الخميس، مايو 26، 2011

إزاي وامتى أو امتى وإزاي ؟؟ بتفرق كتير

إزاي وامتى أو امتى وإزاي ؟؟؟

دي ادوات الاستفهام اللي بتسبق أي سؤال يكون في حياتنا اليومية ، لكن هناك فرق بين اللي بيفكروا في حياتهم بكرة ؟؟

وبين اللي بيفكروا في حياتهم النهاردا ؟؟

اللي بيفكروا في حياتهم بكرة دايما بتبقى اداة الاستفهام هي ازاي ؟

لكن اللي بيفكروا في حياتهم النهاردا دايما بتبقى اداة الاستفهام هي امتى ؟

واكبر دليل على التفرقة دي هو الشعب العربي على وجه الخصوص ، والشعب الأوروبي والامريكي ولن اقول الاسرائيلي أيضا ..

يعني ايه ؟

بسيطة جدا الشعب العربي كله بيفكر في حياته بطريقة اليوم الواحد يعني بتسبق حياته اداة الاستفهام امتى ؟ قبل كل سؤال ...

تعالوا نطبق ونشوف ولو غلطان حد يغلطني ولو صح حد يقولي انت صح ...

الشعب العربي عامةً في تفكيره كله يقولك :

امتى فلان دا يمشي ؟

امتى الفلوس المنهوبة ترجع ؟

امتى الظلم ينتهي ؟

امتى نتقدم ؟

امتى نحقق الحلم ونبقى دول عظمى ؟

امتى نكون احسن ناس ؟

امتى وامتى وامتى لغاية ما زهقنا من اداة امتى دي !!!

لكن الشعوب اللي بتفكر في بكرة بتفكر بالاداة إزاي ؟؟

خد عندك مثلا الشعب الامريكي او الاسرائيلي – بما انهم الاعداء الدائمين لينا – الشعب دا بيفكر بالطريقة دي :

إزاي ندمر اللي ادامنا ؟

إزاي نكون دول متقدمة اكثر من الكل ؟

إزاي نخلص على الظلم اللي بيحيط بينا ؟

إزاي نشوف بكرة لأولادنا ؟

إزاي نخترق الفضاء ؟

إزاي نكون أقوى دول في العالم ؟

وبكدا يتضح الفرق بين الدول العربية والدول الأخرى ، الفرق بين امتى وإزاي واقف على حاجات كتير مثلا ...

امتى دي بتديك الطريقة انك تسيب الامور كلها لغاية ما ييجي حد غيرك يحلها ، وبعد ما يحلها تستفيد انت ومثال عندنا في مصر .

امتى نظام حسني يغور ؟

مكنش هيغور غير لما ناس معينة طبقت نظام إزاي – مش بتاعة محمد منير – ولما طبقوا نظام ازاي خططوا لبكرة فخلوه يمشي ، ووقتها رجع الناس لنظام امتى عشان يشوف يومه هيكون ظروفه ايه ؟؟

امتى الفلوس المنهوبة ترجع ؟

يا ترى لو قلنا امتى يبقى قصدنا هترجع النهاردا ولا بكرة ولكن لو قلنا ازاي ترججع هنبص ونشوف الطرق كلها اللي تخلي الواحد يفكر بكل طريقة انه يرجع الفلوس دي ويشوف الحلول المناسبة عشان فلوسنا ما تضعش نهائي ونقدر نرجعها ..

امتى تنتهي المحاكمات والناس دي تاخد جزاءها ؟

برضو نظام امتى اللي بيخلينا نفكر في حاجات معينة امتى المحاكمة تخلص النهاردا عشان نارنا تبرد او حتى يضحكوا علينا ، ومجاش في دماغنا ولو لثانية نظام ازاي ، عن طريق محاكمات عادلة والحكم يكون واضح وصريح من غير تأجيل والكلام العبيط اللي بيحصل دايما ..

امتى الحياة ترجع زي ما كانت ونبقى دول متقدمة زي ما بنحلم ؟

هو نفس نظام امتى ، منتظرين الفرج دون تقديم الحلول بنظام ازاي ؟؟ ، الحل اننا نخطط لمستقبلنا وعودة الحياة بدل الطريقة اللي بتحصل دي لازم نفكر بنظام ازاي عشان نتقدم ويبقى عندنا رقي ..

النظام السابق علمنا نظام امتى وبقينا متواكلين عليه جدا ، لم يعد لدينا فكرة نظام ازاي عشان يبقى فيه تخطيط وووو ..

لا لازم نظام امتى واداة الاستفهام العقيمة اللي بتسبق الحياة عندنا ، واللي الغرب بينفذها في اخر مراحل التخطيط مش في بدايته ..

خد عندك مثلا حين يخططوا لرحلة عادية – سافاري مثلا – يبدأ الأمور ع النحو التالي :

ازاي الرحلة دي هتطلع ؟

يعني هنعمل ايه ؟ ، الأماكن اللي هنزورها ؟ ، البرنامج ؟ تكلفتها كام ؟

وفي النهاية بعد ما يوفروا كل دا يدوروا ع الميعاد المناسب ويقولوا امتى ؟

ويدوروا ويشوفوا انسب المواعيد ..

لو عكسنا الامر عندنا في الدول العربية خد عندك أول سؤال هتسأله :

امتى الرحلة هتطلع ؟

مهما كان من غير ما تسأل عن التكاليف ، أو البرنامج أو المسئول ، لأ دا كله بتركنه وتسأل على طول امتى ؟

نظام امتى اللي ارتبط بينا منذ بدء الخليقة وفي نفوس المواطن المصري والعربي يجب أن يتغير يجب أن يذهب إلى الجحيم علينا أن نتعلم شيئا واحدا أن نظام السؤال باداة الاستفهام امتى يأتي في النهاية مش في البداية ..

وقتها بس هنبقى دول متقدمة لإننا هنخطط ونرجع لمجال التخطيط اللي احنا ما بقيناش نعرف عنه ولو واحد على عشرة ، ووقتها مش هننتظر نرجع فلوس منهوبة ولا نحاكم فاسدين ولا ترجع الحياة للاستقرار ..

لكن هنخطط عشان نعمل دا كله بطريقة ازاي ..

الناس تطبق الفكر الترتيبي وليس الفكر المفاجئ او بمعنى اصح نظام لازم يكون دلوقتي ؟

لازم تفكر ازاي تنفذ كل حاجة انت عايزها وبعد كدا تيجي اداة امتى ونبطل نحط اداة امتى قبل كل حاجة بنفكر فيها ...

هو دا الفرق بين نظام السؤال بامتى ونظام السؤال بإزاي ..

وبين امتى وازاي فروق كتير اوي يا ريت نعرفها ونستفيد منها ..

 

I.M.S.A

M.S.M.O

هناك 10 تعليقات:

  1. ياااااااااااه ....ده امتى طلعت مختلفه خالص عن ازاى !!!

    تصدق عندك صح ..الاول حستها فكره غريبه لكن مع الكلام حسيت بالاقتناع

    امتى دى بقت مرادف "ياريت" ...و ازاى مرادف "يلا"

    ردحذف
  2. ربنا يطلعك علىخير يا اسلام وسلامى لمحمد انا اللى قابلتك فى القطر

    ردحذف
  3. ده ايه العقل ده ده انت ملك على الاخر

    ردحذف
  4. جميل جدا البوست دا والاهم انه جديد :)
    ازاى لو اتعملت صح بتحط جدول زمنى لامتى ..
    ...
    eng_mahy

    ردحذف
  5. د/ دودي :
    تحياتي لكِ على ادراكك للفكرة
    منورة البوست ..

    ردحذف
  6. غير معروف :
    ربنا يخلي حضرتك ، وشكرا ع الدعاء
    واخيرا خلصنا جيش الحمد لله ..
    والسلام يوصل إن شاء الله
    منورنا دايما ..

    ردحذف
  7. محمد توفيق :
    اشكرك على هذا الاطراء . .
    تحياتي لك ومنور البوست

    ردحذف
  8. مهندسة ماهي :
    منورة البوست ويسعدني تعليقك

    ردحذف
  9. أبوجهادالمصرى3 يونيو، 2011 2:00 ص

    ياللى بدعتوا العقل وقلتم عليه جنان
    كلامكم العاقل خلانى آخر جنان
    فكركم عقل العاقلين
    طب قلتولنا ليه ………كلام مجانين

    ردحذف
  10. أبو جهاد المصرى3 يونيو، 2011 2:03 ص

    مبروك يا أسلام خروجك أنا اللى قابلته فى القطر حبيت أقلك أنى جيتلك المدونه وتحياتى لك ولمحمد

    ردحذف

خد راحتك في الجنان معنا حرية الرأي مكفولة للجميع حتي لو هتجنن علينا
نظرا لوجود مشاكل في نظام التعليقات لغير معرفين برجاء عدم التعليق بغير معرف منعا لاختفاء التعليقات