الأربعاء، ديسمبر 08، 2010

الـبـلـد فـي حـاجـة إلـيـك أيـــها ……

في مقال لأبو عمر " محمد فتحي " بعنوان " البلد في حاجة إليك يا مازنجر " ، تحدث عن إحتياج البلد لمازنجر وبصراحة لقيت البلد في حاجة لواحد عادي لا مازنجر ، ولا جريندايزر ، ولا كمان باور رينجرز .

بمعنى إننا لن نحارب أبو الغضب ولا ريتا ولا كمان فيغا الكبير ، بل نحن نعاني أكثر من هذا بكثير جدا !!!

البلد في حاجة لإنسان عادي جدا انسان يتواجد في كل شارع ، وكل حارة وكل مكان الانسان دا هو

الـكـنـاس !!!

اه هو أبو مقشة ، وكاب أزرق ، أو أحمر مع أفرول لونه أزرق ويحمل عليه علامة " كيرسيرفس " ،

 فالبلد في حاجة إليك فعلا أيها الكناس

بعد أن باعها رجال الأعمال واستغلوا نقودهم وسلطاتهم في بيع وشراء كل ما في البلد ، والمتاجرة بأرواح الشعب المسكين ، فالبلد في حاجة إليك لكي تكنس الغبار عن رجال الأعمال الحقيقين الذين يحبون تلك البلد ولا يجعلوا غيرهم من المتمسحين في رجال الأعمال يتاجروا بها مرة أخرى ..

البلد في حاجة إليك أيها الكناس

بعد أن استغل رجال السلطة نفوذهم وباعوا البلد بالرخيص وأخذوا النقود وكدسوها في بنوك سويسرا ، فالبلد في حاجة إليك بمكنستك لكي تكنسهم جميعا وتنظف البلد

والمكنسة تلم معاك كل اللي خاربينها وقاعدين على تلها ..

والاسم حاميين البلد وخائفين على مصالحها وحالها !!!

البلد في حاجة إليك أيها الكناس

بعد أن أصبح سعر كيلو السكر ، في العلالي واللحمة بقت بنت أبو غالي ، والحرامية بيتكلموا وبيذيعوا أخبار آخر عجب فيجب عليك ضربهم بعصى المكنسة قبل كنسهم ..

وحتى لا يتاجروا في قوت الشعوب مرة أخرى ، لكي لا تقوم لهم قائمة مرة أخرى وييسعروا إحتياجات الشعوب ويحولوها من تسعيرة إلى سُعار يجتاح الجميع !!

البلد في حاجة إليك أيها الكناس

بعد أن أصبح سعر الأرض عليوي والحديد بقى ابن الخديوي ولازم تظبيط الناس دي وتكنسهم قبل ما يردمونا احنا ونستاهل الكنس لكن ليس بمكنستك ولكن بنقودهم ونفوذهم ..

هذه النقود التي أصبحت تمحي وتدفن المواطن البسيط ، وأصحاب الدخول المهلكة ، والتفكير في الجنيه غدا وطعام اليوم كيف سيكون ، وأبناء الخديوي هايصين لا يفكرون حتى في سعر كيلو اللحمة !!!

البلد في حاجة إليك أيها الكناس

بعد أن تخلى الشرفاء عن القضية " خوفا مما وراء الشمس " ..

وتخلى المفكرون " لوجودهم في عنبر أبو العزائم " ...

وتخلى عنها الأدباء " ما الأدب بقى أيروسي "

وتخلى المثقفون " ما سعر الكتب أصبح ابن عز وغير متوفر "

نتمنى عودتك أيها الكناس لتزاول مهنتك في التنظيف ولكن ليس الطريق ولكن نريدك تنظيف السلم …

وانت تعلم كيف ؟

ومن أين تبدأ ؟

I.M.S.A

M.S.M.O

هناك 28 تعليقًا:

  1. بس الكناس ما يقدرش يجى طول ما فيه سلاح فى وجهه و فيه سجان و احتلال و عشان يجى لازم ياخد بالقوة ما أخذ منه بالقوة و عشان ده يحصل بشكل آمن لازم يكون قلبه على البلد و على أمنها و عارف يحميها

    يارب نلاقى رجالة بجد...جيش يحبنا

    ردحذف
  2. أم عمرو وإيهاب9 ديسمبر 2010 في 10:47 ص

    تسلم إيدك يا إسلام
    مقال ممتاز
    وياريت يبقى عندنا كناسين كتير .. محتاجينهم والله ..

    ردحذف
  3. لازم الظلم يزيد و الحلقة تضيق اكتر لدرجة الاختناق وبعدها ينتفض الشعب و ترسخ المبادىء دة لو كان لسة فى وقت على الكوكب :(

    ردحذف
  4. كلام في الجون
    بس المشكلة
    انو حتى الكناسين مش هيرضوا يتبرعوا
    ماهو كل واحد بردو خيف على نفسه
    و العمر مش بعزقة
    و لا ايييييييييييييه؟

    احنا محتاجين معجزة من ربنا تنزل كدة تخلي المقلوب ينعدل
    و الى ان يحث ذلك
    مضطرين نستحمل القرف و الزبالة اللي حوالينا دي
    او ندعي اهو يمكن ربنا بعت صاعقة من السما تنزل عليهم

    ردحذف
  5. انا مع tears في اللي قالته
    وبضيف اني بجد البلد عايزة مش كناس واحد لاء مجموعة تكنس وتلم كل اللي حصل من تلاتين سنة فاتوا وقبل كنسهم وحرقهم ومش اعادة تصنعهم تاني بتمني يدوقوهم من اللي احنا دقناه علي مر التلاتين سنة دول
    بتمني ...وبتمني اني اكون واحدة من الكناسين دول عشان اشفي غليلي بجد لاني من اول ما اتولدت وانا بعاني من كل شيء ...تعليم ومعيشة وبطالة وقرف....نفسنا في حياة بجد حياة بمعني الكلمة
    والا الشعوب اللي اقل مننا دي عايشة ازاي وحياة كريمة...؟
    هو احنا كنا احسن من اليابان اللي اتدمرت من قنابل زرية ...؟
    شوف اليابان دلوقت ...!! طيب والمانيا ...طيب و...
    بلاش بقي احباط
    تحياتي وبجد كل مرة موضوعاتكم مفيدة

    ردحذف
  6. حلو المقال اوووووى :)

    ردحذف
  7. كالعادة .. مقال جميل يا إسلام
    لا أخفي دهشتي عندما عرفت بأن ما نحتاج إليه هو الكناس
    ولربما دهشت لتيقني من أن هذا هو الحل الفعلي و .. البسيط
    --
    كما وعدت .. قرأت و استمتعت
    بالتوفيق دوماً
    تحياتي

    ردحذف
  8. موفق والله فالمقال يااخ اسلام
    بس انا بقترح مكنسة بالكهربة اسرع

    ردحذف
  9. اشمعنه الكناس يعني؟؟
    ولا انت اخترته كرمز للبساطه؟
    اصلي مشوفتش كناس قبل كده واعي ومقدر حجم البلاوي اللي حواليه
    اغلب الشعهب المصري عنده كميه رضا غيرطبيعيه والحمد لله عايشين ومستوره
    لا احنا عايزين مازنجر وعازين كونان
    عايزين مازنجر عشان يصد القوه بالقوه
    وعايزين كونان عشاني يقدر يمشي الدنيا بالعقل والحكمه

    ردحذف
  10. tmaaaaaaaaaaaam ya prince s7 e7na 3ayzen wa7ed mn el tab2a el 3ama s7 ya islam 2na m3ak

    ردحذف
  11. كناس واحد مش كفايه
    يارب تبقى فى كناسين كتير اقوياء
    يقدورا يواجهوا العواصف والاعاصير اللى فى طريقهم
    بوست جميل يا اسلام
    ربنا يسعدك

    ردحذف
  12. يا ريت بس نلاقى الكناس دا
    مقال رائع يا اسلام

    ردحذف
  13. يااااااااه
    ده السلم عايز تنظيف من فوق وشغل كتيير

    ومش عايزين كناس بمكنسه كهربائية لا عايزينه أبو مقشة
    لأن الأولاني يختلف تماما عن التاني
    ^^

    بس أنا متأكدة وعندي أمل إن الكناس ده جي جي
    طالما في شباب زي الورد زيكوا :)

    يسلم عقلك إسلام
    وبحييك على غيرتك على بلدك
    سلامي لمحمد
    ^_^

    ردحذف
  14. تيرز :
    منورة البوست ، عندك حق ، الأمل لم ينقطع حتى الآن
    //
    تحياتي لكِ

    ردحذف
  15. ام عمرو وايهاب :
    منورة البوست
    ويا ريت الكناسيين يحضروا كلهم مرة واحدة
    //
    تحياتي لكِ

    ردحذف
  16. كونتيكي :
    منورة البوست وشكرا على ردك وتعليقك
    ولسة فيه حياة على الكوكب
    //
    تحياتي لكِ

    ردحذف
  17. سارة بدران :
    كيفك ؟
    منورة البوست ، وشكرا على التعليق ، وعلى فكرة لو كل واحد قال العمر مش بعزقة يبقى لا هنعمل ولا هيحصل حاجة .
    //
    تحياتي لكِ

    ردحذف
  18. رحاب :
    منورانا ..
    خلاص يا سيتي خدي لك مقشة وتوكلي على الله ..
    وعلى رأي احمد السقا في مسرحية كدا اوكيه يا نعيش احنا الكل ، يا ..... لوحدك
    //
    تحياتي لكِ

    ردحذف
  19. غير معروف :
    شكرا لمرورك
    //
    تحياتي لك

    ردحذف
  20. عزة بندق :
    شكرا لكِ على التواجد
    منورة البوست
    واتمنى أن تجدي كل جديد مع المجانين ..
    //
    تحياتي لكِ

    ردحذف
  21. غير معروف :
    مكنسة بالكهربا
    مقشة
    المهم تنضف ..
    //
    تحياتي لك

    ردحذف
  22. شيفا :
    منور البوست
    والكناس رمز للبساطة والتواجد
    للعلم احنا محتاجين اننا نثق في نفسنا اننا نقدر ننتغير لا مازنجر ولا كونان ولا حتى الكابتن ماجد
    //
    تحياتي لك

    ردحذف
  23. غير معروف :
    منور البوست
    //
    تحياتي لك

    ردحذف
  24. الحب الأبدي :
    منورة البوست
    وتحياتي لكِ وأول زيارة واتمنى ألا تكون الأخيرة

    ردحذف
  25. غير معروف :
    منور البوست
    وتحياتي لك

    ردحذف
  26. غادة محسن :
    منورة البوست ..
    شكرا لك ويا ريت تبقي تاخدي مكانك في الصف مع المقشات لان التنضيف مش هيبدأ غير بينا ..
    //
    تحياتي لكِ

    ردحذف
  27. والله الناس دى بتتعب ، يعنى لا مرتب كويس ولا تقدير من حد
    لا بقى دول لو اشتغلوا فى تنضيف مصايب الفاسدين من رجال الاعمال هيحتاجوا سنين اوفر تايم ومش هيلحقوا برضه
    شكرا على البوست الجميل والنظافة من الايمان برضه :D

    ردحذف
  28. بلاك بيرل :
    دا دا العادي ، لازم ما يبقاش فيه مرتب كويس ، ولا تقدير من حد المفروض نرمي نفسنا في جهنم يمكن دا يكون حل منطقي .
    //
    محتاجين بس حد يبدأ بس يا بلاك ، رجال الأعمال وأي حد محتاج تنظيف .
    //
    النظافة من الإيمان ... عندك حق
    تحياتي لكِ

    ردحذف

خد راحتك في الجنان معنا حرية الرأي مكفولة للجميع حتي لو هتجنن علينا
نظرا لوجود مشاكل في نظام التعليقات لغير معرفين برجاء عدم التعليق بغير معرف منعا لاختفاء التعليقات