الجمعة، يونيو 11، 2010

الاسم خالد

 

28204_129364200426940_129237763772917_238099_6302699_n

الاسم خالد

شاب مصري عادي

لا بتاع سياسة ولا معارضة

لا تبع إبريل ولا تغيير

آخره كلمتين مع صحابه علي القهوة

طق حنك لا أكتر ولا أقل

لكن كان عنده كرامة إنسان مصري

هي آخر حاجة فاضلة للمصريين من عصر الفساد

أو كان فاكر إنه عنده

مش عارف إن كلاب السكك في الشوارع

بتدور علي أي حتة لحم تنهش فيها

لأجل حظه السعيد وقع في ايد كلبين

ضربوه حتي الموت امام شوية خرفان

لا بتتكلم ولا بتتحرك و لا في منها أمل

صبرت لما الجلاد خلص علي الضحية وبعد كده اتكلموا

صرخوا صوتوا لطموا الخدود بس امتي ؟

بعد فوات الأوان بعد ما خالد بقي جثمان

بس خالد لسه عايش مماتش

خالد أصبح رمز

رمز سلبيتنا وخضوعنا وسكوتنا علي الحق

رمز إن الشعب مجرد حنجرة بتصرخ و بتصوت وإننا أصحاب حناجر فقط لا غير

رمز لفترة مظلمة في تاريخ شعب قبل دولة

رمز إن هناك غيلان عايشين معانا في صورة بشر

رمز لجرائم كلاب السلطة

رمز لكل نقص وكل فساد في دولتنا

كل ما أتمناه يا خالد إنك تكون الأخير في سبيل تحريك هذه البلاد من نومها العميق

كل ما أتمناه أن يحكم علي الكلاب وأسيادها بالإعدام

وأن لا استيقظ لأجد قضية جديدة و أرسلت أنت إلي قبر النسيان مع من سبقك

وأعتقد إني لا أطلب المستحيل

أليس كذلك يا خالد ؟

 

 

 

 

هناك 9 تعليقات:

  1. حرررررررررررررررررام

    ردحذف
  2. انا شفت الخبر سبعة صباحا بس للاسف كنت مضطرة اخرج و لم اعود الا ليلا و بالتالى لم اجد وقت للكتابه عنه و لكن سعدت جدا ان كل المدونات ابرزته و لسه معلقه عند قلب القطة عليه و اسمحلى انقلك تعليقى هنا
    .........................
    كفاية صبر عشان كترة ح يبقى له اسم تانى وحش لازم تاخد حقها و البلد بكل شعبها لازم ياخدوا حقهم و لو ضيعوه زى كل مرة يبقى كل مواطن فى البلد دى سواء عايش فيها او بره و لسه حامل بسبورها يستاهل يحصله زى ما حصل للشاب ده و أكتر و يستاهل ينتهك بره و جوه لانه رخيص و جبان و ذليل

    اللى خايف ينزل و فاهم انه كده بيحمى نفسه و اولاده و خوفه يبقى يستاهل الذل و ما جمع اللى اما وفق و كل شعب يستحق حاكمة و بلغيه ينتظر دوره عشان مش بعيد

    قانون الطوارىء اللى بيدعو انه للارهابيين المفروض يطب على الشرطة لانها الارهاب نفسه

    على فكرة امبارح كان فيه اعتصام امام قسم سيدى جابر من ناشطين و قادة حزب الغد بس اعتقلوهم كلهم و تعاملوا معاهم بعنف و حتى محامى الضحية اعتقلوه و البهوات الضباط قالوا ده مات من المخدارت...و النبى تبصى على الصورة دى و تقوليلى دى المخدرات اللى بتعمل كده نوعها ايه


    http://www.youm7.com/News.asp?NewsID=239233&

    لو الشعب ده سكت ما يفتحش حد بقه بعد كده و يكلمنا عن التاريخ و العلم و الحضارة لان ده يبقى شعب عار على الحضارة و البشرية كلها...ده لو حيوانات...ذوات اربع..كانت ثارت

    اسفه على الاطالة والانفعال بس انا مش مع العياط و النحيب و كنس السيدة و مع انى مش صعيدية بس مؤمنه باخد الثأر لما يكون مافيش عدل و مقتنعه باللى المعتصمين امبارح كتبوه على الافتات...العين بالعين و السن و بالسن و البادى اظلم...لا تراهنوا على صبرنا

    ردحذف
  3. الله يرحمة وياخدنى اكرملى عشان انا جبانة زى باقى الشعب الجبان

    ردحذف
  4. يمكن اكتر حاجة لفتت نظرى فى الموضوع كله مسألة شهود العيان ، اللى بيقولوا انهم شافوا المخبرين وهما بيضربوه حوالى تلت ساعة وبيبهدلوه .. طب محدش فكر يتحرك ؟! كلنا دلوقتى عملنا صفحات والناس بتكتب تعليقات والجرايد مهتمة ، لكن لو اى حد من دول شاف الحادثة زى الشهود دول كان هيعمل زيهم .. مكانش هيعمل حاجة ! دلوقتى بنتكلم عشان خلاص الراجل مات واحنا بعيد ، لكن لو كنا فى وقت الحادثة ومكان الشهود دول اللى كانوا معاه فى السايبر او فى الشارع مكنش حد هيقدر يتكلم ولا يعمل حاجة .. بذمتك مش ليهم حق المخبرين يعملوا فيه اكتر من كده ؟! ما هو اصلا مفيش حد بيفكر يقف قدامهم غير بالكلام وخلاص ، وساعة الجد متلاقيش ، بالمناسبة انا ضد التعميم جدا ، يعنى كل الناس بعد الحادثة قالت هيا دى الداخلية وهما دول الظباط وبتاع ، ونسيوا ان فيه ظباط شرفاء فعلا - مهما كان عددهم قليل او كتير - وبيراعوا ربنا فعلا ، وفيه شهداء كتير من الظباط .. عموما مهما كان اللى خالد عمله - دا اساسا لو كان عمل حاجة ولا مدمن ولا بتاع - مفيش انسان يستحق اللى حصله دا ابدا

    ردحذف
  5. @ Tears
    ومن مع العياط والنحيب إن أقل حاجة يجب أن تحدث هو إعدام تلك الغيلان المنتحلة صورة البشر برغم إني ضد الإعدام كحكم ولكن هذا أقل شئ ممكن لهم وبالطبع لا داعي لذكر إننا إذا كنا دولة محترمة وناس عندها دم لانتحر المسئول عن هذه الوزارة مثلما يحدث في بعض الدول أو ابسط شئ لاستقال

    ردحذف
  6. @ Kontiki
    نصف طريق حل المشكلة هو الاعتراف بالمشكلة جميع البشر عندهم ما يخشون عليه ولكن هناك وقت يجب علينا أن ننزع زداء الخوف والجبن جانبا وعندها يصنع الشعب التاريخ

    ردحذف
  7. @ the black pearl
    موضوعه شهود العيان ده فقع لي المرارة فعلا شعب واقف واتنين كلاب بيقتلوا واحد فعلا ونعم الإيجابية
    وأنا ضد التعميم بس الأكثرية بتغطي علي الأقلية زي ما في ناس متحركتش في ناس ممكن تتحرك لو في موقف مشابه وأكثرية الضباط والعسكر فاكرين نفسهم الهة ماشية علي الأرض علي عكس أقلية ممكن تضحي بحياتها في سبيل مواطن

    ردحذف
  8. حرام كسرخاطري

    ردحذف
  9. وش هذا ماعندهم ضمير الله ينتقم منهم يارب وينصر المظلومين

    ردحذف

خد راحتك في الجنان معنا حرية الرأي مكفولة للجميع حتي لو هتجنن علينا
نظرا لوجود مشاكل في نظام التعليقات لغير معرفين برجاء عدم التعليق بغير معرف منعا لاختفاء التعليقات