أخـــبــــار في أخـــــبـــــار .....(2)

بما إني أصبحت من محبي التعليق على الأخبار التي تخرج لنا كل يوم ، كنت بطالع جريدة المصري اليوم وطبعا دا معروف إنه يوم الجمعة الموافق 4 / 6 / 2010 م طبعا لإنه يوم الزيارة ...

المهم أول الأخبار كانت عن البابا شنودة ورده الغير قابل للنقاش على الجهات المدنية بخصوص الزوجة الثانية – الراجل دا ما بيهزرش في الدين – وإنه لا يوافق على تدخلهم في الديانة المسيحية وقوانين الكنيسة ، فدعني أحييك أيها البابا فعلى الرغم من إختلاف ديانة كل منا إلا إن إصرارك على عدم التبديل والتغيير في عقيدتك يجعلني أقف لك إحتراما لتمسكك بمبادئ وتعاليم المسيحية واتساءل هل نتمسك كلنا بمبادئ أدياننا – أيا كان الدين – ولا نبدله ولا نغيره ولا نقتل ضمائرنا من أجل أمور أخرى ؟؟؟

وخبر ثاني كان عن الدكتور حسن نافعة وإنه استقال عن الجمعية الوطنية للتغيير ، وقلت إيه يا دكتور كدا كل حلفاء دكتور البرادعي بينسحبوا واحد ورا التاني ، طيب فين المبادئ اللي رسمتوها لأنفسكم ، انتم كدا بتحسسونا إنكم مش هتقدروا تكملوا المسيرة ، لما كل فرد من أصحاب الثقل يترك أمر سار فيه منذ البداية ومبدأ أرساه للناس والمتابعين يكون رد فعل الباقي إيه ؟ يا ترى حد فاهم قصدي ؟

بينما من الأخبار المفرحة والمحزنة في نفس الوقت هو فوز الحزب الوطني في إنتخابات مجلس الشورى بنسبة 96,5 % فرحت بتلك النسبة العالية التي تذكرك بنتائج الثانوية العامة ولكني حزنت حزنا شديدا لكون الحزب لم يحصل على مجموع كلية الطب في مكتب النتسيق ، أصل دي بجد نتيجة ثانوية عامة مش إنتخابات وقلت النتيجة دي على أساس إن الناس كانت بتنتخب ولا كانت بتجاوب على أسئلة الإمتحانات ؟؟

وخبرين كدا على السريع الأول بخصوص أسطول الحرية وكأن أولاد العم ما بيتخلوش عن الضرب من تحت الحزام والخسة والندالة اللي في دمهم لكن عجبني رد فعل تركيا بسحب السفير وحث دول العالم على التكتل والتنكيل بإسرائيل والسعي الدائم وأثبتوا تحركهم على عكسنا نايمين في العسل من 30 عاما – مش عارف هنصحى امتى – بينما الخبر الثاني كان عن ضغط إسرائيل على سفينة مؤن إيرلندية ، يا نهار ألوان الناس دي وصلوا لدرجة إن محدش بيهمهم ، الكل عارف إن ماما أمريكا لسة معاهم لكن البجاحة والوقاحة مش للدرجة دي ، وبما إن ماما أمريكا لسة معاهم فالله يرحم زيارتك المقدسة يا أوباما ...

وخبر تطويري على السخان وهو تطوير وسط القاهرة ، وقلت ياااااه أخيرا وسط البلد حد اهتم بنتسيقه وتطويره وتنضيفه بعد البلاوي اللي الواحد بيشوفها لكن الصدمة لقيت إن الأمر في خلال 10 لـ15 سنة ، ههههه يديني ويديكم طولة العمر ويا رب ما يحضر مسئول جديد ويلغي التطوير دا ويقول إنه ما ينفعش ولغينا الفكرة ، ما إحنا ناس كل يوم بقرار !!!!

ونجري على الرياضة كان إحالة ملف المخالفت المالية في إتحاد الكرة إلى النيابة العامة وقلت بما إن فيه تجاوزات بالدرجة دي وسرقة في المال العام وإستغلال نفوذ وتجاوزات وتواطؤ فمعلش يا باش مهندز – ولا اكتبها مهندس – حسن صقر كنتم نايميين الفترة دي كلها ليه ؟ وعشان إيه ؟ ويا ترى هيتم إتخاذ أي إجراءات حاسمة ولا حللي عقبال ما حد يتحرك ؟

والأخبار الغريبة بجد وجود فتيات وفتيان يتحدثوا عن الحجاب واللبس ولازم يكون الحجاب إزاي ونوفر ملابس إزاي ، وناس تقلع الحجاب وناس تلبسه ، طيب يا جماعة حد يفهم الحجاب أولا وبعدين نتكلم عنه وبلاش كلام فض المجالس دا لإن الحجاب مش حتة القماش اللي بتغطي الرأس فقط ، وبلاش تشدد وتساهل في الكلام وكفاية نتكلم عن حاجة إحنا مش عارفين الصح من الغلط فيها ....

وآخر خبر عشان ما تزهقوش كانت كلمة رشيد محمد رشيد وزير التجارة بأنه لا يوجد رجل أعمال في مصر على رأسه ريشة وتحقيقات الإحتكار نزيهة طيب أنا مش هعلق نهائي أنا بس عايز أي حد يشرح ويفهمني ويوضح مواقف ناس معينة كانت محتكرة الحديد مثلا والأسمنت وخلافه ...

I.M.S.A

M.S.M.O

Share |