الأحد، فبراير 13، 2011

مندهش....!

مندهش ....!
هذا حال الكثيرين منا خاصة بعد خبر تنحي الرئيس وإسقاط النظام السابق ،البعض مازال لا يصدق بأنه رحل وإن كنت قد قلتها مسبقا أن من في التحرير لن يرحلوا إلا برحيله ولقد كنت أؤمن بالشعب لذلك كنت أعلم إنه سيرحل لكن ما كان يقلقني هو كيفية رحيله وهل ستراق دماء أكثر أم ما الذي سيحدث؟!

ما يدهشني حقا الآن هو شيئا آخر هو قدرة بعض البشر علي قلب الحقائق وتزيفيها و إضلال الناس وعلي رأس هؤلاء القوم الأختين الحلوين هناء وشيرين وكمية كبيرة من منافقي النظام السابق ،والشئ الآخر و الأكثر إيلاما بالنسبة لي هو حال بعض المتشدقين بالحرية والنداء لديموقراطية وما بثوه علي مدوناتهم وما كتبته أقلامهم في سنوات سابقة ثم يأتون اليوم ويحددون من يستحق هذه الحرية  ومن لا يستحق  وكأنهم يوزعون في تركة أبيهم وليست الحرية حق متاح للجميع ،الشعب هو من يقرر الان أيها السادة الأفاضل نحن نريد وطن حر ديموقراطي من حق كل شخص أن يعبر عن رؤيته السياسية وأن يعبر عن مذهبه أي كان أيدلوجية هذا المذهب سواء علي أساس ديني أو غيره وإذا كنت ضد اتجاه معين يمكنك أن ترشح الاتجاه الآخر أو حتي إذا أردت فلتنشأ اتجاهك الذي يعبر عنك فكلما زادت التيارات السياسية في البلد كلما دل ذلك علي مدي صحة المجتمع السياسي في مصر.

الشعب هو من يقرر الآن وهو من يتحمل نتائج اختياراته وهو أيضا من يستطيع أن ينزع الحكومة ويحذفها إذا أراد أو اتخذت قرارات لا يريدها ،الشعب الآن هو القوة التي تحدد الطريق  وتنير درب بناء الوطن ،الحكومات هي التي تخاف من الشعب الآن وليس العكس.

الواجب علي من كتبوا عن الحريات وقت ما كانت كلمة الحرية مجرد كلمة نحلم بها بعد ما أصبحت واقع أن ينشروا حقا كيفية قبول الرأي الآخر كيف لنا أن نتعايش مع ثقافة اختلاف وأنه لا يوجد مانع أن يكون لي صديق وحبيب اتجاهاته الفكرية والعقائدية تختلف تماما عما أؤمن به ، ثقافة الاختلاف وقبول الآخر هي حقا ما يجب أن تنشر وتوصل للعقول والحمد لله أن الشعب يفهم ويعي ومن عاشر اهل التحرير وثورة مصر يعلم جيدا أن الشعب يفهم جيدا ولسنا أغبياء أو لا نفهم في السياسة  أو لسنا مستعدين لديموقراطية حقيقية كما روج بعض أذناب النظام السابق .

كلمة أخيرة في رحلة الحياة وعند المواقف الحاسمة قد تخسر بعض من عرفتهم في حياتك لاختلافك في الرأي معهم وارتفاع حدة النقاش  بينكم بطريقة لا تجعل الأمر مجرد آراء بل هي فرض آراء بالقوة وفي نفس الموقف قد تكتسب أصدقاء جدد يتفقون معك وقد تخسر جميع من حولك وتضطر ان تقف تدافع عما تؤمن به وأن تحمي قضيتك وتستمر في طريقك رغم أنف كل الحاقدين والمحبطين وعندما تخسر أو تنتصر ففي النهاية لقد كسبت احترامك لنفسك و أجبرت الآخرين علي احترام رغبتك ، في الفترة السابقة خسرت عدد لم يسبق لي فقدانه من الأصدقاء ولم أكن أعتقد إني سأفقده في يوم من الأيام لكني لم افقد أحد ممن اختلف معي فهناك من أصدقائي من هو ضد الثورة حتي الآن هذا رايهم واحترمهم واحترم موقفهم وثباتهم عليه عكس بعض المتلونين الذين كل يوم هم في شأن ،إن من خسرتهم وإن كانت الحقيقة هي إني ربحت هم من تعدوا علي بالسب أو استهانوا بدماء الشهداء اذهبوا غير آسف عليكم أو نادم.

هناك 11 تعليقًا:

  1. الفترة الأخيرة فعلا حصلت خسارة في الأصدقاء
    وإختلاف في الرأي .. والبعض كان غير متحضر

    أنا بحب النقاش بتحضر ومن إنسان لإنسان
    لأن في ناس بتنسى إنها بتتكلم على بني ءادمسن للأسف

    وأنا ضد الإهانات والسب والقذف .. وعلى طول بنسحب من النقاشات
    إللي تتضمن ألفاظ تأذي حواسي إن كان عليا أو على غيري

    أنا إحترمت كتير ثباتك على موقفك
    والحمدلله هدية عيد ميلادك إتأخرت بس من أحلى الهدايا ولا تتعوض

    دمت دائما حر مؤمن بمبادئك مرفوع الراس
    ^_^

    ردحذف
  2. الكلمة دى لمجنون بعينه

    هى برضو عن فقدان الاصدقاء
    مش سهل على اى حد ان يسمخ بخسارة اصدقاءه خصوصا المقربين
    لكن فى اوقات بتتوقع من بعض الناس مستوى معين من المسانده
    وبتتصدم جدا لو المستوى ده قل او تلاشى
    وفى اوقات زى دلوقت البلد كلها بتبدى عصر جديد
    عصر قوى من غير دعم خارجى البلد من جواها عايزه تقف ع رجلها وتبقى اقوى
    وفى الاوقات دى الاحسن ان الماضى يبقى يختفى بحلوه وبمره
    وينتهى لان فالعهد الجديد مفيش مكان للماضى

    ردحذف
  3. اتفق معك تماما فى افتقادنا لثقافة الاختلاف و ادبيات الحوار المتحضر و اتمنى ان نتعلمه او يظهر فينا فى الايام القادمة من مكنوننا الداخلى فلكم اعجبت كثيرا برقى و تحضر من قابلتهم فى ميدان التحرير و اتمنى ان يسود هذا النظام فى حياتنا لبنى عليه فى الفترة القادمة و الحمد لله الذى ثبتنا على ارائنا قبل و بعد 25 يناير و من هم كذلك لهم منى كل الحترام حتى و ان اختلفت رؤيتهم معى ، امامنا الكثير لنتعلمه او نسترجعه من مكنوننا الداخلى، و تحيا مصر الحرة

    ردحذف
  4. يااااااااااااة
    بجد مصيبة وكارثة الي بيحصل دلوقت
    يعني انا بجد في معاناة من أراء وكلام ناس كتير
    مفيش عندنا تقبل لرأي الاخر اطلاقا للأسف الا قليلا جدا
    بتمني الايام الجاية تكون خير

    ردحذف
  5. منورة يا غادة المدونة بابتسامتك المميزة وعقبال اليمن إن شاء الله هو بس كان بيلف الهدية وخدت وقت طويل بعيد عنك جت متأخرة اسبوع أحسن ما كانت السنة الجاية :)

    ردحذف
  6. خسارة الأصدقاء بالفقدان يعتبر أمر هين بالنسبة لمن فقد أخ أو صديق أو حبيب في الميدان ومن لا يحترمني لا استحق أن احترمه ومن يدعم سفاح لا يشرفني معرفته تحياتي لك

    ردحذف
  7. أتمني هذا يا مصري أفندي وعاشت مصر حرة بجهود أبناءها

    ردحذف
  8. منورة يا رحاب لا أنا شايف إن بكره أفضل بإذن الله حد كان يتوقع إن كل ده يحصل في 18 يوم حد كان يتوقع إن حسني هيتشال بكره إن شاء الله أحسن :)

    ردحذف
  9. صراحة يا محمد انت اتكلمت عن كذا نقطة مهمين جدا
    وغير حالة الاندهاش اللي كلنا عايشين فيها صراحة كنت عاوزة اقول كام حاجة كدة بعد اذنك
    اولا بالنسبة للي حصل الايام اللي فاتت و الناس اللي خسرناهم وحتى لو ماخسرناش لكن عمرك ماهتقدر تنسى الشكل اللي كانوا بيحاربوك بيه و هيفضل الموقف دا بينك و بينهم طول العمر و كلنا حصل معانا دا وانا في غاية الاسف لكن تبقى لي وجهتي ولهم وجهتهم كما يحلو لهم و ياريت لو كل واحد يؤمن بان وجهة نظره دي مش حاجة منزلة وانها تحتمل الخطأ ومش لازم يحارب الاخرين بسبب معتقداته و ان كنت احاول ان اقنع احد بوجهة نظري فللخير وليس من باب فرض الاراء لكن عالعموم ماخسرتش كتير جازى الله الشدائد كل خير على رأي يسوف السباعي
    ثانيا التخبط والتشتت اللي الناس فيه دلوقت واللي مايقلش حاجة عما كان الايام اللي فاتت و الناس اللي بتبخ سمها و كل واحد طالع برأي وطبعا الاحتجاجات اللي شغالة عمال على بطال يا جماعة ادوا فرصة للبلد تقف شوية على رجليها بعدين لو ماتحسنش الوضع اتظاهروا او اعتصموا او اي حاجة ماشي عبروا عن مشاكلكم لكن مش بالظريقة دي
    دا غير الناس بقى اللي عاوزة تسرق مجهود الثورة و تقلب الموضوع لصالحهاوالمتسلقين المستغلين و اللي كانوا هم نفسهم بيهللوا للنظام اللي فات و كلنا عارفينهم طبعا محسسيني بالظبط ان الثورة دي تورتة واللي يلحق حتة يخطفها ربنا يحرقهم ويريح البلد منهم دا مرض دا اللي عندهم ولا عبط
    تالت حاجة بقى اللي جاي ودا اللي قالقني بجد
    اول حاجة مش شايفة من وجهة نظري المتواضعة حد على الساحة يصلح للقيادة دلوقت خصوصا الفترة الجاية العلم هو اللي المفروض يبقى الهدف اللي كلنا لازم نتجهله اكيد البلد فيها ناس كويسة لكن لغاية دلوقت ماشفناش حد مستعد انو يقوم بالمهمة بجميع جوانبها
    يعني انا سمعت الجنزوري و زويل و عمرو موسى والبرادعي بغض النظر عن كرهي للبعض لكن عامة مش شايفة ان حد فيهم لوحده ينفع
    كمان روح الثورة اللي لسة موجودة خايفة يعدي الوقت وتروح من غير مانستغلها افضل استغلال مع غياب كوادر توجه حماس الناس لعمل قومي الكل يشترك فيه و بدل كدة اديك شايف انعدام التخطيط و العشوائية في العمل يعني من الأخر الموضوع ماشي ببركة ربنا كل مجموعة بتشتغل مع نفسها و اخرتهم يتضفوا شارع او يجمعوا تبرعات
    انا مش بقلل من حجات زي دي لكن دي ممكن تتعمل في اي وقت ولما تبقى دي الحاجة الوحيدة اللي خرجنا بيها من الثورة_على مستوى الافراد اقصد_ يبقى دا شيء محبط

    و ربنا يكتبلنا اللي فيه الخير

    و كل تحياتي على موقفك يامحمد والف الف شكر ليك انت وكل الناس اللي زيك رجعتوا لمصر هيبتها و ربنا يحفظلنا مصر حرة ابية فخورة بيكم
    و تحياتي على المقال و احب اسجل اندهاشي انا كمان

    ردحذف
  10. سوري على الرغي دا كلو
    انا ما اخدتش بالي اني اتكلمت كتير اوي كدة غير بعد ما البوست نزل


    معلش

    ردحذف
  11. يعني بقول حرية رأي وبعدين تعتذري لإطالة يا ستي خدي راحتك زي ما انت عايزةإن شاء الله تكتبي بوست كامل لرد :)
    أنا متفق معاك في نقطة إن مش رأي الواحد منزل ولا حاجة بس لما يكون الواحد رافض الحوار وبيشخص القضية ويهاجم الفرد مش الفكرة فمش عايز اعرفه نقطة التخبط والتشتت دي حاجة متوقعة من الأول لفترة قصيرة الدنيا مش هيتعدل حالها بين يوم وليلة
    أنا كنت حاطط لينك ده عندي قبل كده وممكن تشوفوه هتلاقي حاطط رؤية متفق معها بنسبة كبيرة تحياتي لك :)
    http://eipr.org/pressrelease/2011/02/12/1096

    ردحذف

خد راحتك في الجنان معنا حرية الرأي مكفولة للجميع حتي لو هتجنن علينا
نظرا لوجود مشاكل في نظام التعليقات لغير معرفين برجاء عدم التعليق بغير معرف منعا لاختفاء التعليقات