ

إنك تضيع وقت الشرطة الثمين ده الحكومة وراها خصخصة بلد

وسرطنة مزروعات وبيع غاز لإسرائيل هي فاضية للكلام الفاضي ده .

بس عارف يا ريس من كتر تساهلكم مع الحكومة ولين بتاعكم

يخرج علينا نواب يعاتبون عليكم كيف لم تستخدموا القوة مع هؤلاء القلة المندسة.

حيث يقول النائب نشأت القصاص

-مش ده نائب الجزمة يا إخوانا برضه ولا أنا غلطان-

"لو كان الأمر بيدي لاستجوبت وزير الداخلية بسبب لينه الشديد

في التعامل مع هؤلاء الخارجين على القانون"

وليس هو الوحيد الذي رأي إن الداخلية تعامل الناس بحنية بل طالب نواب آخرون

أن لا تستخدم الداخلية خراطيم المياه وتستخدم القوة

وضرب النار مباشرة علي هؤلاء الخارجين عن القانون

مدعين أن القانون يكفل ذلك الحق .

بس ياريس شوف وقاحتهم بعد ما أصدر هؤلاء النواب

-والأحق هم من نوائب الدهر -

تلك التصريحات أخرجت هتافات جديدة تطالب بضرب هؤلاء النواب الأبرياء

الذين يمثلون الشعوب مدافعين عن حقوقه ومطالبين لها بأن يتم ضربهم بالرصاص

تحت شعار رصاصة من أجلك أنت

ناس معندهاش دم هم مش عارفين إن الشعب هو اللي بيدفع ثمن الرصاص
والنبي ياريس عمو بطرس غالي ميفرضش ضربية اسمها
هات ثمن الرصاصة اللي هتضرب بيها إحنا لسه تحت صدمة الضربية العقارية
يعني ولو لازم يبقي يوقفوا كوردون أمني عند المظاهرة اللي يدخل يدفع ضربية تظاهر واعتصام
وفوقيها ضريبة الرصاصة حية مش مطاطي
-وطاطي طاطي ده الرصاص حي مش مطاطي -
وعلى رأى اللواء المرحوم زكى بدر وزير الداخلية الأسبق
( ما فيهاش حاجة لو مات ربع الشعب ليعيش الثلاثة أرباع الباقين)
وأنا بقول مفيهاش حاجة لو مات الشعب كله بس الريس يعيش
وميزعلش لحسن ده الريس غالي علينا قوي .

يا ريس إنت عملت إنجازات لا تقارن في اي عصر سابق أو قادم
-تبقي مصيبة سودا لو حصل كده في المستقبل -
جمال عبد الناصر عمل ايه ؟ خرج الانجليز من مصر
ايه يعني كانوا هيخرجوا هيخرجوا
السادات عمل ايه ؟ خرج إسرائيل من سينا
ايه يعني ما هم رجعوا تاني
حضرتك عملت اللي فشل فيه كل القوات الأجنية
وكل استعمار واحتلال عدي علي مصر
إنت نجحت إنك تطرد المصريين من مصر .
يا ريس إنت ضحيت و أخدت كل حاجة مننا علشان تديننا الديمقراطية
- هي بنت الكلب دي سبب اللي إحنا فيه -
والله إحنا شعب جاحد وناكر للجميل.

بس أنا عايز اطمنك يا ريس إن الناس اللي بتعمل المطاهرات
والكلام الفاضي ده أكيد مش مصريين ولا عايشين
تحت مظلة حكمك العادل الذي يشمل ربوع الجمهورية كلها
أنا حاسس إنهم خطفوا الشعب وحطوا الناس دي بدالهم
علشان يعملوا كده أنا كل اللي خايف منه إنهم ينجحوا في
خطف 80 مليون مصري ساعتها هتبقي الأزمة
- يارب أعيش لغاية لما أشوف ثورة 80 مليون -
ياريس الشعب بيحبك اسمع ياريس صوت مصر الحقيقي وهو بيغني ليك
-طول عمرنا بنغني-
يا ريس هو ده شعب مصر هو ده صوت مصر وشوف أهل مصر الحقيقيين
في عز الوقفة احتفلوا بعيد ميلاد فخامتك


- والله منظرهم زي العسل بالطراطير طراطير طراطير-

بص يا ريس فاضل كلمتين يمكن هما اخر كلمتين
مهما حصل مصر هتفضل غالية علي

بس سؤال آخير هو أنت ناوي تنزل الانتخابات الجاية ولا لأ يا ريس؟

علشان أنا هزعل أوي لو منزلتش

وكل سنة وإنت ريس يا ريس



M.S.M.O

I.M.S.A




الاثنين، مايو 03، 2010

مجانين رجعت من جديد في ثوب جديد وخطير

أحب أشكر كل شخص سأل عني وعن إسلام في الفترة الماضية
وبالنسبة لإسلام فهو هيرجع بالسلامة السبت القادم الموافق 15/5
أول مرة أعرف إن 45 يوم في الجيش بقوا 3 أسابيع

وأنا كنت وعدت إسلام بإني هأخرب المدونة ولأن وعد المجنون دين عليه
فأنا غيرت قالب المدونة في السريع والقالب ده مؤقت
قبال ما أخلص تصميم القالب اللي في دماغي كمان 3 -4 سنين كده مش كتير

لزيادة التواصل بين المدونة والقراء المتفاعلين معانا أو العابرين في سريع
وكخطوة في نشر الجنان في جميع انحاء العالم الإفتراضي
عملت صفحة للمدونة علي فيسبوك لمن يريد ان يتجنن معنا هناك
- هم اللي عندهم صفحات معجبين أحسن مننا في ايه أو أجن مننا-
ووضعت حسابي علي العصفورة الزرقا المجنونة دي والله شكلك زي العسل
ولو في حد نفسه يسأل سؤال أوحابب يرخم علي فأنا حطيت حسابي

ولإضفاء قليل من المرح علي التعليقات وضعت ابتسامات
بدلا ما تكتب كده :) هتلاقيها منورة كده أو كده أو كده
- الحركة دي حصريا علي كلام مجانين وبس -

تم وضع عدد من الصفحات المستقلة
التي تعبر عن رأيي المتواضع وهذا وصف سريع لها
بداية الجنان تعود بك إلي الصفحة الرئيسة للمدونة
مين وليه وامتي وازاي ؟ تعريف بسيط بنا وعن المدونة
المجانين بيقروا وإحنا معاهم أسماء بعض الكتب التي تمثل البنية الثقافية للمجانين
سينما مجانين أعرض بها أسماء بعض الأفلام التي أعجبتني طبعا إسلام مش هيكتب فيها فيلم واحد
علشان مقتلوش علشان هو بيتفرج علي أفلام هندية
طبعا مش هحط اسم فيلم مدته 3 ساعات منهم 4 ساعات رقص وغنا
وإن كان لا يمنع وجود بعض الأفلام الجيدة بها
عدسة مجانين هي بعض الصور التي أعجبتني وأحببت أن أشارككم بها
الناس دي بتقول كلام زي الفل هي أسماء بعض المدونات التي أعجبتني وأعتذر
إذا سقط مني بعض أسماء أصدقاء المدونة في الوقت الحالي
هذه الصفحات تحت التحديث المستمر

سأدع لكم استكشاف جديد المدونة ومازال هناك بعض التحديثات القادمة لكن بعد
ان استعيد سرعة النت الطبيعية نظرا إني واحد ممن يطبق عليهم قانون الاستخدام الغير عادل

-الأسطر الأخيرة أكتبها وأنا شبه نائم-
وأعتذر عن إغلاق المدونة الأيام السابقة لكن هذا للتجديد والتطوير
أو بمعني آخر بخربها قبل ما إسلام يرجع
وإذا أغلقت مستقبلا فاعلموا إني قاعد أخربها جوه

مع كلام مجانين مش هتقدر تغمض عينيك

M.S.M.O

I.M.S.A