النساء عادة لما يشوفوا راجل ناجح ومحقق الشهرة يقولوا على طول ومن غير نقاش " وراء كل رجل عظيم امرأة "
طيب ودا على أي أساس ؟
على أساس إنهم اشتغلوا وتعبوا وأرهقوا مثلا ؟
ولا على أساس إنهم النجاح التام للرجل بقلة الطلبات والمصروف ؟
متهيألي إن وراء كل رجل عظيم ... كارثة أو مصيبة !!!
مفيش طبعا حد هيصدقني وليس مستبعدا أن تخرج جمعيات حقوق المرأة تطالب بضربي بالبلغ في ميدان عام – ما دا اللي شاطرة فيه الجمعيات تطالب بالحقوق من الغلابة – اه نسيت البلغ يعني جزمة امممم حذاء بالفصحى ..
سيبكم من دا كله خلينا وراء كل رجل عظيم .. الكارثة الخاصة بيه وعشان اثبت كلامي خلونا نجيب صفحات التاريخ ونشوف الكلام الصح من الخطأ ...
من العظماء اللي معانا على سبيل المثال يوليوس قيصر ...
طبعا الراجل معروف بقوته وجبروته وسيطرته على الإمبراطورية الرومانية وفي ظل قوته أحب فتاة الشرق " كليوباترا " ...
وكليوباترا دي امرأة جابت أجل قيصر بسبب حبه لها ، فتآمر عليه حلفاؤه وقتلوه ، دا حتى بروتس صديقه الوفي طعنه ، وبعد ما كان قيصر الإمبراطور الفاتح خدله غزتين واتكل على الله بسبب حبه لكليوباترا ...
والست كليوباترا موقفتش على كدا لأ دي كملت يا جماعة على أنطونيوس ، الراجل اللي خلف قيصر في حكم الإمبراطورية بعد تقسيمها بينه وبين أوكتافيوس ، الواضح إن وش كليوباترا شؤم على كل الرومان ، الست قلبها كان فاتح مزار للرومان بعد قيصر يدخل أنطونيو وبرضو عند معركة أكتيوم البحرية كان وشها وش السعد عليه ..
فبعد انتصارات انطونيو دخل أوكتافيوس وخلص على أنطونيو والباشا حصل ملكه السابق وبكدا الست كليوباترا خلصت على راجلين – وعلى فكرة بسبب كدا بقت سجاير نسبة لقضائها على البشر – ووراء كل رجل عظيم إيه كارثة أو مصيبة ...
وكمان شخصية حكمت العالم هو نابليون بونابرت ، الإمبراطور الفرنسي ، الراجل اللي مخسرش معركة منذ أن أصبح إمبراطورا ، وخرجت العبارة المشئومة تطارده " وراء كل رجل عظيم إمرأة " وكان وش جوزفين زي الفل عليه ، وخسر المعارك واحدة تلو الأخرى لغاية ما خسر آخر معاركه وحُكم عليه بالنفي في جزيرة معزولة عشان يموت هناك زي الفار دا كله بسبب إن وراء كل رجل عظيم ....... كارثة ..
وشخصية أخيرة من أجل تلك العبارة الجميلة " وراء كل رجل عظيم إمرأة "
أدولف هتلر
الراجل كان عازب وزي الفل لأ دا ميت فل واربعتاشر ، حارب العالم كله ، انجلتر ، فرنسا ، روسيا ، اختل آسيا وأفريقيا وأوروبا ، وكان بيعمل كل حاجة بمنتهى الحرية والإنسيابية ورمى كل المعاهدات وراء ظهره ، من البارباروسا ، ومعاهدات ألمانيا في الحرب العالمية الأولى ومكنش فيه حاجة فارقة معاه لغاية ما جه اليوم وقرر إنه يتجوز!!
كان نفسي أكون موجود في زمنه عشان أقوله انت اتجننت يا عم ، ما كنت بعقلك ، وكل اللي انت عملته دا هينهار لكن للأسف كان قبل ما اتولد ..
واتجوز هتلر ومفيش 48 ساعة من جوازه كل اللي بناه انهار وفي الآخر ضرب نفسه بالنار وهو محاصر زي الكلب في برلين ، كان وشها حلو أوي عليه ..
طبعا وراء كل رجل عظيم إمرأة ..
يعني من قيصر لأنطونيو ، لبونابرت ، لهتلر ، وراء كل واحد منهم حاجة كبيرة ، يحب يتجوز يخسر معاركه وحياته ويموت زي الحيوان ليه لإن وراء كل رجل عظيم امرأة ...
انا قلت الأمثال دي عشان دول ناس بتاعة حروب وفرض شخصية وما ينفعش يُقال عنهم عظماء لإن فعلا وراء كل رجل عظيم وناجح إمرأة مش مصيبة ولا كارثة ، بس عارفين ليه ؟
لإن من عادة العظماء وضع حافظة نقودهم في جيبهم الخلفي ..
فيا ترى عرفتوا السبب ؟؟
I.M.S.A
M.S.M.O
امممممممم
ردحذفجايب اسوأ امثلة ودول مش أعظم رجال
شوف أعظم خلق الله سيدنا محمد صلى الله عليه وسلم
شوف كان وراه إزاى إمرأة عظيمة بكل معنى الكلمة
إزاى وقفت معاه وساندته فى ظل تخلى قريش كلها عنه
وده مجرد مثال وفيه غيره مئات
ههههههههههههه
ردحذفخاف على نفسك بقى بعد البوست ده
بس زى ما فى الامثلة اللى انت قولتها فى كمان العكس
مثلا مثلا تسمع عن فنان رسام اسمه سلفادور دالى ؟
سمعت بقى عن زوجته جالا دالى ودورها فى حياته ؟
وغيرهم وغيرهم
زى ما فى كده فى بردو كده
تحية ليك
فعلا معاك حق ، بامارة ايه ؟ ده العكس هو اللى صحيح تماما و خصوصا فى مصرنا هذه فى عصرنا هذا و هو ان كل واحدة لازم تجيب داغ الراجل لحد ما تخلص عليه و هى فاكرة نفسها ملكة انجلترا، الغريب اننا مش فاهمين ان الموضوع اصلا بدا بحركة كانت من اصول الشياكة و اللديز فيرست و شغل الاتكيت الفرنساوى بس مش اكتر انما فى الخارج ما بيفكروش كده خالص، احنا اساتذة فى ترديد المصطلحات بمنتهى الجهل
ردحذفغير معروف :
ردحذفأعظم الخلق الرسولصلى الله عليه وسلم ولا استطيع أن انكر ذلك ..
لكن انا قلت إنهم ليسوا عظماء لانهم متخصصين بالحروب
لكن من عادة الرجل العظيم وضع محفظته في جيبه الخلفي
يا ترى عرفت المرأة تقف وراءه لماذا ؟
فينوس :
ردحذفمنورة البوست
بخصوص اخاف على نفسي ما تقلقيش
لكن دي الحقيقة
وسلفادور دالي اه كانت زوجته بتمثل جزء كبير من لوحاته
لكن دا ما يقولش إنها صاحبة الإبداع
تحياتي لكِ
المصري أفندي :
ردحذفمنورني دايما
ودايما بتسكتني بسعة إطلاعك وثقافتك
تحياتي لك
على فكرة البوست دا دليل ضدك مش عليك ، ليه بقى ، لان النجاح مش بييجى بالساهل ، يعنى لو الزوجة اسعدت زوجها وخلت عيشته سعيدة مش هيبقى عنده دافع يروح الشغل " عشان يهرب منها " ولا دافع انه يجيب فلوس " عشان يكفى مطالبها " ولا دافع انه يتطور ويشوف عقد عمل بره ويخلص " مش عشان يرتاح من زنها يعنى "
ردحذفوبعدين كل العظماء اللى قلت عليهم مكانوش هيتقال عليهم عظماء لولا انهم بقوا كده بسبب حياتهم الزوجية السعيييييييدة جدا ، دا كفاية كليوباترا بس ضيعت ملكين مرة واحدة ، وبعدين زوجة هتلر لازم تدخل التاريخ لانها السبب فى وقف حروبه ودمويته
دايما ظالمينا :(
كدا ويكون دليل ضدي
ردحذفحرام عليكي يا بلاك ...
ظالمينكم دا الحقيقة ابشع ..
لا عندك حق في موضوع الزن دا
يا رب انعم علينا بنعمة العزوبية وادمها نعمة ..
منورة البوست
وشكرا ع التعليق
صدقنى باراء زى دى
ردحذفنعمتك هتكون ابدية
مبروووووووووووووووووووووووووووووك
غير معروف :
ردحذفشكرا على رأيك
تحياتي