هذه المقالات قديمة ولكني اردت أن ترى النور …
هي مجموعة من المقالات تتوافق مع ما نراه في الأحداث الأخيرة والمقارنة بين ماضينا وحاضرنا …
كان أول موقف لها مع المخبول معمر القذافي أردت أن أضعها بين أيديكم ، وأضيف عليها الجديد …
مواقف ومش مواقف ..
مع كل الإحترام والتقدير الشديد لأستاذنا " أنيس منصور " لرائعته " مواقف لأنيس منصور " واستمحيه عذرا في إستعارة كلمة مواقف من عنوان مجموعة مقالاته التي امتعنا بها على فترات طويلة ، ودعوني أتذكر العبارة واستعير كلمة مواقف واصيغها بطريقة جديدة ، فمواقف ومش مواقف هي مجموعة من الأحداث العامة التي نراها في حياتنا ونعيش واقعها ومن المواقف التي جعلتني أقف قليلا أمامها هو موقف إجتماع " جامعة الدول العربية الأخير " والقرار بعقد قمة في سبتمبر المقبل ، حقيقة الأمر يدعو للسخرية ، وخلونا نتكلم بلدي أو عامية شوية ، أصل الهيلمان اللي كان معمول للقمة دي عن تهويد المقدسات والكلام والمناظرات وسرعة الإجتماع والتحضيرات يحسسك إن الجيوش العربية هتقوم بحرب وتحرر فلسطين لكن مش زي حرب 1948 م المهم الضحك والسخرية في القمة دي كان لغاية الواحد نام على ظهره ، الواحد حس بخناقات الشارع وشغل العيال الصغيرة في القمة دي ، المفروض إن القمة دي معمولة من أجل هدف أسمى ، حاجة لها قيمة يعني ، فأي منازعات أو أحقاد المفروض ما يظهرش ، لكن على مين سيادة العقيد بطل سلاحف النينجا والرنجا كمان ، أي حد متخانق معاه أو شد معاه بكلمتين حلف يمين يحاسبه عليه ربنا ما هو داخل القمة ولا قاعد فيها ، طيب يا عم العقيد ، دا انت متخانق مع نص الزعماء والرؤساء ، يعني انت بتطلب من الآخر محدش يحضر القمة دي من الأساس ، لا والألعن لما الجماعة رايحين وبكل قوة يخلوا رئيس وزراء إيطاليا هو ضيف شرف القمة ، خلاص البشر خلصوا ، الناس ماتت كلها من العالم ، ونسيب كل قادة ومفكري العالم والمساندين لينا في مشاكلنا فنروح نجيب واحد شايف إن اليهود ليهم حق في بيت المقدس والقضية الصهيونية ونخليه ضيف الشرف ، يا سلام !!
طيب الراجل لما حضر اداكم التقييم المناسب ، وانتم بتتكلموا وخصوصا انت يا سيادة العقيد ، الراجل من كثرة الكلام سابكم ونام نوما هنيئا ، يا عيني على الإحتفال والإستقبال اللي اتعمل له ولا زيارة أوباما لمصر ، الراجل من كثرة الرغي سابكم ونام بمعنى صدر لكم الطرشة والعبيطة ونام فبالله عليكم عملتوا القمة دي ليها ما دام كل اللي فيها غلط في غلط فياريت حد يفسر ليا الموقف دا ؟ !!!
*************************
الموقف المرة دي يعني حاجة تفرح وزي الفل ويثبت مدى إنغلاق العقل البشري على نقطة معينة وإن الألقاب تعطى وبجد لمن لا يستحقها ، ولا اعلم لماذا سيادة العقيد يصر على أن يكون ضيف شرف المواقف – بيفكرني ببدوي لما كان ضيف شرف الفوازير – المهم سيادة العقيد العتيد وإمام الزعماء - على نفسه أو عند امه يا ادهم – في مداخلة له مع إحدى الجامعات اليابانية وعلى الهواء مباشرة يقول لليابانيين إن الولايات المتحدة الأمريكية قد دمرت لهم مدينتين " نجازاكي وهيروشيما " – على أساس إنهم ما يعرفوش مثلا ولا التاريخ ما يخصهمش – ويطالبهم بالوقوف أمام الولايات المتحدة الأمريكية ولا والأكثر من ذلك يطلب منهم ما يشبه الحرب على امريكا – حد قالك قبل كدا إنك ما تعرفش حاجة في التاريخ السياسي والعسكري – يا حضرة العقيد العتيد ، يا امام حاجة تانية غير الزعماء دولة هُزمت في الحرب العالمية الثانية ووقعت معاهدات وإتفاقيات مع الدولة التي هزمتها – الولايات المتحدة يا امام عشان ما تفكرش كتير – تطلب منها إنها تحاربها وبمعنى أصح بتقوم مين على مين ، الحقيقة شعرت إن الطلاب وهم بيستمعوا له إنهم اتخنقوا منه جدا جدا ، ولو كنت اجيد اليابانية كنت حسيت إنهم عايزين يقولوا له :
انت اكيد ......... اكيد لفظ ياباني بيشتموا بيه .
فياريت حد يفسر لي دا زعيم إحدى الدول العربية ازاي ؟
*************
وبما إن الزعيم العقيد لا يزال متواجد معي هذه الأيام على شاشة التليفزيون وصفحات الوورد والمدونة فيسعدني أن اضيف له هذا المقطع من الكلام أيضا عن دعوته في اوروبا للدين الإسلامي – ونعم الجهاد يا عقيد – لكن يا كبير ، ملقتش غير روما وتدعوهم للديانة الإسلامية ونشر الدين بداخلها وخلينا نقول المكان اللي حضرتك عايز الدين يتنشر فيه " الفاتيكان " مقر المسيحية في العالم أجمع – يا عم حد قالك إنك من سلالة محمد الفاتح ولا سعد بن أبي وقاص ولا طارق بن زياد – يا كبير الكلام دا ولى عهده انت بتدعوا إزاي دا ناقص تقول للناس احملوا السيف واغزوا تلك المنطقة ، نفسي اقولك حاجة واحدة الديانات دلوقتي بتتبع بالإقتناع العقلي والقلبي لم تعد مثل ذي قبل والإرغام وهذا الكلام فنحن لسنا إبان حملات التفتيش أو الإرغام الديني أو حكم فاتح البلاد ...
وعلى جهودك في نشر الديني فهذا يعجب أي فرد ولكن عليك أن تتبع الطريقة الصحيحة ....
وبعدين انشر الدين بطريقة صحيحة داخل حدود دولتك الأول قبل ما تطلب نشره داخل مقر المسيحية صح ولا الكلام دا غلط ؟
*********************
طبعا سيادة العقيد بطل سلاحف الرنجا ، في هذه الأيام يتعدى على شعبه بكل صفاقة وبرود ويخبرنا بكل هدوء إن هذا ليس إلا ردا سلميا …
طب اسمح لي أقولك كلمة إعتراضية جامدة ، لأ احسن اخليها في سري ..
حضرتك جاي تقول إن اللي حصل دا رد سلمي ، أمال الدموي يكون امتى بعد ما تقتل كل الشعب الليبي ؟
وكل زعماء ومحاربي الصحراء معاك ، إيه يا معلم رشدان ما ترحمنا بقى وترحم شعبك من الإستعمار بتاعك ليهم !!!
يا عم العقيد انا خايف تمشي بجد لإنك لو مشيت لن نجد من نسخر من كلامه ومن أفعاله ولكن بالله عليك لماذا لا تريد أن ترحم شعبك من هذا التخلف المسيطر على عقلك ، وتصر على السيطرة على الشعب لفترة أطول ؟؟
حسنا تريد أن تدمر وتقتل شعبك هل أصبح كل أعمال الرؤساء والزعماء العرب تسير على نفس المنوال ..
يعني الشعوب بتتظاهر بالسلم ، ما تنفذوا مطالبها ولا لازم قتل ودمار وخراب ومذابح ؟؟؟
يا معلم رشدان الجميع يناشدك أن تترك تدريب سلاحف النينجا لأنهم ليسوا سلاحف نينجا بل هم أناس شرفاء لا يريدون فاسدين لحكمهم ..
بل يريدون حكما وحاكما على قدر من العقل والفكر والمنطق ..
I.M.S.A
M.S.M.O
القذافى مريض بجنون العظمة و أسال اى طبيب او دارس لعلم النفس و لازم يحصل تدخل لقذف المربع اللى هو فيه بدل ما يقتل كل الشعب الليبى لاخر ليبي و ليبيه كما قال المجنون
ردحذفالراجل ده عدى كل الحدود بصراحة
ردحذفربنا ينتقم منه شر انتقام
عقلية القذافي مثيرة للتعجب، كيف وصل الى السلطة وهو مجنون؟:-/
ردحذفتسلم ايدك اسلام كلامك رائع جداا نيس توبيك
تيرز :
ردحذفالقذافي رئيس مخبول ولا يدري ما الذي يقوم به ، لماذا لم يثر عليه الشعب الليبي من قبل ، كيف احتمله هذا الشعب اربعة عقود كاملة لا ادري ؟
كيف يمثل قيادات عربية ؟ ، هذا يثبت أن التغيير واجب الحدوث ويجب أن يحدث ..
نورني وجودك وتعليقك دائما ..
غير معروف :
ردحذفلازم الشعب ينتقم منه في حياته
قبل أن يقتص منه الله بعد مماته ..
على كل تلك المجازر التي قام بها ..
مارو :
ردحذفالقذافي وصل للسلطة وهو مجنون لان هناك من عينه في هذا المنصب وكان له تلك السلطة عام 1968 م
وكان يريد أن يكون زعيما عربيا ..
تسلم ومنور المدونة يا مارو ومنور التدوينة
كانوا عاملين صفحة على الفيس اسمها هنقاطع الشعب الليبى لو شالوا القذافى ، لان الراجل بصراحة اتحول لاحلى برنامج كوميدى فى التاريخ .. لكن مع ثورة ليبيا ظهر جنون العظمة وعشق السلطة الى عنده واتحول ل هتلر العرب من جديد
ردحذفواحد مستعد يضحى بشعبه كله عشان " الملايين " اللى بتحبه من الصحرا للصحرا !
واحد كل تصريحاته ثورة ثورة وحبوب هلوسة !
كان فيه تحليل لدكتور ايمن الجندى لشخصية القذافى وقال انه نفسيا يعد مريض بهوس السلطة
لكن المشكلة ان مرضه دا مش بيتعالج ، يعنى هو فعليا شخص مختل وواضح من بيانات ابنه ان العيلة كلها كده
ربنا يرحمنا من الحكام دول كلهم
بلاك بيرل :
ردحذفالراجل دا دماغه متركبة شمال أصلا
انا لا اعلم السبب حتى الآن في أن الشعب الليبي صبر عليه طوال تلك الفترة حقيقة تحية لهم على تلك المثابرة الرائعة ..
//
ربنا يرحمنا من أمثال هؤلاء الناس ..