من الجيل الصاعد لمشربتش من نيلها ، يا عقلي لا تسأل !!!!

طبعا الأغاني عن البلد والجيش والحربية والوطن آخر روعة من حليم لشادية لفايزة أحمد ومن هم على تلك الشاكلة حتى وصلنا لشيرين عبد الوهاب وتامر حسني ونانسي عجرم ومن هم على تلك الشاكلة .

لكن بصراحة اللي يخلي الواحد يسأل طول الوقت الناس اللي غنت للوطن والجيش والحربية زمان ما دخلتش الجيش نهائي يعني حليم لا شاف الجيش ولا دخله ، وطبعا شادية وفايزة بما إنهن نساء لن يرون الجيش داخل مصر ، لكن كانوا بيغنوا لرفع الروح المعنوية وبث الحماس في نفوس الشعب بسبب الحروب اللي كانت البلد بتقوم بيها – من 1948 لـ 1973 م – وطبعا في ظل السنوات كان هناك الوحدة بين مصر وسوريا وحلم الوحدة والجيل الصاعد وقلوبنا معاك يا جمال – ما دا اللي في ايدينا قلوبنا معاك والجيل الصاعد تعالوا شوفوا جيل اليومين دول – والبلد كانت عايشة في الحماس والقوة والجري وراء الحلم – حلم بقالنا 60 سنة ولغاية دلوقتي معرفناش نحققه يا ترى ممكن يتحقق ؟ - وبعدها دخلنا النكسة واشتغل حليم زي النار من عدى النهار – ما كان لازم يعدي عشان نعرف إننا ضايعين وعايشين في الوهم لغاية دلوقتي – وطبعا في فترة الإستنزاف الكل اشتغل ولكن حليم كان اكتر واحد اشتغل – مع إن الراجل مدخلش جيش ولا اتفرج عليه فيديو لإن الفيديو مدخلش مصر في الوقت دا – وأيام النصر كانت الأغاني ايه على ودنه والكل غنى وفرح ورفع الحماسة وانتهت الحكاية بـ " معاهدة السلام "

وكل الكلام دا جميل وفي زمننا الكبير – زمن الألفية الحلوة – ظهر عم بدوي " تامر " وغنى هو والفريق القومي للأغاني للوطن الغالي وبين مدى حبه للوطن والجيش ومدى حبه لهذه البلد ، وطبعا بدوي باشا كان هربان من الجيش – يعني بتغني للبلد وانت هربان من تأدية الواجب ما دا المتاح في البلد – وبعده مفيش خطوتين غنى بلسم فاخر " هيثم شاكر " وقال ( ارمي حمولك عليا ) طيب يا عم بلسم أهي رمت ذرة من حمولها وسيادتك انت كمان طلعت هربان من الجيش طيب يا جماعة ما حد يغني للبلد دي ويكون فعلا يكون بيحبها وبيديها حقها ، ويكون مثال وقدوة للي بيقوله ولا إحنا بنقول كلام وننفذ غيره ..

يعني تامر وهيثم كانوا هربانين ، ولا كان فارق معاهم البلد ولا أي كلام قالوه ، وفجأة الكل وقف جنبهم وشاف إنهم مظلومين ، طب رموا نفسهم ليه وقالوا من الأول لو كنا بنحبها أو ارمي حمولك عليا ، وبصراحة الحب كان باين والحمول كويس إنها مرمية على ناس تانية ...

وفجأة ظهرت مجموعة المطربات وغنت للبلد وابتدت شيرين عبد الوهاب بـ " مشربتش من نيلها " – شربت وربنا يستر ومش هنجرب نشرب ونغني لها تاني يا شيري – وكان نفسي أعرف الست شيرين بعد ما غنت مشربتش من نيلها وبينت مدى حبها لمصر سافرت ليه الولايات المتحدة عشان تنجب هناك ؟ ما كان أولى بيها المستشفيات المصرية ولا إحنا زي القرع نمد لبره ، ولا انتِ كنتِ خايفة على نفسك ومش عايزة تقولي إن الطب في مصر فاشل – ما أكيد مكنتيش هتولدي في مستشفى حكومة – وبعدين ما هو مشرتبش من نيلها وجربت تغني لها ونسافر ناخد الجنسية للبنت من برة ، و ..

مشربتش من نيلها ؟ لا يا سيتي شربت لغاية ما ارتويت وطفحت كمان ولكن ما سافرتش الولايات المتحدة ولا يمكن نيل مصر مكنش عاجبك ففكرتي تشربي من المسيسبي!!!..

والست نانسي عجرم تغني وتقول لو سألتك انت مصري قولي إيه ؟

موزمبيقي مثلا ، ما أكيد هيرد ويقول مصري ما هو معاه الجنسية اللي بقت صعب إن واحد يثبت إنه حاصل عليها أصلا والحمد لله إنهم أعطوها لمن ولد لأم مصرية دون أب مصري ، طيب أفرضي مثلا إنه بنجلاديشي عايش في مصر ، وشكرا يا سيتي على شعورك للبلد لكن هو دا كلام يتقال للبلد اللي شهرتك ؟

اكيد لأ ، لكن أهي كانت هوجة والكل بيغني ومفيش مانع من مشاركة نانسي عجرم في الأغنية للوطن الأعظم وطني الأكبر ...

وكمان الست نانسي تقولك :

قولي مصري ابن مصري وكل مصري الله عليه ، طب يا سيتي شكراً ..

لكن لو انا مصري عايش في يوغوسلافيا هيبقى الله عليا ولا الكلام دا للي جوا مصر بس ؟؟؟

وطبعا غزال الشرق – ما هو كوكب الشرق ماتت – الست هيفاء وهبي بتغني 80 مليون ، كل واحد بيعبر عن حبه بطريقته وطبعا الست هيفاء بتعبر عن مشاعرها وحبها مش بالكلام ولكن بالحركات والأغنية الحمد لله نجحت عشان خاطر حركاتها مش كلماتها ..

بس بصراحة من الجيل الصاعد لمشربتش من نيلها تقول حاجة واحدة اللي حصل للكلام واللحن والشعور للبد وحبها بجد وبصراحة يخلي الواحد يقول :

يا عقلي لا تسأل ...

**************

* المقالة أيضا قديمة جدا ، لكن اردت ان اسخر على طريقة الغناء لمصر ، في الفترات الاخيرة ، ولكن اكثر اغاني لفتت انتباهي بعد ثورة يناير :

ازاي لمحمد منير ، وفين فلوسي ياه لابو الليف وخايف ليأتي يوم اسمع تامر حسني وهو بيرد على منير في اغنية ازاي ويقوله كدا هو ، ويرد على ابو الليف في اغنية فين فلوسي ياه ، ويقوله وانت مالك او فين اثباتك ؟

I.M.S.A

M.S.M.O

 

Share |