الأسانسير مصري يا باشامهندس

بما إن الواحد من أهل القمة وساكن في الدور العاشر  فطبعا لازم يستخدم الاختراع العبقري المسمي أسانسير وإلا كان الحال غير الحال وكان الواحد فقد وزنه إذا لم يختفي كليا نتيجة صعود السلالم بس الأسانسير في العمارة المصرية مختلف عن أي أسانسير في أي مكان تاني ؛فهعرض عليكم بعض النماذج في كيفية تعامل الفرد المصري مع الاسانسير في عمارة مصرية.

1)- واقف إنت قدام الأسانسير واحد تاني يجي يدوس علي الزرار برغم إنه شايف إنه طالع وإنك دست قبله علي الزرار وياسلام بقي كمان لما يقعد يدوس علي الزرار أكتر من مرة برغم إن النور منور والأسانسير طالع عايز افهم كده الأسانسير هيطلع أسرع يعني .

2)- حبايبي اللي بيصحوا الصبح وقبل ما يغسلوا سنانهم يرمي السيجارة في بقه ويروح طالع علي الأسانير ويقعد يدخن براحته أبوس ايديك إنت مش خرمان أوي لدرجة إن الدقيقة دي هتفرق معاك يا تخلص سيجارتك قبل ما تركب يا تولعها بعد ما تطلع كفاية إننا هنستحمل ريحتك وبعدين في اختراع اسمه شفاط ياريت تشغله طالما قفلت معاك اوي ودخت وانت في الاسانسير بس علشان الواحد يدخل ميلاقيش ريحة كلب ميت جو الأسانسير.

3)- نوع آخر غريب من البشر لازم يقفل باب الأسانسير بكل قوة لدرجة إني بحس إن الباب هيتخلع في ايديه علي فكرة لو قفلت براحة محدش هيقول عليك إنك شاب سيس.

4)- سيدات أهالي العمارة الكرام محبكتش شرح طريقة عمل المحشي وواحدة فيكم في الأسانسير والتانية علي باب شقتها والأزواج الحلوين الجمال مش لازم تحبوا بعض أمام الأسانسير ومعلقين الأسانسير الرومانسية مش مقطعة بعضها.

5)- أيها الشعب الأنتوخ صدقني مش هتخسر كتير لو مشيت كام متر زيادة وحطيت الزبالة في صندوق الزبالة اللي علي السلم بدل ما تحط الزبالة في الأسانسير علشان أول واحد يشوفها يتكرم ويرميها لسيادتك.

6)- الشخص اللي بيخبط علي باب الأسانسير وأنا طالع فيه حد قالك إنه ميكروباص هقف واركبك واخدك معاي في السكة.

7)- أطفال أهل العمارة الكرام الأسانسير مش معمول علشان تلعبوا استغماية ولا ثبت.

8)- أيها الشخص المهم صدقني النصف الدقيقة اللي سيادتك هتستنها علشان الاسانسير يطلع لك مش مهمة أوي لدرجة إنك تعلق الأسانسير في الدور عندك وخاصة لما يكون الأسانسير التاني عطلان وسيادتك معلق لي الأسانسير في الدور التاسع فأكون مجبر إني اطلع عشر أدوار علي رجلي وأنا شايل الشيلة التمام.

9)- من أكثر الأمور الغريبة التي تعرضت لها هي عندما أكون أمام الأسانسير فتدخل واحدة من ساكنات العمارة أنا أعلم إنها جارتي  وهي تعلم إني جار لها ،ومن المفترض أن تركب معي الأسانسير ترفض أن تركب معي الأسانسير  مع إني والله بطلت أكل لحم بشر من زمان بس ما علينا ،لا أريد أن أقول أن منهم أقاربي أو أن الفرق العمري بيني وبين من ترفض الركوب معي يتجاوز العشر سنوات زيادة أو نقصان ولكنه ادعاء الاحترام و الشكل الخارجي الذي أصبح  يهم هذا الشعب المريض،علي فكرة الأناث اللي بتيجي من بره العمارة بيطلعوا معي في الأسانسير عادي ومش بأكلهم والله في السكة.

10)- حد فاكر أيام أول ما مترو الأنفاق اتعمل وروح صفر في ركن بعيد يا حبيبي واقعة حقيقة حصلت عندي في الأسانسير لآسف.

النقط العشرة السابقة  كانت أهم حاجات شفتها ولفتت انتباهي في تعامل الشعب المصري مع الأسانسير بالرغم إني من المفترض إني أحيا في منطقة جميلة وسكانها من الطبقة المتوسطة أو الطبقة الراقية ولكنه انحدار عام في الأخلاق الاجتماعية بين جميع طبقات المجتمع بدون استثناء وفي كل مرة أري أمر من هذه الأمور أو غير دائما أقول في سري الأسانسير مصري يا باشامهندس. 

 

M.S.M.O

I.M.S.A

 

Share |