الأربعاء، مايو 18، 2011

يلا يا زنــديــــق يـــا ابــــن الـــــ ….

المكان : أحد الأماكن . …

الزمان : عدة أيام آخرهم بالأمس ..

الأشخاص : معيد بكلية تربية رياضية وخريج من نفس الكلية ..

معيد بكلية تربية أساسي …

دبلوم صنايع قسم اليكترونيات وقسم ثاني لا اعلمه …

الحدث كالآتي :

كنا بنتكلم عن الدولة وحالها وخصوصا ما يحدث في تلك الأيام من الأقاويل وأحداث امبابة وما يحدث بسبب الفتنة الطائفية وكالعادة جالس صامت ولكن ،، كيف اجلس صامتا ويجب علي أن اتحدث خصوصا لو الكلام لا يعجبني !!!!

بداية الكلام كانت عن السلفية وجهودها العظيم في فك الحصار المباركي على الشعب المصري – تقريبا الثورة مكنتش هتقوم لو السلفية مخرجوش مع الشباب وقالوا يسقط يسقط كل من يخرج ع الحاكم – .

القيت الكلام خلف اذني لأني لا اريد الدخول في نقاش عقيم وانا اعلم جيدا أنه لا يسمن ولا يغني من جوع ، ولكن وجه السؤال لي من معيد التربية الاساسي :

انت يا عم ايه رأيك في مجهودات محمد حسان ؟

رديت بكل هدوء :

مجهوداته في أي مجال ؟ لو الدين مبيحبش غير مذهبه واللي يخالفه يا كافر يا زنديق يا ملحد !! ، لو الاجتماعية مشتفتش ليه مشروع ياخد فيه الشباب يخليهم يشتغلوا بدل البطالة – والراجل معاه فلوس كويسة تعمل مشروع يعني – لو سياسية يا ريت ما نتكلمش لإنه شايف البلد في الفساد الدائم ..

نظرة وجوم انقلبت لغضب ثم صياح في وجهي :

انت ايه يا عم كافر ؟، ازاي تقول كدا عن شخصية زي الشيخ محمد حسان ؟، دا راجل نعل جذمته برقبة ناس امثال كل اللي زيك !!!

هززت رأسي وقلت :

ماشي يا سيدي بس معتقدش إنه نبي أو رسول ولا اعتقد إن الوحي الذي توقف بعد وفاة المعصوم قد عاد من جديد لينزل على حسان لإنه بشر .

عامة انتهى النقاش وبعد فترة جمعنا نقاش أخر بعدها بفترة ليست بالقصيرة وكان النقاش على النحو التالي :

تفتكر ممكن يكون فيه رئيس مسيحي للبلد ؟

أوبا السؤال جامد وانا ما اقدرش امسك نفسي عايز ارد بس ماسك نفسي عايز اعرف ارائهم اللي انا اصلا عارفها قبل كدا ..

المعيد التربوي :

انت عارف يعني ايه رئيس مسيحي يعني ولي الأمر مسيحي ..

المعيد الرياضي :

شوف بقى لما يطلبوا يكون ليهم كنيسة هيوافق على طول ولا لأ ..

الصنايع :

الرسول قال ان القوم اللي تؤمهم امرأة في الضياع ..

الصنايع التاني :

لا يولى اموركم واحد غير مسلم ..

خريج التربية الرياضية :

ايه رأيك يا اسلام توافق ان يمسك البلد واحد مسيحي او امرأة ؟؟

بيني وبين نفسي “ ما بلاش انا لساني ما بيساعدنيش اني اجامل وعارف اني هترن علقة في الاخر على طول لساني دا “ ..

والله يا جماعة انا من رأيي إن لو الرئيس دا هيوفر لي الأمن والأمان والرقي والرخاء والاستقرار واكون محقق كل اللي نفسي فيه ، انا موافق .

نظرة ليا من الكل منتظرة اني اوضح فخدت نفس وقلت :

يعني لو الرئيس دا مسيحي وهيوفر لي دا كله انا موافق ولو امرأة وهتوفر لي دا كله برضو موافق .. ( ليست موافقة على طريقة فتحي سرور ، اهو نفتكر الراجل بما انه خرج وهيقعد كل شوية يقول موافقة وحد يشد له فيشة الكهرباء اللي معلقة معاه دي ) .

نظرة الغضب المعتادة من الجميع ، مع سكوت كامل لمدة دقيقة حتى يستوعبوا الأمر الكلام على النحو التالي :

انت اتجننت ، احنا شاكين فيك أصلا إنك مسلم ، انت مسلم بطاقة ، ولا بتغير ع الدين ولا على اي حاجة اصلا ، انت ليبرالي هم الليبراليين كدا .

( يخرب بيتك يا شومان خربت دماغ الناس وخليتهم فاكرين الليبرالية ضياع )

حسيت إني بتهزأ بس مش بالذوق ، بس حبيت اخد المناقشة للآخر …

طب وضحوا لي اراءكم واوضح رأيي …

الهجوم الكاسح لا تعلم من يتحدث ومن لا يتحدث كله في نفس واحد وانت يدوبك تاخد نفسك :

عارف يعني ايه تولية الامارة لامرأة يعني الضياع ؟

بصيت لهم هو يعني إيه الامارة أو الولاية انت ما تعرفش إن فيه ولاية كبرى وولاية صغرى ، واحنا هنا في مصر تسمى ولاية صغرى ، لإننا لسنا خلافة كبرى لدول متحدة ..

دا غير إن هناك دولا اسلامية كانت تحكمها امرأة واثبتت نجاحا كبيرا ..

نظرة تخلفية تعني إني لا اقول أمرا حقيقيا ..

يعني مثلا الشيخة حسينة واجد في بنجلاديش وأمامها من المعارضة خالدة ضياء ، وفي باكستان كانت نصرت بوتو ومن بعدها بينازير بوتو ، دا غير الهند فيها انديرا غاندي حكمت وارتفعت بمقدار الهند ..

نظرة من الوجوم تقريبا عايزين يقولوا لي إيه دا وإزاي ، فقلت لهم كمان فيه أدلة ، لو المنصب شرفي ففي انجلترا مثلا مارجريت تاتشر حكمت كرئيسة وزراء وكانت المرأة الحديدية والملكة منصب شرفي ....

يعني المرأة تصلح لتولي الأمر وبعدين المنصب منصب اداري يعني مش منصب ديني ..

تغيير حديث بسرعة ريختر ، انت ممكن تقبل ان واحد مسيحي يمسك البلد ؟؟

نظرة تخلفية مني انا ، اي وجه الاختلاف انتم معترضين على تولي المرأة يعني ممكن توافقوا على تولي المرأة وما توافقوش على تولي المسيحي ؟

الموضوع نسبي يا جماعة انا بقول إن منصب الرئيس منصب اداري يعني أي فرد يستحق إنه يدير البلد ، وما اعتقدش إن الدستور لا يكفل الدين فقط للحكم ، بل يشترط فيه الوطنية والوفاء للوطن وعهده بالرقي والرفعة ، وليس لكونه مسلم او مسيحي ..

نظرة عميقة من الصنايع :

انت عارف لو مسيحي مسك هيطلبوا إنهم يبقى لهم كنايس واديرة والكلام دا . .

طب ما الطبيعي يكون لهم كنائس وأديرة ، وليهم الحق في ممارسة العبادة ..

الصنايع التاني :

انت عارف ممكن يطلبوا يهدموا مسجد والرئيس بتاعهم لو مسيحي هيوافق .

نظرت له :

انت محسسني ليه إنها حرب ، يا ابني ما هم عايشين معانا ، عمرك سمعت لهم انهم عايزين يهدوا مسجد ولا يقتلوا في كل فرد موجود .

خريج التربية :

يعني احنا اللي عايزين كدا ؟

انا مقلتش إننا عايزين كدا أو هم عايزين كدا ، الكل عارف إن فيه فريق من الناحيتين عايز يخربها وخلاص باسم الدين .

معيد التربية الاساسي :

انت عارف يعني إيه دفع جزية ؟

أوبا خرج الموضوع للجزية ، شكلي هودي نفسي في دوكة – محدش يعرفني معنى دوكة – .

لا والله معرفش يعني إيه جزية يا برنس ، مش دي اللي هم يدفعوها لما انت توفر لهم الأمن والأمان والحرية ، وإنك تحميهم في ظل دولتك ومحدش فيهم يدخل الجيش ويدافع عن الوطن اللي انت عايش فيه زيك زيهم ، انت فاهم النقطة دي ، هو بيدافع زيه زيك ، وبيحمي زيه زيك ، يبقى ملقش أي حق تطلب جزية ولا حتى خراج الأرض ( حتة كدا احتياطي قبل ما يدخل في موضوع الخراج ) ..

معيد التربية الاساسي :

انت ما تعرفش الآية اللي بتتكلم عن الجزية ؟

لا والله يا باشا ما اعرفش – معرفش ليه خبطت في دماغي شفت التايتانك لا والله ماشفته – ممكن تشرح ليا الآية ؟

نظر لي كأني كفرت ورد بهدوء وقال :

هشرحها بس لما انت تمشي لإنك قلت رأيك في المرأة والمسيحي دون أن تقول الله اعلم ، فمن قال لا اعلم قد افتى وانت قلت تعلم فبكدا انت متستحقش تعرف تفسير الآية !!!

اما الباقين فمنهم من قال اني متشدد لرأيي ، وإني لا اقبل برأي الأخرين ، واني متخلف ورجعي وعلماني ومسلم بطاقة – هم عرفوا منين – .

الأمر الذي جعلني اندهش هو حكمهم علي وعدم اعطائي النصيحة حتى وان لم تكن نصيحة !!!

وفي النهاية حصلت على لقب جاهل ، متخلف ، زنديق ولا اقبل رأي الاخرين ومتشدد لرأيي لذلك لا يناقشني احد ..

اصدقائي الاعزاء شكرا ولا ازال عند رأيي ما لم يقنعني احد بغيره لذلك ادافع عن رأيي ومعتقدي بمنتهى القوة لحين يقنعني احد إني على خطأ وقتها اعترف اني كنت مخطئا وابحث عن الصواب …

وإن كانت لا اعلم فتوى جيدة لماذا لا يقول بها كبار العلماء الذين تقولون عنهم علماء وتتبعونهم ؟؟

I.M.S.A

M.S.M.O

هناك 21 تعليقًا:

  1. لا تخاطب الاحمق فقد يختلف الناس فى التفريق بينكما
    :)

    ردحذف
  2. ههههه مقال جميل جدا والله
    بالنسبة للسلفية انا زهقت فعلا من الكلام فيها ، فى المنهج السلفى اكيد فيه الكويس والوحش ، والعالم الاسلامى كله مش هتلاقيه متفق على حاجة واحدة مستحيل ،صحيح ان معظم الشيوخ اللى ع الساحة الاعلامية حاليا حالهم ميئوس منه ، ومحتاجين ابادة ، لكن العيب مش فى المنهج نفسه العيب فى بعض المطبقين ليه .. محتاجين تطوير حبتين عشان يواجهوا العصر والفتاوى اللى فعلا محتاجينها حاليا مش فتاوى عصر الرسول ، وعشان يغيروا فكرة الناس عن التيارات الدينية
    اما عن تولى امرأة او مسيحى الرئاسة فدا فيه اختلاف فعلا ، يعنى دكتور سليم العوا وغيره من الشيوخ قالوا لا مانع من تولى مسيحى الرئاسة ، الاهم من ديانة الرئيس هو كيف سيحكم الرئيس واذا كان سيحكم بالقانون والعدل وبما يريده الشعب فما المانع ؟
    لكن فى الشعب فيه حسابات اخرى ، فيه مسيحيين لما بيوصلوا لمنصب ما بيبقى الموضوع كأنهم وصلوا منصب استغلال وبيدوا امتيازات للمسيحيين على اساس انهم مضطهدين والفكر دا .. المشكلة اننا بنشوف الحاجات دى فى المسيحيين بس ، لكن مش قادرين نصدق انها موجودة فى المسلمين كمان ، يعنى كون المسيحى مسيحى مش معناه انه اول ما يوصل لمنصب هيدى امتيازات للمسيحيين ، وبرضه مش عشان واحد مسلم وصل لنفس المنصب مش معناه انه هيبقى احسن واحد فى الدنيا .. لو القانون اتطبق ع الكل مش هتلاقى التخوف من الجانبين دا .. لان القانون كان لناس وناس لا
    وجميل جدا توضيح فكرة الجزية .. ناس كتير لسه بتطالب بتطبيق الجزية اذا اقمنا دولة اسلامية ، طب معنى كده نرجع بقى لشروط تطبيق الجزية الصح مش فلوس وخلاص هى

    وتولى امرأة رئاسة الجمهورية صعب جدا فى مصر ، لسبب بسيط ، ان مفيش سيدة مرشحة تصلح ، لان اغلب حوارات السيدات اللى بيطلعوا فى التلفزيون تنحصر فى موضوع اضطهاد الرجل للمرأة ونفس فكر المففور لها سوزان ثابت ، لو اتغير الفكر دا يبقى مفيش مانع ان سيدة تحكم مصر .. مرة تانية اذا كان الحكم بالقانون والعدل وبما يريده الشعب ميفرقش مين يحكم الاهم كيف يحكم
    البوست كله جميل فعلا .. وربنا معاك فى مناقشاتك :D

    ردحذف
  3. هههههههههههههه انا عارف ان اخر الحوار هيكون كده

    ردحذف
  4. الله يكون فى عونك اساسا انك دخلت فى الحوار ده

    ده السلفيين اساسا كانوا بيحرموا المظاهرات و الخروج على الحاكم حتى لو ظالم مادام مش كافر و بيرفضوا يطلعوا معانا عشان سيد بلال و اللى نزل فى مظاهرته كان كلهم شباب 6 ابريل على يساريين

    ردحذف
  5. للأمانة في كل موقف من مواقف الثورة كنت شايف سلفيين
    أقصد بالتعريف البسيط إنه راجل ملتحي و ست منقبة
    و الإصرار علي إقصائهم من الثورة ظلم و إنعدام حيادية

    ردحذف
  6. كون ان فيه سلفيين كانوا في الثورة فاللي متفرجش على الكليبات اللي مليانة ملتحين ومنتقبان بقى العيب فيه مش في السلفيين , اللهم الا اذا مر على 4 مليون في ميدان التحرير وشاف كارنيهاتهم ولقاهم مش سلفيين :)

    النقطة التانية , غريب اوي انك شايف ان بنجلاديش وباكستان من الدول المتقدمة , شجرة الدر حكمت مصر وكيلوباترا , شجرة الدر ماتت في غزوة غيرة حريم بالقباييب وكيلوباترا سلمت مصر تسليم اهالي للرومان بعد مغامرة غير محسوبة العواقب , اما بنجلاديش وباكستان فبصراحة انا مستعجب من رؤيتك ليهم كدول ناجحة وهي لم تكن دولة قوية الا في عهد ضياء الحق الجنرال الذي مات في غموض

    واتهامات الفساد اللي لاحقت زوج بناظير بووتو لا تعفي بوتو من مسئوليتها


    الهندمش استثنا كاحدى افقر دول العالم وخصوصا المقاطعة الجنوبية في كيرلا ولا انها بتعاني من حرب دايمة غير منتهية بعد احتلالها لكشمير و ولا اعرف امجازات انديرا سوى نسبتها للمهاتما غاندي

    تاتشر هي المرأة الوحيدة في تاريخ بريطانيا التي تولت هذا المنصب فهل نعتبر البريطانيين متخلفين لعدم تكرار التجربة وهل نعتبر امريكا اكثر تخلفا لانه لم يرد في تاريخها الكامل ان حكمت امرأة , حتى وصلت رغم حداثة عهدهم بالعنصرية الى اختيار امريكي ملون من اصول افريقية على امريطكية بيضاء , بل اذكرك ان امريكا لم يحكمها كاثوليكي غير انجيلي الا كيندي


    اما تولي مسيحي الولاية الصغرى ! فهل فعلا في عدم وجود الخلافة اصلا ووجوب السعي لارجاعها ان يتولى غير مسلم مصالح المسلمن العظمى
    ساقول لك ايه اقرئها براحتك

    يأيها الذين امنوا أطيعوا الله وأطيعوا الرسول وأولي الأمر منكم ) منكم يعيني من الذين امنوا

    احنا مش في حرب , ودي قضايا نظرية غير مقبولة مجتمعيا والتنظير ليها تضييع وقت وتصادم مع الواقع التاريخي لجميع الامم مش بس للمسلمين او المصريين

    ممكن تراجع نفسك وتنسى دبلوم الصنايع انه ممكن يكون صح ومعرفش يعبر عن رأيه

    ردحذف
  7. الكلام مع الناس ديه بيفكرني باعلان دريم لاند القديم ... تخيل نفسك جوه غساله ...هما كدة الكلام معاهم بيدور في دواير كتير وتبدأ من مكان مانتهيت وتخش من مطرح ما تطلع .... وبعد ما يفرهدوك يشتموك ...فأخلاقك وثقافتك تخليك ما ترديش ... لان الشتيمه لا تفيد ... يقوم خيالهم المريض يصورلهم انهم انتصروا
    MishMish

    ردحذف
  8. أهه اللى انت بتحكيه ده والنماذج اللى أقعدت معاها دى بقت بتمثل 70% من الشعب المصرى .. مش عارفة ليه ؟ ....يمكن هوه ده الاتجاه اللى وجهنا ليه حسنى مبارك ... نلغى العقل تماما .. نغمض عينيا ونمشى ورا أنصاف الشيوخ وأنصاف القساوسة .. وكل ما تتكلم بالعقل والمنطق يقولك قال تعالى ... وأى حد غير مسلم يبقى كافر واليبرالى كافر ... والعلمانى زنديق ... وهكذا
    كتر ألف خيرك انك كملت معاهم الحوار أساسا ...

    ردحذف
  9. واحد من الناس
    احسنت جدا

    ردحذف
  10. فقري :
    منور ، وشكرا ع النصيحة ..

    ردحذف
  11. بلاك بيرل :
    اعجبني ردك وان كنت اتفق في نقطة واختلف في الاخرى
    اتفق في ان لا يوجد مرشحة في الوقت الحالي تصلح للرئاسة واختلف ان عدم وجودها في الوقت الحالي ينفي ترشح المرأة دائما لهذا المنصب ..
    //
    تحياتي لك

    ردحذف
  12. غير معروف :
    تحياتي لك ع الوجود ومعرفة ما حدث قبل النهاية .
    //
    منور

    ردحذف
  13. تيرز :
    منورة البوست ومعروف عن السلفية وقياداتها انهم لهم فتاوي غريبة
    والمشكلة في جمهور المطبقين ..
    //
    تحياتي لكِ

    ردحذف
  14. ابراهيم :
    انا لم انكر ان هناك افرادا نزلوا ولكن على مسئوليتهم الشخصية وليس تمثيلا لا للاخوان ولا للسلفية ..
    ولكن جماعة الاخوان لم تشارك بصفة رسمية ومثلها السلفية وعدة احزاب اخرى وكلامي موجه للقيادات وليس للافراد .
    //
    تحياتي لك ومنور البوست

    ردحذف
  15. واحد من الناس :
    تحية طيبة على مناقشتك ، أولا شجر الدر لم تحكم مصر إلا ثلاثة أشهر وعدة أيام تقريبا واستطاعت ان تحرز نصرا تقدميا في التخطيط والتنسيق في خطوط المواجهة واستطاعت ان تتحكم عن طريق المماليك البحرية والبرجية ... ( راجع تلك النقطة من التاريخ )
    اما موتها على يد ام المنصور زوجة عز الدين ايبك فلم يكن وهي متولية الحكم بل وهي مجرد زوجة للسلطان عز الدين ايبك ..
    كليوباترا التي تتحدث عنها حسب معلوماتي هي كليوباترا السابعة ولك ان تبحث عن تاريخ كل من كليوباترا الثانية والخامسة وتاريخهم في الحكم ..
    //
    بخصوص تاريخ بنازير بوتو ، لك ان تعلم ان في فترة توليها الادارة تم حبس زوجها ولم تتدخل مستخدمة نفوذها كما انها كانت تتمتع بشعبية كبيرة في حزبه وفي ادارة البلاد وراجع احصائيات تولي بنازير بوتو الباكستان ..
    //
    بخصوص الشيخة حسينة راجع ايضا ما فعلته للبنجلاديش ، وانا لم اقل انهم دول عظمى ولكنهما قادرتين على مواجهة الازمات في الوقت الراهن وفي الوقت السابق ..
    //
    مارجريت تاتشر اثبتت قوتها في التاريخ الحديث وهذا يحسب لها تماما وعدم تولي امرأة الولايات المتحدة لا يعني انها متأخرة او متخلفة ولكن لم تسنح الفرصة او لم تتقدم امرأة بها المواصفات اللازمة لتولي الرئاسة .
    //
    واحد من الناس لم اقل ان اي امرأة تصلح لتولي الادارة ولكن من تتوفر فيها المقدرة على ادارة البلاد لان منصب رئيس الدولة هو منصب اداري من الدرجة الاولى وينتظر من لديه الكفاءة لادارته ..
    //
    ان قلنا ان لديك شركة او مصنع وفيها امرأة ولديها المقدرة على ادارة المصنع وتوفير النجاح والرقي والعدل والتوزيع الجيد هل ستتركها وتعتمد على كفاءات بالية ليس لها مقدرة على الادارة وتضعك في المؤخرة ام ستتمسك بها للادارة ؟؟
    //
    تحياتي لك ومنور البوست ..

    ردحذف
  16. مشمش :
    منور البوست ، ويعجبني رأيك وتشبيهك بشدة .
    //
    تحياتي لك

    ردحذف
  17. شيماء :
    هي دي المشكلة انهم بيمثلوا الاغلبية من الشعب المصري ..
    //
    تحياتي لكِ ومنورة البوست والمدونة

    ردحذف
  18. غير معروف :
    منور البوست وشكرا على رأيك

    ردحذف
  19. هههههههههههههههههههه زي العسل والله كل اللى بنقوله بتعرض له واول سؤال انتى علمانيه ولا مسيحية هههههههههههه فكرنا مختلف عن فكر الجهلاء طبيعي
    مونيش

    ردحذف
  20. مونيش :
    شكرا لكِ على المرور ومنورة المدونة
    //
    التقسيم الديني سيذهب بتلك البلد إلى مصير مجهول ..
    //
    تحياتي لكِ ومنورة المدونة

    ردحذف
  21. انا من وجهة نظرى واحد من الناس مقنع اكتر وان كان لى بعض التحفظات

    ردحذف

خد راحتك في الجنان معنا حرية الرأي مكفولة للجميع حتي لو هتجنن علينا
نظرا لوجود مشاكل في نظام التعليقات لغير معرفين برجاء عدم التعليق بغير معرف منعا لاختفاء التعليقات