الجمعة، أكتوبر 01، 2010

مراتي عندها نسيان

كلما يتخيل الفرد حياته الزوجية وما تحمله من سعادة ؟؟؟!!!!
" هذا بالفعل ما يضحك فأي سعادة تكون متمثلة في طلباتها التي لا تنتهي أو وجود ذاك الكائن الهلامي ... "
( هي الريحة يا كريمة .. { محمود عبد العزيز فيلم الشقة من حق الزوجة } )
اتخيل أقصى ما اتخيل هو أن تكون الزوجة مريضة بداء فقدان الذاكرة المؤقت أو على الأقل النسيان لكن ما توصلش لدرجة الزهايمر - لازم أكون رحيم بزوجتي برضو لإني مرهف الحس - وإن فكرت في الأمر دا فيكون هناك مترتبات على هذا الأمر منها :
مراتي عندها نسيان :
يا ريت هتنسى إني كنت في البيت آخر مرة إمتى ؟ ولا هتسأل كل مرة انت كنت فين ؟ ومع مين ؟ وسبب التأخير ؟
وبكدا اكون اتخلصت من الرغي ودور وكيل النيابة اللي بتحب المدام إنها تلعبه ....
مراتي عندها نسيان :
هتنسى تنقل كل حاجة للمصونة حماتي وبكدا اتخلص من تدخل الولايات المتحدة في شئون الشرق الأوسط قصدي من تدخل الظالم في حق المظلوم يووه قصدي اتنخلص من تدخل الكائن الهلامي في حياتي الشخصية والعائلية ..
مراتي عندها نسيان :
هتنسى أي شخص بيوقع بيني وبينها ولا هتفتكر اسمه ولا قالها ايه وبكدا اعيش حياة جيدة من غير ما تكون مراتي ودانية ورامية ودنها هنا وهناك وتسمع لدا ولدي وأكون انا مرتاح البال ..
مراتي عندها نسيان :
كل ست في الدنيا بترغي لإنها بتفتكر حاجات كتير ولكن بما إن مراتي عندها نسيان فلا هتفتكر يعني إيه كلام ولا هتفتكر يعني إيه رغي ومش بعيد ما تفتكرش حماتي لكن يا خوفي ما تفتكرش غير إنها تنكد عليا - أصل النكد دا طبع في الزوجة وليس ذاكرة - .
مراتي عندها نسيان :
مع كل يوم هتنسى أكلنا إيه وشربنا إيه ومتفتكرش أي حاجة وممكن أخليها صائمة طول الوقت وتنسى تأكل وبكدا أوفر في فلوس الأكل والشرب - أصل المحشي والكشري مكلف حتى أسألوا أبو طارق وكيلو الطماطم أصبح غالي وطبعا الوجبة عندها مكلفة جدا مثل أي زوجة لا هتفرق عربية ولا توك توك -
مراتي عندها نسيان :
هتنسى إني أصلا متجوزها وممكن ما تسألنيش لكن يا خوفي ادخل عليها تقوم مصرخة وتقولي :
انت مين يا عم انت وبتعمل إيه هنا ومش بعيد تلم الجيران وتلبسني قضية تحرش و إغتصاب لكن هرجع واحمد ربنا إن عقد الزواج معايا ..
مراتي عندها نسيان :
الخوف كل الخوف لا تنسى مثلا إنها مخلفة وتضع الولد أو البنت في الغسالة أو البوتاجاز أو تنساه في الشارع ووقتها هفقد الواد أو البنت يمكن دا أه يريحني من عبء المصاريف في المستقبل ..
( دروس لإن الواد فاشل في الدراسة ، مدارس على أساس إنها صالحة للعلم ، تعليم ببلاش مجاني محدش ينكر ، عاطل بالوراثة ، والأنيل يا بابا أنا عايز اتنيل واتجوز على طول هرد واقوله اتوكس )
مراتي عندها نسيان :
تكون حامل وبطنها قدامها مترين وأصحى من النوم ألاقيها قررت تكون في حجم أنجلينا جولي ( طبعا هي في حجم تاني من كتر حش المحشي والكشري والباذنجان أبو ثوم ) وتقولي عايزة أكون رفيعة ووقتها تجهض الطفل ومش بعيد تفتكر حاجة واحدة إني أكون طلبت منها كدا ...
{ أفلام مصرية قديمة وعقيمة لازم تتخلصي من الجنين ليه على أساس إني متجوز سري ولا مخبي عليها إني متجوزها }
مراتي عندها نسيان :
يا ريت تبقى مراتي عندها نسيان لكن يا خوفي لا تنسى حاجاتي بتتحط فين أو تنسى تشوف اكلي وشربي وغسيلي وألاقي نفسي عايش متجوز لكن مسئول عني وعنها ، أه هكون سعيد لأني هفضل شبه عازب لكن مسئولية اتنين فيهم حد عالة بتكون حاجة صعبة ..
مراتي عندها نسيان :
الكل يتمنى كدا لكن انا هتمنى حاجة تانية إني افضل عازب بدل ما اتخيل هيكون مستقبلي إيه معاها لإن مفيش أفضل من حياة العزوبية لإني هكون في شقة لوحديا وهكون مسئول عن نفسي ومفيش حد ينغص عليا حياتي لا حماتي ولا مراتي ولو اتنيلت واتجوزت هتمنى يكون عندي نسيان حتى انسى ذلك الخطأ الذي سأرتكبه في حق البشرية قبل نفسي
I.M.S.A
M.S.M.O

هناك 19 تعليقًا:

  1. :) يالها من افكار حول حياة الرباط المقدس !!

    ردحذف
  2. ح اخد كلامك ده باعتبار ان كله هزار بس

    ردحذف
  3. طيب ليه حرام الولية كانت عملت ايه؟؟

    ردحذف
  4. بعدين ممكن تنساك انت كمان و ماتدخلكش البيت

    ردحذف
  5. تحفه جدا النوت دى موتتنى من الضحك
    بس مش كل الستات كده
    وخللى بالك ساعات الراجل هو اللى بيطلب من مراته حاجات وهو نفسه اقرع وبكرش هههههه
    سورى
    بس بجد نوت حلوه

    ردحذف
  6. ههههههه احلى ما فى الموضوع انها تنسى انت مين


    بوست ظريف

    ردحذف
  7. kontiki :
    منورة البوست
    وافكار الرباط المقدس غير تلك
    دي افكار حول الزواج العربي والمصري ...

    ردحذف
  8. tears :
    مشيها هزار
    منورة البوست
    مع ان الكلام مماثل للحقيقة

    ردحذف
  9. askarnotak :
    بالتأكيد لديها نسيان ومن الممكن ان تنساني
    ولكن لن تستطيع أن تنسى أن تنكد عليا
    لان النكد طبع وليس ذاكرة ...
    البوست منور

    ردحذف
  10. ريهام :
    منورة البوست ويسعدني
    انه نال اعجابك
    وعلى فكرة الراجل بكرش واقرع
    لكن معندوش نسيان
    ويمكن الحاجة اللي ينساها انه يتجوز من الاساس
    منورة مرة تانية

    ردحذف
  11. ms venus :
    يسعدني ان البوست نال اعجابك
    منورة المدونة
    ويا ريتها تنساني

    ردحذف
  12. من دون شك الى هتتخبط فعقلها وترضى بالكاتب
    لازم تنساه
    لانه مجنون
    مين متحبش تنسى انها ارتبطت بمجنون

    ردحذف
  13. غير معروف :
    دا لو الكاتب فكر انه يرتبط ....
    منور البوست

    ردحذف
  14. taib leh ma t2olesh en el el ragel 3ando nesyan w nasy eno metgawez w yobs bara wala

    ردحذف
  15. غير معروف :
    الستات عندها زهايمر اكتر من الرجالة ..
    ويا ريته كان نسي وما اتجوزش
    لكن هنعمل ايه
    ممكن ينسى انه عايز يتجوز

    ردحذف
  16. الراجل مش بيعجبه العجب ولا الصيام فى رجب
    لو ست سالت يزهق منها ويتمنى انها تنسى
    ولو مسالتش يقول دى مطنشانى
    تعمل هى ايه يعنى
    والراجل من غير الست مش هيعرف يعمل حاجةلان هى قايمة بواجبات البيت كلها
    بس البوست دى حلوة اوى ودمها خفيف

    ردحذف
  17. غير معروف :
    منورة البوست
    والست شايلة البيت
    " دا على اي أساس "
    ويا ريتها تطنش اهو الواحد يستريح من الزن
    بس بصراحة الست النكد في طبعها
    وعلى رأي كريم عبد العزيز
    " بصي يا سلوى إنتي لو ألحيتي عليه زي أي ست مصرية أصيلة
    هيبوس ايدك عشان ترجعي مصر " ( ولاد العم )

    ردحذف
  18. ههههههههههه فكرتك عن الزوجة مثالية جدا بصراحة :D
    مع انهم مساكين دايما ، الرغى دا طبيعة نسائية بحتة ، لسبب بسيط : انها بتفرغ كل شحناتها العاطفية والعصبية بالرغى دا ، لكن الراجل مش بيحتاج لانه غالبا بيكتم مشاعره ، بس الحقيقة الزن والنكد دى حاجات تشل فعلا " بس نادرة جدا فى البنات :D"
    شكرا على البوست الظريف

    ردحذف
  19. ههههههههه
    دائما مثالية يا بلاك ...
    يمكن مساكين في بعض الحالات
    والرغي دا موجود في كل أنثى
    ونفكر في حكاية نادر دي !!!!
    منورة البوست ..

    ردحذف

خد راحتك في الجنان معنا حرية الرأي مكفولة للجميع حتي لو هتجنن علينا
نظرا لوجود مشاكل في نظام التعليقات لغير معرفين برجاء عدم التعليق بغير معرف منعا لاختفاء التعليقات