الاثنين، يونيو 06، 2011

أنا اسـف يـا ريـس … يـا ريـتـك تـقـبـل !!!!

BVV

- انا اسف ياريس .... علشان عملت مكتبة الاسكندرية

لان حضرتك بنيتها وشيلت الطوب والاسمنت لوحدك وشيدتها .

- انا اسف ياريس ....علشان عملت اربع اقمار صناعية

صح يا ريس مش فرنسا اللي عملتهم ، ولا انهم اقمار صناعية للاتصالات ومع ذلك معندناش نت اقمار صناعية ولا هواتف اقمار صناعية .

- انا اسف ياريس .... علشان عملت مدينة الانتاج الاعلامي

صح يا ريس اكبر مدينة فيها سرقة وكانوا بيقولوا انها هتبقى هوليوود الشرق وطلعت شرق الدلتا ..

- انا اسف ياريس .... علشان عملت كوبري السلام فوق قناة السويس

ايوة يا ريس انت عملت البلد كلها كباري وخصوصا كوبري فوق قناة السويس اللي عملت لها برضو قانون 1 لسنة 1998 .

- انا اسف ياريس علشان ربطت قنا وسوهاج بالبحر الاحمر

صح يا ريس وتكلفة المشروع 6 مليار و100 مليون والله اعلم كان في جيب مين الفروق دي ..

- انا اسق ياريس علشان جعلت شرم الشيخ والغردقة اجمل مدن العالم

صح يا ريس وخليت حسين سالم هو الملك المتوج لشرم والغردقة ، دا كفاية قصرك يا ريس ..

- انا اسف ياريس .... علشان جعلت الاقصر اكبر متحف في العالم

ايوة يا ريس دا حتى حضرتك اللي نقلت معبد ابو سمبل بنفسك ، مش ملك مصر ..

- انا اسف ياريس .... علشان حميت مصر من الارهاب والجماعات الارهابية

صح يا ريس وجلبت بعضها هنا ، دا كفاية يا ريس انك محكمتش على قاتل رئيس دولة سابق بالاعدام ..

- انا اسف ياريس .... علشان رجعت علاقتنا مع الدول العربية

اكيد يا ريس وهم رجعوها بعد وفاة السادات اللي بكوا انهم موافقوش على اتفاقيته ..

- انا اسف ياريس .... علشان عملت معبر رفح

وقفلته في وش الفلسطينين يا ريس ، حتى في ايام ضرب غزة ..

- انا اسف ياريس علشان ساهمت في تحرير الكويت وحميت السعودية

شاهدين يا ريس قواتنا خدت على دماغها والامريكان حصدوا الاوسمة والتهنئة وانهم أصحاب الفضل

- انا اسف ياريس .... علشان كنت اول رئيس عربي يفك الحصار علي ليبيا

وخليت القذافي يفضل موجود واهو الشعب الليبي بيعاني من عبطه " للأمانة الوطن لعربي كله بيعاني منه "

- انا اسف ياريس .... علشان رجعت علاقتنا مع الجزائر بعد ماتش ام درمان

وخليت كل واحد يهينا يا ريس وفي الآخر بقينا ملطشة ..

- انا اسف ياريس .... علشان انشأت 5 محافظات مدمرة بعد حرب 1973

ايه يا ريس انت كمان مكنتش عايز تطور دا كفاية اللي حصل في محافظتي حلوان و 6 اكتوبر ..

- انا اسف ياريس .... علشان انشأت مشروع توشكي

ايوة يا ريس والوليد بن طلال خده كله ، دا غير خسايره وانك مشيت فيه للآخر عشان غرورك بس يا ريس ..

- انا اسف ياريس ..... علشان انشأت مدن جديدة

اكيد دي بقى يا ريس هو اه موفرتش فيها خدمات كويسة لكنك بنيت مدن جديدة يعني 30 سنة من غير عمار دي تبقى خيبة بالويبة .

- انا اسف ياريس .... علشان انشأت جامعات علمت الناس

اهي دي بقى بجد يا ريس ، جامعات خاصة ومعاهد خاصة كلها معادلة وفي الآخر سياسة التعليم هي هي من 30 سنة ، احفظ ، صم ، انقش في ورقة الاجابة ..

- انا أسف ياريس ..... علشان كنت مانع الفتنة الطائفية

ايوة يا ريس محصلتش كتير في اخر 10 سنين يدوبك هي حادثة القديسين بس .

- انا اسف ياريس ..... علشان سددت ديونا من 60 مليار ..الي 24 مليار فقط

وكل واحد من حاشيتك يا ريس معاهم كلهم اكثر من ال 60 مليار ، طب يا ريتك كنت حاسبتهم على الاقل كنت سددت الديون .

- انا اسف ياريس .... علشان كان احتياطنا صفر ...بقي 36 مليار دولار

بركة ضرائب بطرس غالي يا ريس ومع ذلك شعبك مشفش الحياة ، لازم نحدد النسل يا ريس ..

- انا اسف ياريس .... علشان مشروع ابني بيتك السكني

ايوة يا ريس اهو مشروع ابني كوخك دا بالذات محفل للجميع ، اخد 150 متر وابني على 75 متر بس يا ريس ، لا تمام اوي ، وكمان الحديد يوميها كان ب 10000 جنيه للطن ، ونعم يا ريس ..

- انا اسف ياريس .... علشان جذبت كل الشركات العالمية " مرسيدس - كارفور - هايبر ون - سيتي ستارز- اعمار - داماك –

الفطيم -الراجحي - سباك -شل- بتروناس -ستيل ميتال "

وبقوا هم أصحاب البلد واحنا الضيوف يا ريس بسبب اتفاقياتك ومعاهداتك وشروطك ليهم ...

- انا اسف ياريس ..... علشان عشنا في امان لمدة 30 سنة

ايوة يا ريس وخليتنا ملطشة لكل واحد من امريكا واسرائيل لاثيوبيا ، وكمان يا ريس بقت البلد بتاعت رجالتك واحنا ضيوف فيها ..

- انا اسف ياريس ...... علشان ضاع من عمرك 62 سنة في خدمة شعبك

واحتكرت شعبك واحتقرته " الكاف والقاف " وعيشته في مهانة طول 30 سنة من عمرك ..

- انا اسف ياريس ..... علشان كنت قائد القوات الجوية في حرب 1973

ونسبت الحرب كلها لنفسك يا ريس بقدرة قادر من مجرد قائد سلاح لصاحب حرب بأكملها كإنك كنت بتحارب لوحدك ، زي ما ممتاز القط قال عنك ..

- انا اسف ياريس ....... علشان معدل النمو الاقتصادي كان الاعلي في المنطقة لمدة 3سنوات "7%"

45% من المصريين يعيشون تحت خط الفقر بأقل من دولار فى اليوم.

  46% من الأسر المصرية لا تجد الطعام الكافى للحركة والنشاط.

88 ألفاً و779 قتيلاً و379 ألفاً و233 مصاباً بسبب حوادث الطرق فى الفترة من 1990 إلى 2006، وهو ما يمنح مصر المركز الأول على مستوى العالم - مركز أول يا ولاد افرحوا وقولوا هيه هيه -

7394 حادثاً بقطاع السكة الحديد فى الفترة من 2000 إلى 2006 أسفرت عن مصرع 573 شخصاً وإصابة 805 آخرين، كما أن لدينا 4 مليارات جنيه خسائر سنوية بسبب حوادث الطرق

39  ملياراً و373 مليوناً و524 ألف جنيه أموالاً و370441 فداناً دارت حولها أخبار الفساد المالى والإدارى والإهمال وإهدار المال العام فى الفترة من أبريل 2008 إلى يناير 2009

- انا اسف ياريس ...... علشان رغيف العيش كان ب 5 قروش لمدة 30 سنة

ايوة يا ريس وكان مليان مسامير وطوب وزلط وسجاير كمان ..

- انا اسف ياريس ....... علشان 60 مليون لهم تموين شهري .... لم ينقطع مرة واحدة

ومع ذلك كانوا بيدفعوا من تحت لتحت عشان يحصلوا عليه و 12 مليون مصرى دون مأوى، منهم مليون ونصف المليون يعيشون فى المقابر...

- انا اسف ياريس ...... علشان سعر لتر البنزين اقل من سعر لتر المية المعدنية..

ومع ذلك كنت تضحك علينا بكلمة الدعم ، رغم انه بيطلع من ارضنا ويرجع يباع لنا ، يبقى فين الدعم ، ولا اقولك شوف اتفاقية الغاز يا ريس والقتل على الانابيب في مصر ..

- انا اسف ياريس ........ علشان قضيت علي امراض مثل الملاريا – والبلهارسيا – وشلل الاطفال

وانتشر في عهدك الفشل الكلوي ، والكبد والسكر والسرطان ..

- انا اسف ياريس ......... علشان معدل الفقر انخفض الي 20 %

مصر تحتل المركز 57 من بين 60 دولة فى تقرير البؤس العالمى.

- انا اسف ياريس .........علشان متوسط عمر المصري ارتفع الي 72

يا سلام ، دا متوسط عمرنا ارتفع محدش راجع نسبة الوفيات في مصر ..

- انا اسف ياريس .......... علشان نسبة الوفيات في مصر انخفض الي 19 في الالف

أعلى معدل لوفيات الأطفال فى العالم بواقع 50 طفلاً لكل 1000 مولود.

- انا اسف ياريس ............. علشان عملت معرض الكتاب الدولي

ومع ذلك ليس لدينا ابداع في الفترات الاخيرة ، لإن كله حفظ ومفيش ثقافة ..

- انا اسف ياريس ............ علشان مهرجان القراءة للجميع

وحضرتك دا تبعك ولا تبع المدام ؟

- انا اسف ياريس .......... علشان انشأت وحدات صحية في جميع القري

ايه يا ريس انت مكنتش عايز تنشئ وحدات صحية ، برغم كل البلاوي دي وفترة رئاستك اللي بقالها 30 سنة ..

- انا اسف ياريس .......... علشان عملت مراكز ثقافة في جميع القري

ومفيهاش كتب عدلة يا ريس كل ما نسأل على حاجة مش موجودة ..

- انا اسف ياريس ............. علشان عملت الخط الدولي للغاز من مصر وفلسطين واردن وسوريا ولبنان وتركيا ورومانيا

واسرائيل يا ريس متنساش والتكلفة اقل تكلفة ممكن حد يعملها في حياته ..

- انا اسف ياريس ....علشان ربطت شبكة الكهرباء للدول العربية

ومع ذلك معندناش كهرباء في بعض المناطق والقرى والنجوع يا ريس ، ولا حتى محطة طاقة نووية ..

- انا اسف ياريس .......... علشان عملت مطار القاهرة .... عروسة المطارات في العالم

ايه دا يا ريس ؟ طب مفيش تعليق على باقي مطارات العالم ، ولا شفيق مشاركش لا هو ولا منير ثابت في المطار ؟؟

- انا اسف ياريس ........... علشان عملت التامين الصحي ل 55 مليون شخص

والشعب 80 مليون ، وفيه اكثر من ال55 مليون مبيعرفوش يوفروا التأمين وراجع مستوى مستشفيات التأمين الصحي يا ريس وقرارات وزير الصحة باشا في عهدك في أواخر عهدك لما الناس اعترضت على الغاء التأمين الصحي ..

- انا اسف ياريس ..........علشان رجعت اسم محمد نجيب – والملك فاروق الي كتب التاريخ

وشطبت كل علمائنا ومثقفينا ونفيتهم برة البلد ..

- انا اسف ياريس ............ علشان ساهمت في تحرير سيناء

ووقعت البلد كلها تحت الاستعمار الاقتصادي ..

- انا اسف ياريس ............ علشان حررت طابا

كنت بتنفذ اتفاقية يا ريس ..

- انا اسف ياريس ............ علشان اصبح هناك 3 شبكات محمول ....وفي ايد كل واحد تليفون

ايوة يا ريس وكان المواطن بيموت على رغيف العيش ولهيته بالموبايلات والنت ومن غير فائدة ولا توجيه ..

انا اسف فعلا يا ريس ويا ريتك بس تقبل ...

I.M.S.A

M.S.M.O

هناك 5 تعليقات:

  1. ههههههههههه
    يا رجل .. حرام عليك موتني من الضحك والعياط ...

    يعني لسا في ناس بتعيط على مبارك ...

    الحمد لله .. ربنا اخذوا بداهية ...

    باذن الله مصر رح تكو احسن بمشيئة الله .

    ردحذف
  2. ههههههههههه

    معلش مش لاقية تعليق غير انى اضحك كده

    ردحذف
  3. bلا حول ولا قوة
    الأ بالله معقول !
    كل الخير دا عمله
    وأحنا انكرناه!!!!!
    تؤ تؤ تؤ ملناش حق :)

    ردحذف
  4. والله كويس انك عندك صبر ترد عالبوست بتاع اسفين يا ريس ... انا قرايته ومخي كان هاينفجر من الغيظ واليوم كله باظ بعدها ... كل اما تحصل حاجة غلط اقعد منك لله ياللي كتبت البوست ده
    MishMish

    ردحذف
  5. رائع رائع كلامك جامد جدا المدونة جميلة جدا ...

    ردحذف

خد راحتك في الجنان معنا حرية الرأي مكفولة للجميع حتي لو هتجنن علينا
نظرا لوجود مشاكل في نظام التعليقات لغير معرفين برجاء عدم التعليق بغير معرف منعا لاختفاء التعليقات