الاثنين، أغسطس 02، 2010

ارفع راسك يا أخي فلقد مضي عصر الألف شيت

d29e21ea26 

احساس جميل لما يكون عليك ثقل والثقل ده ينزاح مرة واحدة

كان في كابوس جاثم علي صدري اسمه انتظار النتيجة برغم إنهم 3 مواد فقط لاغير

وفي مادة من المفترض إن أنا عبقري فيها يعني أسوء الظروف هطلع بمادتين بس العملية مش مستحملة

لازم الواحد يطلع رابعة نظيف ومستحمي كده و حاطط مزيل عرق

والحمد لله النتيجة طلعت وبعد معاناة سنتين في سنة الألف شيت- سنة تالتة مدني عندنا اسمها كده

علشان كمية الشيتات الرهيبة اللي بتتسلم فيها- الواحد نجح ووصل لقمة الهرم وبقي في سنة رابعة

مش مصدق نفسي إن أنا وصلت خلاص لآخر سنة لي في جحيم دانتي

والف مبروك لكل صحابي وحبايبي اللي معاي من اعدادي وقعدوا معاي برضه في تالتة

علشان ميبقاش الواحد لوحده برضه – قال يعني بمزاجهم- وبرضه لحبايبي الجدد اللي عرفتهم في تالتة

ومبروك لصحابي اللي اتخرجوا وبقوا مهندسين رسمي خلاص علي فكرة انا نقيت عليكم وهتلبسوا جيش 3 سنين

لا يوجد مفر واسألوا اللي نقيت عليهم قبل كده

وبجد بشكر الدكاترة وخاصة عمو حجاب علي مدي تعنتهم وحبهم لتعقيد الأمور

برغم أن الموضوع مش مستاهل ومن الممكن تييسر الأمور بس هيبقي دكتور ازاي؟

أنا بشكرهم لأن لو مكنتش وقعت مكنتش هلاقي وقت فراغ بحيث اعمل مدونة  جميلة زي دي

ولا اعرف ناس جميلة زي زوار المدونة و اشوف مدونات آخري واعرف مدونيين

آخرين ومكنتش هفتح حسابي علي الفيس بوك تاني

ولا كنت هتعرف علي أصحاب جدد ولا كنت وصلت لأصدقاء الطفولة البريئة

بجد كانت سنة ممتعة  وكانت سنة راحة بعد تعب 4 سنوات متواصلة في الجحيم

وكانت سنة استعداد لآخر جولة في هذه المعركة وليس الحرب فالحرب مستمرة طول العمر

nagah2

و البوسة دي ببعتها مخصوص لشاكر ومرسي وعادل وعزيزومحمود أشرف ولحجاج وضياء ولكل حبايبي

اللي نجحوا ومعذرة لو في اسم وقع مني ولو في حد ما اتوفقش السنة دي نصيحتي لك لا تيأس ولا تستلم

واستمتع بحياتك واستفيد من السنة دي علي قد ما تقدر فمن رماد العنقاء يولد طائر جديد

فحول فشلك وسقوطك في بعض الأحيان لدافع لأمام دائما

وأتمني النجاح والتوفيق للجميع

هناك 12 تعليقًا:

  1. مبروك النجاح :) فكرتنى بيوم ما اخدت الليسانس حسيت انه كان هم وانزاح ويوم الثانوية العامة برضة :) ادينى عيطت عاجبك كدة

    ردحذف
  2. الف مبروووك و عقبال التخرج :)))

    ردحذف
  3. الله يبارك فيك
    وعقبال ما اخلص رابعة واخلص الماجستير والدكتوراه كمان :D
    الثانوية العامة أعصابي متعبتش فيها زي الكلية دي
    والله ما كان قصدي ده انا قلب لك المدنة كلها نكت ونبعد عن الدموع ده الواحد ما صدق إن في حاجة حلوة حصلت له بعيدا عن الجو اللي واحد عايش فيه

    ردحذف
  4. الله يبارك فيك يا Tears
    ويسمع من بقك ربنا

    ردحذف
  5. مبرووووووووووووووووووووووووووووووووووك
    تانى

    ردحذف
  6. lolololololol.olyyyyyyyyyyyyyyyy

    يارب بقي نخرج منها السنه الجايه مع بعض انش شاء الله
    انا حمضت من الركنه في الكليه دي :D

    ردحذف
  7. الله يبارك فيك تاني :)

    ردحذف
  8. إن شاء الله يا شاكر يا حبيبي
    حمضت 8-} 8-}
    يا بني إحنا احسن من غيرنا وانت عارف كده كويس
    امال الناس اللي بقالها سبع سنين وتمانية وتسعة وأكتر من كده يعملوا ايه
    تاني حاجة انت عارف إن أول حاجة بتتقالك أول ما دخلت هندسة خدعوك فقالوا إن هندسة في 5 سنيين :D

    ردحذف
  9. الف مبروك و عقبال التخرج ان شاء الله

    ردحذف
  10. الله يبارك فيك :)

    ردحذف
  11. الف الف مبروك :) :)
    " معلش متأخرة بقى :( " .. وان شاء الله عقبال التخرج والمشروع بإذن الله

    ردحذف
  12. الله يبارك فيك
    ولا وصلت متاخرة ولا حاجة بس علشان متغيبيش تاني كده
    ويسمع من بقك ربنا علي التخرج والمشروع :)

    ردحذف

خد راحتك في الجنان معنا حرية الرأي مكفولة للجميع حتي لو هتجنن علينا
نظرا لوجود مشاكل في نظام التعليقات لغير معرفين برجاء عدم التعليق بغير معرف منعا لاختفاء التعليقات