إذا كانوا هما نصابين إحنا مجانين.....(2)

لا تقرأ هذا البوست إذا كنت لسه واكل أو هتأكل

أو شارب أو لسه هتشرب

أو ضارب أو لسه هتضرب

أو ناوي تقعد في البلد دي فترة طويلة

أولسه مقررتش تهاجر بره

ღ♥ღ______ღ♥ღ___ღ♥ღ______♥ღ♥ღღ♥ღ______ღ♥ღ___ღ♥ღ______♥ღ♥ღ

بمناسبة شهر رمضان الكريم ولأن تخصصي في البيت قسم المشتريات الخارجية فبتفرج علي السلوك الاستهلاكي العجيب لفئات البشرية المختلفة وخاصة لما تدخل سوبر ماركت أو هايبر محترم ويكونوا منزلين عروض علي المنتجات وخاصة منتجات البقالة من جبن ولحوم هتلاقي ناس جايين يشتروا مش لأنهم محتاجين الحاجة دي فيشتروها هما بيشتروا علشان العرض عليها وطمعهم في توفير جنيه أو 2 جنيه مع إنه ممكن يوفر المبلغ كله وميشتريش الحاجة بس لأن شعب المصري في الوقت الحالي يتميز بحب عجيب لاستهلاك حتي لو جاب الحاجة دي و كان مصيرها بعد كده الزبالة فبيجري علي العروض دي فحبيت أوريكم النهارده بعض مظاهر الغش التجاري واللي ممكن تتدبس فيها وانت مش واخد بالك وابقي خدت ثواب فيك بالإضافة إني قرات بعض الهذيان علي كثير من المواقع عندما قررت الكتابة عن الغش التجاري.

 

ღ♥ღ______ღ♥ღ___ღ♥ღ______♥ღ♥ღღ♥ღ______ღ♥ღ___ღ♥ღ______♥ღ♥ღ

أعرف عدد من المصريين اللي سافروا بره ولما رجعوا مصر تاني بطلوا يشربوا مياه من الحنفية ويشربوا مياه معدنية ، لحبايبي دول خدوا الخبر ده لا يوجد في مصر مياه معدنية ، السؤال اللي بيطرح نفسه زجاجات المياه دي منين؟

أولا من مياه الحنفية اللي انت اتبطرت عليها ومش عايز تشرب منها ثانيا حاجة عقبال عندك كده اسمها الآبار الارتوازية وعلي حسب ما ذاكرة الواحد جايبة كده من دراسة المياه الجوفية إن هذه المياه عبارة عن طبقات مضغوطة تحت سطح الأرض بمسافات غير عميقة وغالبا بتكون هذه الطبقات تكونت من مياه أمطار اتسربت من سطح الأرض أو لوجود مصدر مياه قريب مثل بحيرة صغيرة فحدث تجمعات لمياه نتيجة لوجود فروق في الضغط طيب ايه مشكلة المياه دي؟

المياه بتكون قريبة جدا من سطح الأرض قد تستطيع الحصول علي مثل هذه الآبار بمجرد حفر الأرض او علي اعماق لا تتجاوز 10 متر بينما الآبار الأخرى قد تتجاوز 1000 متر مما يجعل هذه المياه عرضة لأنواع عديدة من التلوث نتيجة أي تسرب من سطح الأرض مثل المخلفات الصناعية للمصانع و أي مواد كيماوية أو قد تتخلط بمياه الصرف الصحي ومع استخدام هذه الشركات والمصانع مرشحات وفلاتر عادية مشابه لتلك التي تستخدم في البيوت فلن يحدث تعقيم وتطهير كافي للمياه.

وكان في دراسة من جهاز حماية المستهلك منذ فترة عن أنواع المياه الغير صالحة والصالحة وكانت نتائج هذه الدراسة أن التحاليل أثبتت عدم مطابقة نوعين من العبوات الصغيرة (لتر ونصف) لعدم استيفاء الشروط وتلويثها بميكروبات دقيقة وهي "الندى" و"شويبس" ، وتبين عدم صلاحية 4 أنواع عبوات كبيرة تزيد عن 5 جالون هي "أكواستون" و"نهل" و"أكوافينا" و"حياة" ، وأن هناك 6 أنواع صغيرة صالحة رغم عدم مطابقتها للبيانات المدونة على العبوات وهي "بركة" و"المنار" و"دلتا" و"حياة" و"أكوافينا" و"نهل" و"سوا"؛ وهناك أيضا 7 أنواع صغيرة مطابقة وصالحة وهي "أكوا" و"نستله" و"أكواسيوه" و"مينرال" و"داساني" و"سيوة" و"أكوافينا" مع نوع واحد من العبوات الكبيرة هو "نستله".

و هناك خبر غير مؤكد إن المياه الناتجة من شركات المشروبات الغازية هي عبارة عن تجميع لبخار المياه الناتج من عمليات صناعة المشروبات الغازية.

وبمناسبة مياه الشرب الناس اللي بتستخدم فلاتر لو بتستخدم فلاتر مرحلة واحدة  نصيحتي ليك اركن الفلتر علي جنب وابقي اغلي المياه واشربها بعد كده ،الفلتر الثلاثي وليس الثنائي هو الوحيد الذي يقوم فعلا بتطهير شبه كامل للمياه لكن بالطبع مش اي شخص يستطيع تحمل تكاليفه وخاصة تغيير الشمعات كل 3 أشهر لأنها شمعات مخصوصة  فثمن هذه الشمعات يقترب من ثمن الفلتر ذات نفسه وليست المضروبة ب10-15 جنيه الموجودة في السوق.

بعض المواقع الإخبارية التي تناولت هذا الموضوع

بيع الوهم في زجاجات المياه المعدنية

تلوث زجاجات المياه المعدنية

وهم اسمه.. المياه المعدنية

مستويات نقاء المياه في مصر أقل من المعايير الدولية

لو في حد لسه مش مستوعب خطورة الكلام اللي فوق ده ياريت يتفرج علي الفيديو ده والفيديو كفيل

إنك متكملش ياقي التدوينة لأن الغش اللي فوق ده خطورته أكثر من خطورة أي غش قادم

وبمناسبة المياه في برضه مياه غازية مغشوشة بس لأنها مش مهمة

ولأنك ممكن تبطل تشربها لكثرة اضراركثرة تناولها فسأكتفي بالخبر ده

ضبط مصنع لتصنيع المياه الغازية من مواد رديئة ومجهولة المصدر

ღ♥ღ______ღ♥ღ___ღ♥ღ______♥ღ♥ღღ♥ღ______ღ♥ღ___ღ♥ღ______♥ღ♥ღ

 أدخل السوبر ماركت او الهايبر المحترم اروح علي قسم البقالة كل مرة لازم الاقي نوعين من البشر الأول واحد لازم يتذوق كل أنواع الجبن أو أي كان نوع المشتريات اللي عايز يشتريها وبعد ما يطلع عين الراجل اللي واقف بتاع ربع ساعة ويعطل جمهورية البشر اللي وراه ومستنية دورها يسأله السؤال المشهور هو ايه اللي فيهم نزل في العرض ؟ والنوع ثاني مش بيتذوق يسال علي طول ايه اللي موجود في العرض وبعد كده ياخد من ربع لنص كيلو من كل صنف طب يا تري ايه السر وراء العروض الفظيعة دي؟

أول حاجة المحلات الكبيرة دي بتشتري كميات كبيرة من منتجات الأجبان واللانشون وهذه الأشياء ؛الناس بتنسي إن في صلاحية لهم تتراوح من 3 شهور إلى 6 شهور أوعام لبعض المنتجات ففي كثير من الأحيان تخزن هذه المنتجات بدون شراء لرغبة الناس لشراء نوع معين فتركن باقي المنتجات علي الرف حتي تقترب صلاحيتها من الانتهاء فيعملوا عرض في ثواني الحاجة تخلص ومش مشكلتهم لو الناس اشتريت الحاجة وركنتها وفسدت بعد ذلك العيب علي المستهلك اللي ملحقش يستهلك هذه المنتجات.

الجبن الرومي أشهر نوع جبن يتعمل عليه عرض كان زمان كان هو نوع واحد منتشر بس هو الجبن الرومي القديمة بس الحمد لله دلوقتي في جبن جديد وجبن وسط كمان الجبنة الرومي القديمة الكيلو تقريبا ب38 جنيه لما تلاقي عرض علي جبنة رومي الكيلو منها بحاجة وعشرين جنيه اعرف إنها جبنة جديدة معالجة كميائيا لتعطي نفس طعم الجبنة القديمة وغالبا هتلاقي عليها لون أخضر لو لقيت عليها هذا اللون رجعها واقول للراجل شكرا يا عمو مش عايز منها أما ما يشاع عن رش حمض هيدروكلوريك علي الجبنة بنسبة 30% وتركها 24 ساعة فهذا محض هراء لأن هذا الحمض سيسبب حالة تسمم لمن يأكل هذه الجبنة.

عندك بعد الجبنة الرومي الجبنة البيضا واللبن  وخالي بالك إن اللبن بيدخل في صناعة الجبن يعني مش محتاجين نغش الجبنة كفاية علينا إننا نغش اللبن  وهو بعد كده هيتحول لجبنة ولغش اللبن هناك عدد كبير من الإضافات المحترمة عندكم سماد يوريا وبوتاس وزهرة غسيل وبودرة سيراميك بس المشكلة إني مش عارف السيراميك يا تري فرز أول ولا تاني، حد يفتكر زمان  أيام ما كانت الناس بتزعل لما حد بيضيف مياه علي اللبن ، وفي أواخر الثمانينات و أوائل التسعينات لما ظهرت إضافة الفورمالين للحفظ اللبن شوية زيادةوكانت الريحة بتبقي واضحة فمكنتش بتشربه وتبطل تجيب من الراجل ده وبيتفضح فضيحة محترمة وكان موضوع الفورمالين فتحة خير علي مصانع الألبان، دلوقتي إحنا بنتحسر علي الأيام دي في الوقت الحالي ،طبعا حبايبي اللي هيفكروا بيشربوا لبن بودرة بدل اللبن السايب في خبر غير مؤكد إنه بيبقي فيه قمح أو دقيق أو نشا في بعض الأحيان بس  علي الأقل دي ممكن نعرفها فلو شاكك ممكن تحط نقط يود أو نقط من أي مطهر يحتوي علي يود في كوباية فيها شوية لبن قليلة لو ظهر لون أزرق يبقي يا جميل فيه دقيق أو نشا بس متقلقش يعني لو هربت من موضوع اللبن هتلبسه في الجبنة لا يوجد مفر يا حبيبي أما بالنسبة لجبن والألبان اللي في العلب فربنا يستر من المواد الحافظة والإضافات اللي بتضاف عليها،ولاداعي لتقليب المواجع بذكر اللبن المستورد المغشوش وكانوا ضحاياه أطفال أبرياء.

ولسه في قسم البقالة وبعدما خلصنا علي الجبنة واللبن ندخل علي اللانشون واللحوم الباردة لانشون ايه اللي ب10 جنيه الكيلو إذا كان أقل كيلو لحمة فيكي يا بلد ب45 جنيه ماليش دعوة بالمستورد اللي فيه دود وأنواع بكتيريا مضرة لإنسان ده إذا كان لسه هذه الفصيلة الحية المسماة إنسان موجودة عندنا في البلد ،تعالوا أشرح لكم المكونات المفروض تكون في اللانشون من المفترض 75% لحمة حمراء والباقي بيكون عبارة عن توابل علي دهون علي إضافات مثل نيتريت والنترات والكلام ده بنسب معينة لأن إخلال هذه النسب بيؤدي إلي الإضرار بصحة الإنسان وفي مقدمة هذه الأضرار السرطان ،طيب ايه اللي بيحصل علشان نحصل علي لانشون بهذا الثمن الرخيص اللي بيحصل إنهم بيقللوا أو بمعني أصح بيتعدم اللحم منها ويزودوا الدهون ومواد جيلاتينية بالإضافة إلي أجزاء اللحوم الغير صالحة للبيع أو المسماة سقط لحوم وبعض الأنواع بيضاف إليها عظام مطحونة وده بيحصل في الماركات الغير معروفة ومجهولة الهوية لأن لو في مصنع عمل كده بيتقفل في ساعتها ،كل هذه الأشياء ومعها الكثير من الإضافات يتم طحنها وفرمها لغاية لما تعمل عجينة اللانشون اللي بعد كده بتتصنع وبالهنا والشفا؛لا وكمان في حاجة مهمة إن ساعات الناس اللي واقفين علي المكن بيسبيوها شغالة يرجعوا يلاقوا فيران وحشرات اتفرمت مع العجينة العجيبة دي وهو في الآخر برضه بروتين حيواني، وقس علي هذا البسطرمة اللي بتباع ب30 جنيه والسجق والهمبورجر المضروب أو منتجات اللحوم عامة التي يشتريها الناس الغلابة والتي تكون سعرها أرخص من الطبيعي بنصف الثمن تقريبا.

المع ورنيش يا أستاذ،الورنيش المرة دي مش للجزمة ده للزيتون الأسود عقبال عندكم كده والزيتون المدهون ده هتلاقيه كده بينزل كمية سواد غير طبيعية وبيبهت أسود علي أي حاجة و بعدين ماله الزيتون الأخضر حبكت أسود يعني وفي طريقة آخري لمعرفة إذا كان الزيتون ده مغشوش ولا لأ وهي قلب الزيتونة لو كانت خضرا يبقي الزيتون مغشوش يا جميل وكل زيتونة وأنت طيب.

أنا شايف كده كفاية بقالة ونروح علي قسم تاني

ღ♥ღ______ღ♥ღ___ღ♥ღ______♥ღ♥ღღ♥ღ______ღ♥ღ___ღ♥ღ______♥ღ♥ღ

الشاي الشاي قبل ما أحبك كنت الشاي يا حبيبي ،الشاي بقي يا معلم بيتضاف عليه عيش بايت ناشف محروق أو ورنيش أو حبر وطبعا نشارة الخشب حد فاكر نكتة إن الناس جيت عليها فترة لقيت الشاي طعمه غريب علشان وقتها كانت نشارة الخشب أغلي من الشاي فبطلوا يحطوه علي الشاي ،الحمد لله الغش التجاري أفسد أذواق الناس فبقيت تفضل المغشوش علي الأصلي ،وكمان الشاي في بعض الأحيان بتلاقي معاه برادة حديد وده ناتج إن صاحب المصنع كسل ينظف الماكينة بعيد عنك.

مزارع الأسماك السمك هناك بياكل حاجة اسمها عليقة الأسماك ودي بتكون من القمح والشعير و نخالة القمح و غربلة المطاحن و الذرة و الأرز و مسحوق الحليب المجفف و مسحوق العظم و مخلفات المذابح من عظام ودماء ومكونات آخري ،المفروض إن نسبة مخلفات المذابح والكلام بتاع العظم والدم يكون أقل نسبة في الأكل بتاعهم بالرغم إن أكثرهم فائدة في تكبير ونمو الأسماك بس اللي بيحصل إن هذه الأشياء هي أكثر الأشياء في الطعام لدرجة جعلت ظهور وظيفة سمسار متخصص في شراء هذه المخلفات و طبعا أي حد شاف سمك المزارع بيندهش من حجمه الكبير مقارنة بالسمك العادي ولا داعي لذكر إن هذه المخلفات سبب نقل أمراض وبلاوي كثيرة للمستهلك الغلبان.

الخضروات والفواكه اللي أنت شاكك في أمرها دور علي بقع بيضاء عليها لو لقيت عليها دي بتكون بواقي هرمونات نمو اوعي تشتريها أو عليك بقي وعلي الأورجانيك وده الكيلو رخيص منه آخر مرة جبت منه كان نص كيلو الطماطم بعشرين جنيه والكلام ده كان من كام سنة معرفش دلوقتي أسعارهم بقت ايه.

طق طق ،تفتح الباب تلاقي واحد كده سعيد ومبتسم صباح الخير يا أفندم أنا مندوب شركة ….. حضرتك أنا معي حضرتك العرض العجيب التمام حضرتك طبعا عارف الشامبو ده ماركة عالمية محصلتش الشركة بتقدم لحضرتك عرض دعاية وإعلان محصلش ولا هيحصل ولا حضرتك ممكن تصدقه مش هقول لحضرتك شامبو وعليه واحد هدية لأ ده عليه اتنين هدية وخصم عشرين في الميه كمان ،حضرتك تحب تاخد كام زجاجة شامبو؟

أكيد اتعرضت للموقف ده قبل كده شاب أو شابة متحمسة غالبا شابة بتبسم ابتسامة بلهاء  ومعاهم شيلة محترمة وبيعرض عليك كارنيه مضروب متلحقش تشوف اسمه ولا صورته عليه بيتكلم بسرعة سبعتلاف كلمة في الدقيقة مع كمية حضرتك أزيد من كلامه عن العرض ذات نفسه وطبعا عرض يخليك تجيب بدل العلبة عشرة علب وخاصة إن سعر 3 علب أرخص من ثمن علبة واحدة بتشتريها انت من السوبر ماركت ،من غير كلام طبعا الحاجات دي مضروبة طيب السؤال بقي بيضربوا ازاي؟

حد عارف بواقي زيوت تحمير الطعمية والبطاطس والكلام ده ،ايوه الحاجات دي  بعملية فلترة وتنقية بدائية مع معالجة كيميائية بسيطة ممكن تتحول إلي صابون أو شامبو أو أي منظف والسلام وطبعا الزجاجات بتاعة الماركات العالمية بتجاب من الزبالة و بتباع عادي وحط ده جو ده والموضوع خلص وابقي قابلني لو عرفت تجيب المندوب الوهمي ده تاني .

وبمناسبة الحديث عن الزيت لو لقيت عربية في وسط الشارع عاملة عرض وبتقول 3 زجاجات زيت بسعر واحدة اعرف بقي إن الزيت ده مضروب وبيكون عبارة عن بواقي الزيت برضه بعد فلترته من الشوائب أو خليط من الزيت ده مع حلبة والكلام ده واقعة حقيقة حصلت لناس أعرفها.

محلات الحلويات جميعها تقريبا تستخدم السمن الصناعي المهدرج ومن يستخدم السمن البلدي أو الزبدة الصفرة قليل جدا وبالطبع أسعاره تدل عليه .

مخلفات المستشفيات يتم تجميعها وإعادة تدويرها بما هو مناسب لها فمنها ما قد يصلح لإعادة البيع مرة آخري والممر الضيق عند محطة الدمرادش خير دليل علي كلامي ومنها ما يذهب إلي مصانع البلاستيك وغيرها من المصانع ويعاد تدويرها وتذهب لأسواق مرة آخري في صورة منتجات عديدة بغض النظر عن الأمراض التي يمكن أن تنقلها.

شاهدوا آخر جزء من هذا الفيديو

وبمناسبة العيد حبايبي بتوع البني والمياه مفيش خمور في مصر غير في الأسواق الحرة والبارات وبتاعة البارات ساعات بتضرب برضه أم الخمور اللي انت بتجيبها من المحلات المنتشرة حافظ اسماءها أكترمن اسمك دي بتبقي عبارة عن كحول ومياه وشوية توابل علي شوية سكر  والراجل سايبها عنده فترةوعيش يا معلم ما أنت الكحول هيشتغل معاك وهتنسي اسمك ايه في الآخر والخمور الرخيصة اللي بتكون مصرية معتمدة علي الكحول أكتر ما بتكون معتمدة علي التخمير وطرق صناعة الخمر المعتادة يعني من الآخر احترم نفسك وبطل شرب خمر علشان هي مضروبة .

حبايبي بتوع الحشيش أكيد سيادتك بقت خبرة وعارف الحشيش الفستك وبيضاف عليه ايه بدء من اللبان والحنة وساعات بتبقي خلطة عطار مرشوش عليها كيميا وصباح الدماغ العالية ما انت كده كده في الآخر هتتسطل هتتسطل ومش فارقة معاك حاجة.

اعذروني لإطالة لكن هذه هي أهم مظاهر الغش التجاري في مصر وماخفي كان أعظم وكل ما سبق ذكره هو من تجارب شخصية لي أو لأشخاص أعرفهم أومن مصادر موثوق منها

ملاحظة صغيرة: البوست ده كان المفروض ينزل أول رمضان بس دور البرد اللي جالي خالني انسي البوست ده ويقعد جنب حبايبه وكويس إني افتكرته وإلا كان نزل رمضان اللي جاي وعليكم خير وكل سنة وإنتم طيبين

 

M.S.M.O

I.M.S.A

Share |