الأحد، أكتوبر 17، 2010

أصل كله صيني يا باشا ....


بعد أن انتهت الحرب العالمية عام 1945 م بإنتصار الحلفاء على المحور تطلعت اليابان التي خسرت الحرب في أن تكون دولة متقدمة ذات تقنية عالية وبالفعل نجحت في هذا ومع مطلع الألفية الجددة كان الكيان الشيوعي الإشتراكي قد إنهار وانتقل إلى أكبر تجمع للشيوعية في العالم " الصين " .
الصين تلك الدولة البالغ عدد سكانها مليارا وما يقارب من نصف المليار ، وأصبحت الصين تسعى أيضا للتطور والرقي ولقد أجادت هذا على إمتداد السنوات الماضية ، وإن كانت لم تغزُ العالم عسكريا فلقد غزته إقتصاديا وصناعيا و.. بشريا . .
انت لم تخطئ الكلمة فالصين لم تترك حرفة أو صناعة أو تجارة إلا ودخلت فيها بكامل ثقلها واثبتت جدارتها وقوتها فمن الأجهزة التقنية ، للكهربائية ، للمعدات الثقيلة والخفيفة ، للأسلحة وحتى وصلت لإستصلاح الأراضي في السودان وبقي دول أفريقيا وغيرها الكثير ...
هذا إلى جانب العمال الصينين الذين غزا العالم كله ، فعندنا في مصر عمال " صينيين ، بنجلاديشيين ، هنود ، باكستانيين " ويثبتون جدارتهم على العامل المصري وبأقل الأسعار !!!
ومنذ فترة خرجت لنا الصين لتعلن تواجدها أيضا كخاطبة ، وعرضت علينا الزوجة الصينية التي هي أفضل من الزوجة المصرية – كمان وصلت للزواج – وطبعا الزوجة الصينية أحسن بكثير من المصرية فهي ليست رغاية ولا بتطلب عمال على بطال ، وبتشوف كل واجباتها وتنفذها ، والله اعلم بكرة هينزلوا عرسان صينيين بالمرة ولا هتقف على كدا ويا ترى الأطفال هيبقوا صينيين ولا الطفل هييجي جاهز ؟ - الحكاية كبرت أوي يا صين ووسعت –
وفي كل يوم تجد الصينيين في مجال جديد ، حتى في مجال الفضاء وتكنولوجيا الرحلات الفضائية والملاحة ، والسفر إلى القمر ورواد فضاء ، تجد الصين تسجل تواجدها بداخله – الخوف كل الخوف لتجد على المشترى نسخة من سور الصين العظيم – ..
وأيضا الأمر أكبر من ذلك فلقد احترفت الصين بيوت وشبكات الدعارة على مستوى العالم – تقريبا الصين عايزة تكون متواجدة في أي تجارة سواء كانت مشروعة أو غير مشروعة شريف او غير شريف – هذا ناهيك عن مجال الأسلحة والتكنولوجيا الحربية ، وتكنولوجيا الرقميات والإتصالات – طبعا الموبايلات الصيني موجودة في كل مكان – وفوانيس رمضان صيني ، ليس مستبعدا أن يكون أكلك بعد ذلك صيني أو أن تفتح باب الحمام تجد صينيا يقف أمامك يرشدك كيفية إستخدام الحمام ..
اتذكر فيلم فول الصين العظيم وحديث هنيدي مع الممثلة الصينية عن الجذمة التي تباع في العتبة .
ومن ييرى ذلك يتساءل هل ستظل الصن ثابتة على تطورها ، في كافة المجالات – مشروع وغير مشروع – ونظل نحن نشاهد فقط ونسجل إعجابنا يا خوفي – ليس خرم خوفو – بعد ذلك نجد الصين رئيسة العالم رسميا ونحن أصبحنا عبيدا لها بعد عبوديتنا للغرب !!!
فيا ترى متى نتحرر من العبودية ؟



I.M.S.A
M.S.M.O

هناك 10 تعليقات:

  1. الصين ح تجنن الناس

    فيه لحمة صينى كمان قريب على غرار الدهب الصينى

    ردحذف
  2. عيب علينا و الله

    طب البلد بنت نفسها و غزت العالم ..ماشي ..ربنا يسهلها
    لكن العيب اننا نسمح بوجود حجات زي الحلاق الصيني و الباعة المتجولين
    اومال الشباب اللي لسة عاوز يشتغل هيعمل إيه
    و لا حالفين على روحنا هنخربها يعني هنخربها؟؟
    ايه ده؟ حاجة غريبة و الله

    دا مش بعيد نطلع احنا ذات نفسنا صينيين و بنتكلم صيني كمان
    ماهو خلاص زاطت العملية

    و ماحدش فاهم حااااااااااااجة
    الله يرحمنا

    ردحذف
  3. الصين حلوة يا محي..

    انا بس عندي تعليق انتا ازاي تقول (طبعا الموبايلات الصيني موجودة في كل مكان – وفوانيس رمضان صيني ، ليس مستبعدا أن يكون أكلك بعد ذلك صيني أو أن تفتح باب الحمام تجد صينيا يقف أمامك يرشدك كيفية إستخدام الحمام ..) انتا كده بتدي اعتبار للبيقرا ان العالم بالنسبه لك هو مصر.. و انا عارف انك عارف ان في ناس كتير غيرنا بره مصر....ولا ايه؟

    ردحذف
  4. و الله يا تيرز كل شئ جايز في الزمن ده وممكن يبعتوها مع جزارين صينيين :D

    ردحذف
  5. أنا شاكك إني مش مصري من زمان يا خوفي لأحسن اطلع صيني في الآخر :D

    ردحذف
  6. أنا مقولتش إنها وحشة بس احنا فين من كل ده ؟
    هنتحرك امتي ونعمل نهضة صناعية واقتصادية عندنا؟

    علي فكرة مش مصر بس العالم كله بيعاني من انتشار البضايع الصينية اللي بتتميز برخص الأسعار
    بس أنا أكيد ههتم بمصر علي أساس إن اللي كاتب البوست مصري وأغلب زوار المدونة مصريين في المقام الأول :)

    ردحذف
  7. صينى صينى
    دا مقرر علينا زىبعد كدة هنتكلم بالصينى وناكل ونشرب بالصينى
    احنا اه بناكل فى الاطباق الصينى ونشرب فى الكبايات الصينى
    وبلبس دهب صينى وبنتكلم فى موبيلات صينى
    هو ناقص حاجة واحدة ان الصين تيجى تقعد عندنا ما هى اللى مساكه كل حاجة...........وووو لو قعدنا نتكلم عن الحاجات الصينى هنقلب فى الاخر ونتكلم صينى

    ردحذف
  8. غير معروف :
    من المعروف ان الصين أصبحت محتلة العالم كله
    وان اتكلمنا عن الصين
    اعتقد إن أصلنا ممكن يكون صيني " إعتقاد خاطئ لكن يا خوفي لا يتحقق "
    تحياتي لمرورك ومنور المدونة

    ردحذف
  9. وماله الصين حلوة :D
    والله حتى امريكا خايفة من الصين لكن واضح اننا بناخد نسبة على كل الشغل دا لاننا سايبين البلد للصين تتصرف فيها زى ما هى عايزة ، الصين تغزو العالم .. المهم تلاقى حد يغزو معاها مش لازم يوقفها يعنى
    شكرا على البوست الجميل :)

    ردحذف
  10. بلاك بيرل :
    الصين دولة ذات سيادة وسيطرة في الوقت الراهن نظرا لإن لها تواجد في الساحة الإقتصادية تتسم بقدرة كبيرة على البيع وقوة رائعة في مجال التسويق وبالطبع لكل منطقة نوعيتها في التسويق والمنتج ..
    //
    بينما نحن كالعادة لسنا الأوائل في دول الإنتاج بل الأوائل وبلا فخر في دول الإستهلاك وبالتالي يقودنا الأمر للتساؤل الرسمي متى سنخلع عن أنفسنا عباءة النوم في العسل !!!
    ومش لازم نوقف الصين لكن على الأقل نتواجد معها ولو بشكل إننا نسلم على المسئولين الصيني " يمكن دا أقصى ما نعمله "
    تحياتي لكِ ومنورة البوست ...

    ردحذف

خد راحتك في الجنان معنا حرية الرأي مكفولة للجميع حتي لو هتجنن علينا
نظرا لوجود مشاكل في نظام التعليقات لغير معرفين برجاء عدم التعليق بغير معرف منعا لاختفاء التعليقات