الأربعاء، أبريل 27، 2011

ارحــــــمـــــونـــــــــــــا ……

يا جماعة ارحمونا بقى من الفتاوي غريبة الشكل والأطوار وكمان حطوا عليها الأطوال ..

كل شوية واحد يخرج لنا بفتوى غريبة لا عمرنا سمعنا عنها ولا الدين قال بيها

طيب يا عم المفتى وحضرتك جبت الفتوى منين ؟

يقولك وبلا فخر من القرآن والسنة ، يا عم القرد المتنطط بسلسلة في رقبتك ، هي فتاويك غريبة الشكل اللي هي اصلا بعيدة عن الدين ، ولا تمت له بصلة توحد ربنا ، هيدلنا عليها القرآن والسنة ازاي ؟ ، وسيبك يا عم من الحكاية دي ، هو يعني أي كلام فاضي مش معقول ، عشان تثبتوه تتهموا الدين إنه السبب فيه والقرآن بيدل عليه وكمان السنة شاهدة على كدا ، يا عم بتنجان افندي اسمح لي اقولك حاجة :

عشان تطلع فتوى لازم تمر على ييجي 13 أصل من أصول الدين وسيبك يا سيدي من الأصول يمكن تطلع فتوى من غيرهم لكن على الأقل في حاجة اسمها اجتماع لجنة الفتوى ، ولا دا كمان محدش سمع عنها حاجة وكل واحد يتحشر في بقه كلمتين عن الدين يقوم قايم قايلهم ويقولك قال الله وقال الرسول .. وربنا والرسول صلى الله عليه وسلم بريئين من تجارتكم في الدين ..

لا والأغرب كلامكم الغريب في التفسير والكلام عن القرآن والسنة لا واللي يغيظ العُبْط اللي بيصدقوكم !!!

بجد اللي غايظني إن فيه ناس بتصدق الكلام الأهبل والعبيط وبتمشي وراه ولإننا شعب بيخاف ما يختشيش فبنحط لساننا جوا خشمنا ونقعد ساكتين

ولا بنتنفس وغريبة اوي إننا ما بنقدرش نرد على الناس الغريبة اللي بتطلع بفتاوي غريبة زي دي والناس بتصدقها ويقولك الشيخ الفلاني قال والشيخ العلاني عاد طيب يا شيوخ الدول العظمى واللي قارفنا مش في حياتنا لأ دا كمان قارفنا في نومنا ...

محدش قالكم إن اللي بتعملوه دا ما بيسببش الانقسام جوا الناس وبس لا دا بيخليهم تايهين كمان ليه ؟

لإن حضراتكم النهاردا بفتوى بتقول مثلا ما تشربوش بيريل لانها منكر من عمل الشيطان .. تاني يوم الصبح ممكن مندوب من شركة بيريل يتفق معاكم على اعلان لحساب بيريل فنلاقي سيادتكم طالعين بعديها بيومين وتقولوا بيريل دا احسن مشروب بعد اللبن ولازم تشربوه لتطهير الجسد وكمان اللسان ومش بعيد تطهير الشارع كمان ، وغريبة ان انصاركم زي العبط والهبل بيصدقوكم ...

وإنكم لو ارتكبتم الخطأ والكل شاهد وواخد باله على غلطكم تقولوا جلَّ من لا يسهو ، وإن حد تاني غلط تعلقوا له حبل المشنقة حلال لكم حرام وستين مليون حرام على غيركم ..

طيب فرقتم ايه عن ناس تانية برضوا انتم بنفسكم بتحاربوهم طبعا ولا حاجة لان في الاصل انتم وهما ولا حاجة وكلكم سبب ضلال وضياع لناس كتير ...

يا جماعة ارحمونا شوية من عبطكم دا لان بجد فيه ناس ولا فاهمة حاجة في اي حاجة وبتصدق العبط اللي بتقولوه وبينفذوا كلامكم وهناك ناس عارفة انكم بتوع فلوس واعلانات ودوشة تجيبوا من وراها قرشين عشان المعيشة بعد ما لقيتوا ان التجارة في الدين هي انجح حاجة فكل واحد يحفظ له آيتين ويروح يروج لنفسه دعايتين ويبقى الشيخ هيكل ابو فتاوي نيكل ، وهلم جرا ورا الناس اللي بتصدق اي كلام عبط في الهبل بيتقال وتصدقه والغلاسة بتنفذوا ..

طب بخصوص الشيخ هيكل الجديد كان تاريخه الديني إيه ، يعني درس في أصول إيه ، بلاش أصول ، القسم اللي درسه في الدين كان ايه ؟ ، بلاش دي ايه العلم اللي درسه ؟

وكمان اللي يغيظ إن الناس المتدينة أو خريجي العلوم الشرعية والأساتذة في هذا المجال صامتين لكل فرد يتحدث بمزاجه ولا يرد عليه ولا يوضح طب والانسان العادي هيعمل ايه ما هو مش فاهم حاجة وبينفذ وبس ...

الخوف كل الخوف في المستقبل وانتم بتتسببوا في القتل والخراب والتدمير والسرقة من غير ما تدروا او حتى تفكروا تلاقوا في يوم وحد ياخد صدى زي حضراتكم ويبقى ليه انصار وتلاقيه اباح دمائكم وتكونوا زي المثل ما بيقول جنت على نفسها مراكش ..

بس بصراحة انا عندي سؤال :

حضراتكم وانتم عارفين انكم بتضلوا الناس وبتتكلموا في الدين وبتخرجوا علينا بذقونكم وجلاليبكم وسلطاتكم وبابا غنوجكم ما تعرفوش ان اي فتوى غلط وحد بينفذها بتشتركوا فيها معاه ولا حضراتكم من عمى الفلوس - ما الفلوس بتعمي العين يمكن نفسكم تبقوا عميان واحنا ما نعرفش - نسيتم الدين اللي انتم اصلا ما بتدعوش ليه على الرغم من كلامكم عن نصرة الدين ورغبتكم الشديدة في كون الناس كلها تكون رجال دين وابقى قابلني يا عبده بيه الندمان يا ابو فتوى جنان لو دا حصل وسلم لي على الفتاوي الدليفري ..

وبخصوص الفتوى الدليفري واللي بقت موجودة دلوقتي إنك تتصل وتسأل سؤال شرعي أو مسألة فقهية وجدلية وتلاقي عموا الشيخ اللي بيتلقى الاتصال يرد عليك بسرعة ويقولك اعمل كذا ، هي بالسهولة دي ولا الحكم سهل كدا

أُمال إذاعة القرآن الكريم بتطول ليه وتقعد تجيب علماء وشيوخ وكذا دكتور للإجابة عن سؤال بيبقى موجود أو مرسل للحلقة من أسبوع أو اتنين وممكن يقعد شهر أو اتنين لغاية ما حد يقول إجابة فيه على الرغم من إن كل حلقة بيبقى فيها إجابة سؤال او سؤالين ويوم ما يكثروا يكونوا اربعة اسئلة ، مفيش واحد منهم اول ما يسمع السؤال يقول الاجابة ليه زي حضراتكم ؟

يمكن عشان دول عارفين إن أي كلمة غلط هيكون فيها رد جامد أو تنفيذ يقع على عاتقهم أيضا ..

بجد ، ارحمونا من فتاويكم ومن كلامكم ومن الدليفري بتاعكم لان الناس أصبحت على شفا حفرة الضياع ...

فحقيقة أرحمونا ...

I.M.S.A

M.S.M.O

هناك 17 تعليقًا:

  1. ابى كان يكرة الشيوخ ورجال الدين وكان دائما يقول استفتى قلبك او استفتى عقلك ..

    ردحذف
  2. أم عمرو وإيهاب27 أبريل، 2011 7:04 م

    شكرا اسلام على مقالك اللاذع
    عن نفسى بستفتى اهل العلم فى لجنة الفتوى فى الازهر .. وأعتقد هم ناس افاضل لا يتسرعون فى الافتاء .. اذكر فى مرة ذهبت لدار الافتاء وكان واحد من شيوخ اللجنة المكونة من ثلاثة شيوخ غائب .. أجل الشيخان الموجودين تقديم فتوى لنا حتى يحضر ثالثهما لإجماع الرأى .. احترمت الحتة دى جدا ..

    وعلى رايك ربنا يرحمنا من افتكاسات الفتاوى
    تسلم يا اسلام ..

    ردحذف
  3. المفروض يلغى موضوع الفتاوى ده لانه جاب لينا خراب سواء اتت من داخل الازهر او من اى مكان...الحلال بين و الحرام بين و احنا لينا عقل و من يريد ان يعرف فاليستشير الكثيرين و يذهب مع ما يقنع به و لكن يجب ان تظل استشارات مش فتاوى و فرمانات

    ردحذف
  4. أجرأكم على الفتوى أجرأكم على النار .. والحديث صحيح فى معناه
    ......
    من قال لا أعلم فقد أفتى .. ودى الفتوى الوحيدة اللى محدش بيفتيها ونفسى اسمعها من شيخ من اللى بنشوفهم ع التلفزيون عمال على بطال
    .....
    تعليق صغير ل tears بس >>> منقدرش نلغى الفتوى لان مش كل الناس فقهاء فى الدين وتقدر تحكم بين الحلال وبين الحرام وما بينهما من الشبهات ، فيه حاجات الناس فاكراها حرام وهى حرام فى حالات معينة والعكس صحيح .. يعنى فيه فتاوى ترتبط بظرف مش بحكم ثابت .. والعامة لو كل واحد فيهم مشاها استشارة هتدخل فى طرق للتشكيك ويحصل تضارب بين شيوخ غير مؤهلين للاستشارات دى وكل واحد يقول على مزاجه من غير ما حد يحاسبه ولا حاجة .. يعنى بدل ما نقلل فتاوى السجاير حلال ومش بتفطر وكل اللخبطة دى هتزيد وهتبقى على نطاق واسع وكله يشير بعضه
    .......
    بس سبب كبير من الفتاوى اللى بنشوفها والاراء الغريبة هى اسئلة الناس ذاتها ، اللى فاكرة ان التشدد فى الدين من اساسيات الدين نفسه ، مع ان الرسول بيقول هلك المتنطعون ، لكن المشكلة انهم مش شايفينه تشدد اساسا دول شايفينه الحذر من الوقوع فى الشبهات .. وربنا يرحمنا برحمته بقى
    ......
    بوست جميل فعلا :)

    ردحذف
  5. فعلا يا اسلام معاك حق
    والمصيبة ان الناس بتاخد بالمظهر يعني مثلا لقيت واحدة صاحبيتي كانت محتارة في شيء وسابت كل الناس وراحت لوحدة منتقبة علي اسا انها الاحسن وعارفة الدين احسن ....ومش عايزة اقولك اية حصل
    صدمتي فاقت كل حد
    احنا بناخد بالمظهر وبنقول فعلا شيوخ وعارفين اكتر منا
    لكن الحقيقة انهم لا يعلمون اكثر منا بل احيانا نكون عالمين ب~أكثر مما يعلمون
    الحمد لله عمري ما اخدت بكلام اي شخص مهما كان الا اما أتأكد من اكثر من شخصية
    وللأسف مفيش كتير من الناس بتعمل ده
    زي ما تقولوا كله بقي يستسهل
    لكن من يعرف انه سيحاسب علي كل كلمه نطقها ما افتي ...ابدا
    يكفي ما ستتحمله من ذنوب

    جميل البوست اوو يا اسلام

    ردحذف
  6. احيانا بحس بعض الشيوخ اصبحوا مثل كهنه المعابد

    ردحذف
  7. الله يفتح عليك...
    ياريت الناس تفهم الكلام ده.. المشكلة اننا عندنا ضعف شديد جدا جدا من ناحية الدين أول ما واحد يطلع يقول قالى تعالى وقالى الرسول نعمله تمثال بالرغم ان ممكن يكون معاه ابتدائية بس مثلا
    الدين دلوقتى تحول "لسبوبة" ولذلك بقى فى 20 قناة دينية وكله بيقول ويعلق ويفتى والناس بتصدق
    نفسى دماغنا تتغير بقه امتى؟ ..امتى هيتحقق الحلم ده

    ردحذف
  8. و تقول الحكومة المصرية التعيسة أنها تسعى لبناء أربع محطات نووية بحلول عام 2025، على أن يبدأ تشغيل أولاها في 2019 ، وأن يضيف البرنامج النووي الجديد ما يصل إلى 4000 ميجاوات !!! علما بأن تكاليف بناء 4 مفاعلات نووية حوالى 20 مليار دولار. و نشرت جريدة المصرى اليوم فى 20 سبتمبر 2010 تصريح د.حسن يونس وزير الكهرباء و الطاقة جاء فيه سيتم إيفاد 67 مهندساً مصريا إلى كل من الولايات المتحدة، وروسيا، وفرنسا، وكوريا الجنوبية، للتدريب على التكنولوجيا النووية. وبالفعل هذا مفيد لأرسال الأصدقاء و المعارف فى رحلة مدفوعة الأجر على حساب الشعب المصرى الفقير. ..تكلفة مفاعل نووى جديد يبلغ 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط!!! باقى المقال ضمن مقالات ثقافة الهزيمة بالرابط التالى www.ouregypt.us

    ردحذف
  9. ثقافة الهزيمة .. العتبة الخضراء‏

    و تقول الحكومة المصرية التعيسة أنها تسعى لبناء أربع محطات نووية بحلول عام 2025، على أن يبدأ تشغيل أولاها في 2019 ، وأن يضيف البرنامج النووي الجديد ما يصل إلى 4000 ميجاوات !!! علما بأن تكاليف بناء 4 مفاعلات نووية حوالى 20 مليار دولار. و نشرت جريدة المصرى اليوم فى 20 سبتمبر 2010 تصريح د.حسن يونس وزير الكهرباء و الطاقة جاء فيه سيتم إيفاد 67 مهندساً مصريا إلى كل من الولايات المتحدة، وروسيا، وفرنسا، وكوريا الجنوبية، للتدريب على التكنولوجيا النووية. وبالفعل هذا مفيد لأرسال الأصدقاء و المعارف فى رحلة مدفوعة الأجر على حساب الشعب المصرى الفقير.

    ..تكلفة مفاعل نووى جديد يبلغ 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط!!! باقى المقال ضمن مقالات ثقافة الهزيمة بالرابط التالى
    www.ouregypt.us

    ردحذف
  10. استاذ احمد :
    منور حضرتك ، استفتي قلبك وعقلك نتمنى ان يفهم الجميع ذلك
    //
    منور البوست

    ردحذف
  11. ام عمرو وايهاب :
    منورة ، وشكرا على تعليقك ورأيك في البوست

    ردحذف
  12. تيرز :
    الفتاوي تكون لأمور محددة وقضايا محددة ،
    بينما الفتاوي العمال على بطال دا اسمه الغتاتة بعينها والضياع
    //
    تحياتي لكِ

    ردحذف
  13. بلاك بيرل :
    دعيني استعير عبارتك
    من قال لا اعلم فقد افتى
    تحياتي لكِ

    ردحذف
  14. رحاب صالح :
    انتِ الاجمل في تعليقاتك دايما وذكر المواقف من الواقع
    تحياتي لكِ

    ردحذف
  15. عمرو يسري :
    احساسك في محله
    خصوصا الناس اللي متعاصة دين

    ردحذف
  16. شيماء :
    منورة ، اتمنى من كل قلبي ان يعي الناس ويفهموا المعنى الحقيقي للدين بدلا من تلك الطريقة التي يعاملونا بها من ان الاختلاف هو اختلاف مع الله وليس اشخاص والفتاوي المستهبلة اليومين دول شغالة عمال على بطال
    //
    تحياتي لكِ

    ردحذف
  17. غير معروف :
    اعتقد ان يتم البحث عن التقدم ، والتكنولوجيا بدلا من البحث عن طريقة الاكل ودخول الحمام ، وكيف تأكل البصل ، العالم ينطلق للأمام وهؤلاء يرجعون مائة عام للخلف
    تحياتي لك ع المرور

    ردحذف

خد راحتك في الجنان معنا حرية الرأي مكفولة للجميع حتي لو هتجنن علينا
نظرا لوجود مشاكل في نظام التعليقات لغير معرفين برجاء عدم التعليق بغير معرف منعا لاختفاء التعليقات