الثلاثاء، مايو 04، 2010

كل سنة وإنت ريس يا ريس



كل سنة وأنت طيب يا ريس ، وكل سنة وأنت ريس يا ريس .

أنا أعلم إنك حزين من أعين الناس المدورة التي تحسدك- يا حسرة بتحسدوا الريس علي ايه-

علي منصبك متجاهلين المهام القوية التي تحملها علي عاتقك .

حتي من كثرة الحسد أصبت بالمرض وأنت في عز شبابك

لم تكمل عامك الثلاثين بعد في حكم البلاد

فعمر الإنسان الحقيقي يبدأ من لحظاته السعيدة فما بالك بسيادة الرئيس؟

وأعلم إنك حزين من جوجل لعدم وضعه صورتك يوم عيد ميلادك

ووضعه لصورة أم كلثوم ماذا فعلت أم كلثوم لهذه البلد

مقارنة بما قدمته أنت يا سيادة الرئيس؟

وأعلم إنك حزين أيضا من تلك القلة المنحرفة المندسة بين الجماهير العريضة

والتي تسعي إلي نشر الفساد والخراب في تلك البلاد .

هذه الفئة الشريرة التي تتدعي أن 180 جنيه في الشهر لا تكفي لحياة كريمة

واتفرج يا سيادة الرئيس علي الطلبات بتاعتهم هتحس إنهم مش هيستريحوا غير لما ينهبوا البلد في جيوبهم

الجماعات دي مش بتستريح غير لما ينظموا وقفات احتجاجية ومظاهرات ومسيرات

كل ده علشان يعملوا شو إعلامي ياريس عايزين يتصوروا ويطلعوا في التليفزيون

بس ربنا كشفهم علي حقيقتهم وفضحهم شوفوا بيتخانقوا إزاي ناس معندها دم صحيح

لأ وكمان بيطالبوا إن الناس تستمتع بالمظاهرات والاعتصامات

شوفت الريس الدعوة للفساد وصلت لحد فين

قال اعتصام قال بسبب تلك القلة التي لا تتجاوز عشرات الملايين من الشعب

جعلوا دولة مثل إسرائيل ترسل نصائح لك من أن نصبح إيران آخري

بس حضرتك السبب بعتلهم تهنئة بمناسبة الاستقلال

- هو مين استقل عن مين وكان سنة كام حد عارف حاجة -

فافتكروا إن ده كده كارت أخضر علشان يرسلوا لنا نصائح في سياسة الدولة

إسرائيل دي تيجي ايه جنب حضارة السبعتلاف سنة ده أحنا الفراعنة يا ريس .

بس ارجع واقول اللي شجع هذه القلة علي الثورة هو قلبك الطيب

ياأبو قلب أبيض زي اللبن الحليب

يكفي دليل علي طيبتك هو ما اعترفت به الجماعة المحظورة

بأنك أب لكل المصريين بل لا يجدوا مانع في أن يرشحوا

ابن فخامتك للرئاسة إذا كان برنامجه الانتخابي جيد

ولكن لا تقلق سيادة الرئيس فمازالت مصر بخير وأبناءها سيدافعون عنك

وعن عائلتك ويهاجمون أي فرد قد تسول له نفسه الطعن في حكمك ونزاهتك

في فترة تجاوزت الربع قرن لم نجد فيها سوي كل خير ورخاء.

وما قام به المطرب محمد حماقي لمواجهة تلك الجماعة المنحرفة المسماة 6 إبريل

واعترافه بالسعادة الغامرة لمنعه المظاهرات وتمنيه إن كان يستطيع

أن يغني لك بمناسبة الشفاء لكن الظروف لم تساعده هو خير دليل علي إن مصر لسه بخير .

بس عارف يا ريس أكتر حاجة زعلت بسببها

اعتداء تلك الجماعات علي إخوانهم من رجال الأمن

أنا عارف يا ريس إنك شخص مرهف الحس بس استحمل ذلك المنظر

الذي اعتدي فيه بهاء صابر علي قوات الأمن وأفسد حركة المرور في الشارع

لأ وكمان عاملين ألبوم صور تحت اسم موسوعة الجلادين

مع إنهم هم الجلادين المفتريين اللي اعتدوا علي الأمن والصور خير دليل علي صحة كلامي

هل شاهدت يا سيدي الرئيس افتراء وكذب أكثر من هذا ؟

المصيبة أنه يدعي أن الأمن هو من اعتدي عليه

حسبي الله ونعم الوكيل هتروحوا من ربنا فين يا كدابين

و زعلت كمان يا ريس من الهتافات اللي كانت بتتقال

شوف ياريس بيقولوا ايه

وحرفوا الأغاني الوطنية زي نشيد بلادي بلادي شوفت عدم الوطنية وصل لحد فين يا ريس

قعدوا يغنوا ويقولوا بلاد بلادي مش لاقي قوت عيالي

ويقولوا مصر ابنك علي الرصيف مش معاه تمن الرغيف

وقالوا كمان الله حى الله حى سرقوا بلدنا وهربوا ياخى

مع إنك يا ريس لسه قاعد معانا لم تهرب بعد خارج البلاد

لأ وكمان مش عجبهم لبس الخيش

وبيقولوا مش كفاية لبسنا خيش عايزين يأخدوا رغيف العيش

لأ وكمان عملوا أغنية وسموها أغنية عمال مصر حتي اسمعها كده

شوفت يا ريس الافترا مش عاجباهم العيش بالتقسيط عايزين يشتروا بالفيزا

عايزين يخلوا كل الناس تاخد فيزا قلة أدب ووقاحة منهم

وشوفت الحقد بتاعهم وصل لحد فين حاقدين علي عمي نظيف العريس الجديد

اللي تعب وشقي عقبال ما عرف يجيب شقة قانون جديد

مش قادرين يقدروا قيمة الكفاح والعمل علشان يكون نفسه فيهم

ويكون قد المسئولية ويتجوز ويفتح بيت

عالم قلوبها سودا من جوه ونفوسهم مليانة حقد

وغل علي الناس الشريفة البريئة المكافحة .


والله ياريس الشعب ده شعب ظالم وجاحد ده

مع إن كل الناس اعترفت بمعاملة الداخلية الحنينة المليئة بالإنسانية

ده حتي حبوا يروقوا الجو ونزلوا لهم شوية حريم علشان تطري المظاهرة

بس نقول ايه بقي في ناس معندهاش دم

والله الداخلية تعبت مع المفسدين في الأرض دول

نسوان ونزلتلكم نسوان

الدنيا حر جابت أحسن خراطيم مياه في الدنيا ورشت عليكم علشان الحر اللي تاعبكم

قولوا عايزين ايه؟ ايه اللي مش عاجبكم ؟

أحب أقول لكل واحد معتصم أو متظاهر عيب كده عليك يا أستاذ

إنك تضيع وقت الشرطة الثمين ده الحكومة وراها خصخصة بلد

وسرطنة مزروعات وبيع غاز لإسرائيل هي فاضية للكلام الفاضي ده .

بس عارف يا ريس من كتر تساهلكم مع الحكومة ولين بتاعكم

يخرج علينا نواب يعاتبون عليكم كيف لم تستخدموا القوة مع هؤلاء القلة المندسة.

حيث يقول النائب نشأت القصاص

-مش ده نائب الجزمة يا إخوانا برضه ولا أنا غلطان-

"لو كان الأمر بيدي لاستجوبت وزير الداخلية بسبب لينه الشديد

في التعامل مع هؤلاء الخارجين على القانون"

وليس هو الوحيد الذي رأي إن الداخلية تعامل الناس بحنية بل طالب نواب آخرون

أن لا تستخدم الداخلية خراطيم المياه وتستخدم القوة

وضرب النار مباشرة علي هؤلاء الخارجين عن القانون

مدعين أن القانون يكفل ذلك الحق .

بس ياريس شوف وقاحتهم بعد ما أصدر هؤلاء النواب

-والأحق هم من نوائب الدهر -

تلك التصريحات أخرجت هتافات جديدة تطالب بضرب هؤلاء النواب الأبرياء

الذين يمثلون الشعوب مدافعين عن حقوقه ومطالبين لها بأن يتم ضربهم بالرصاص

تحت شعار رصاصة من أجلك أنت

ناس معندهاش دم هم مش عارفين إن الشعب هو اللي بيدفع ثمن الرصاص
والنبي ياريس عمو بطرس غالي ميفرضش ضربية اسمها
هات ثمن الرصاصة اللي هتضرب بيها إحنا لسه تحت صدمة الضربية العقارية
يعني ولو لازم يبقي يوقفوا كوردون أمني عند المظاهرة اللي يدخل يدفع ضربية تظاهر واعتصام
وفوقيها ضريبة الرصاصة حية مش مطاطي
-وطاطي طاطي ده الرصاص حي مش مطاطي -
وعلى رأى اللواء المرحوم زكى بدر وزير الداخلية الأسبق
( ما فيهاش حاجة لو مات ربع الشعب ليعيش الثلاثة أرباع الباقين)
وأنا بقول مفيهاش حاجة لو مات الشعب كله بس الريس يعيش
وميزعلش لحسن ده الريس غالي علينا قوي .

يا ريس إنت عملت إنجازات لا تقارن في اي عصر سابق أو قادم
-تبقي مصيبة سودا لو حصل كده في المستقبل -
جمال عبد الناصر عمل ايه ؟ خرج الانجليز من مصر
ايه يعني كانوا هيخرجوا هيخرجوا
السادات عمل ايه ؟ خرج إسرائيل من سينا
ايه يعني ما هم رجعوا تاني
حضرتك عملت اللي فشل فيه كل القوات الأجنية
وكل استعمار واحتلال عدي علي مصر
إنت نجحت إنك تطرد المصريين من مصر .
يا ريس إنت ضحيت و أخدت كل حاجة مننا علشان تديننا الديمقراطية
- هي بنت الكلب دي سبب اللي إحنا فيه -
والله إحنا شعب جاحد وناكر للجميل.

بس أنا عايز اطمنك يا ريس إن الناس اللي بتعمل المطاهرات
والكلام الفاضي ده أكيد مش مصريين ولا عايشين
تحت مظلة حكمك العادل الذي يشمل ربوع الجمهورية كلها
أنا حاسس إنهم خطفوا الشعب وحطوا الناس دي بدالهم
علشان يعملوا كده أنا كل اللي خايف منه إنهم ينجحوا في
خطف 80 مليون مصري ساعتها هتبقي الأزمة
- يارب أعيش لغاية لما أشوف ثورة 80 مليون -
ياريس الشعب بيحبك اسمع ياريس صوت مصر الحقيقي وهو بيغني ليك
-طول عمرنا بنغني-
يا ريس هو ده شعب مصر هو ده صوت مصر وشوف أهل مصر الحقيقيين
في عز الوقفة احتفلوا بعيد ميلاد فخامتك


- والله منظرهم زي العسل بالطراطير طراطير طراطير-

بص يا ريس فاضل كلمتين يمكن هما اخر كلمتين
مهما حصل مصر هتفضل غالية علي

بس سؤال آخير هو أنت ناوي تنزل الانتخابات الجاية ولا لأ يا ريس؟

علشان أنا هزعل أوي لو منزلتش

وكل سنة وإنت ريس يا ريس



M.S.M.O

I.M.S.A




هناك 19 تعليقًا:

  1. واضح ان فترة الغياب او جايز الامتحانات
    شوشت على افكارك ياباش مهندس
    او يمكن اسلام وحشك
    على العموم انا بس بقول كده عشان السؤال الاخير
    ده سؤال ياراجل
    طبعا الريس نازل الانتخابات
    امال احنا هننتخب مين ان شاء الله







    والشكل الجديد عاجبنى جدا
    ويارب دايما للاحسن

    ردحذف
  2. هو ممكن بس توضح ازاي في شوشرة علي أفكاري؟ :-/ :-/ :-/

    ردحذف
  3. اصلك بتسال الريس نازل ولا لا
    ده سؤال ياراجل

    ردحذف
  4. =))=))=))=))
    كنت بس عايز أتاكد ممكن عمو جيمي ينزل مكانه

    ردحذف
  5. الغالى ابن الغالى وماله
    يعنى احنا لاقيين حد غيره ياسى هاوس
    وبجد بحييك على اختيارك للشخصيه
    فعلا الشبه واضح جدا

    ردحذف
  6. في كتير دلوقتي دي أي حد مش لاقي حاجة يعملها بيفكر يرشح نفسه ده أنا حتي بفكر أرشح نفسي بس المشكلة إني تحت السن فهطالب بتعديل دستوري علشان أقدر أرشح نفسي يعني البرادعي أحسن مني في ايه :D:D
    http://www.sharekeg.com/index.php
    وهاوس ده حبيب قلبي :X:X
    علي فكرة أنا بحب أصدق كل واحد بيقولي الموضوع ده 

    ردحذف
  7. بناء على المعلومات الى عندى
    الشبه كبير
    وربنا يهنيك بيه ويديم حبك
    اما بالنسبه لموضوعك
    فانا بساندك فتعديل السن فالدستور
    ومش هتبقى اول مرة
    سوريا عملت كده
    عشان بشار
    واهو نبقى سةاسيه
    ومحدش احسن من حد


    وامتى اسلام هيرجع بالظبط
    عشان يتلم شمل العيله

    ردحذف
  8. هو علي حسب ما كلمني المفروض السبت اللي هو بكره

    ردحذف
  9. واضح انه حيرجع اجازة الجيش عشان يدخل المعتقل :) انت عارف مناخ الحرية و الديموقراطية التدوينية والشفافية اللى احنا بنتمتع به :)
    البوست كحال اى بوست بيتكلم عن واقعنا المر جدا مؤلم ومحظن ومخزى ان تاريخنا الحديث يبقى كدة ، ان شاء الله كل الخونة عبيد الكرسى على المقصلة ومحكمة الشعب قريب ان شاء لله .

    ردحذف
  10. خليه يدخل المعتقل :D أصل أنا بحب إسلام أوي
    إنتي هتقوللي علي مناخ الديمقراطية بالملوخية ده أنا بشوفه في كل حتة في الشارع تاريخنا الحديث هيبتدي يتكتب بحروف من نور ضد الظلم والاستغلال نحن نتتظر ثورة 80 مليون مصري وجميع الخونة يذهبون إلي مزبلة التاريخ
    ولتسطع شمس الحرية والكرامة علي مصر من جديد

    ردحذف
  11. المشكلة يا محمد أنه معاه اثبات قوى أنه مش هو اللى كتب(كنت فى الجيش والله.. هو صاحبى ده.خدوه انا مش عايزه)

    بجد تسلم يدك مقال ولا اروع
    و عجبتنى جدا جملتك بتاع
    "نجحت نطرد المصريين من مصر"
    بس هو بيبص لها على انها تحرير
    يعنى هو حرر مصر من المصريين
    أصلهم كانوا قاعدين على قلبها و دمهم ثقيل و سمر كده و شعر مجعد
    لأ لأ ...هى الخطة الخمسينية أستيراد شعب(ماأحنا بنستورد كل حاجة جت على دى) شعب كده منور و مستحمى و ابيض و بعيون خضراء
    حاجة كده تكيد الأأعادى
    عرفت بأه ايه الخطة
    علشانظلموش الراجل
    و كل سنة و انت طيب
    و لو أتمسكتوا انا مأعرفكوش على فكرة

    ردحذف
  12. دي مش مشكلة خالص
    أسهل حاجة أغير تاريخ البوست وادخل بأكونت إسلام وأخليه يبقي هو اللي كتب :D ويبقي يقول جيش من هنا لبكره

    أنا أؤيد بشدة حكاية الشعب المستورد وخاصة لو كله من الجنس الناعم :X هتلاقي الشعب المصري ده بقي حاجة تانية

    أنا من ساعة ما نزلت البوست ده الجملة دي بتقال لي كتير لدرجة إني أنا كمان معرفش نفسي لو اتمسكت:)

    ردحذف
  13. يعنى الغلبان يرجع من الجيش يلاقى المعتقل مستنيه !!!!
    طب خليه فى الجيش أرحم بأه.

    و عايز الشعب المصرى كله جنس ناعم
    ده الجيش عندنا على ما أسمع أصبح دلع جدا
    عايزه يبقى أيه كمان؟؟

    و ده الطبيعى مع أى بوست من النوع ده
    بس برده لسه مأعرفكوش

    ردحذف
  14. ما هو لما عرف البوست اللي نزلت قالي أنا هنا أحسن
    مش شرط كله جنس ناعم كفاية 99,9 % بس
    البوستات جاية كتير متعرفيناش البوست ده تعرفينا البوست اللي بعده

    ردحذف
  15. اتحسد ياعينى

    ردحذف
  16. بصراحة يا محمد كنت ناوي ابلغ عنك
    لكن قلت اهو برضو صاحبي وحبيبي وعشرة عمر
    بوست جامد
    والاجازة اخدتها p:
    وهتخلص بسرعة )):
    وشكرا على شكل المدونة الجديد اللي زي الفل
    تسلم ايدك

    ردحذف
  17. I love what you guys are usually up too. Such clever work аnd coverage!
    Kеep up the аwesome wοrκѕ guуs I've incorporated you guys to my blogroll.

    My webpage :: payday loans

    ردحذف
  18. Exсellent blog уou hаve heгe but
    I was wοnԁering if you knew of anу user ԁiscuѕѕion forums thаt cover the same
    toρics discussed іn thіѕ artіcle?

    I'd really love to be a part of community where I can get feedback from other experienced individuals that share the same interest. If you have any suggestions, please let me know. Appreciate it!

    Look at my blog - payday loans

    ردحذف

خد راحتك في الجنان معنا حرية الرأي مكفولة للجميع حتي لو هتجنن علينا
نظرا لوجود مشاكل في نظام التعليقات لغير معرفين برجاء عدم التعليق بغير معرف منعا لاختفاء التعليقات