الأربعاء، نوفمبر 03، 2010

خطاب شاب بولوتيكي

إلى كل من يهمه الأمر
تحية طيبة وبعد ،

هذا الخطاب مُرسَل إلى كل من يهمه الأمر ويقرأ هذا الخطاب ، إنه خطاب شاب بولوتيكي يرى الجيد في بلده بولوتيكا العظمى ..
أولا أحب أن أقول إننا نحيا حياة كريمة لا تشوبها شائبة ، منتهى الحرية والديمقراطية والمساواة – ابن الوزير زي ابن البواب بالضبط – وحقوق الفرد وتحمل المسئولية ، كل شاب لدينا يصنع ويعبر كيفما يريد ، بالبلدي كدا الشباب روش ، بيشتغل ومعاه فلوس ، يضع كل يوم عطر جديد لأ وغير كدا أي واحد نفسه في حاجة بيقولها لا خايف من حكومة بولوتيكا ولا أمن بولوتيكا السري ولا أي حاجة ولا يترمي وراْ النجم البولوتيكي ولا أي حاجة ، ولا ينزل تحت في بدروم تحت الأرض البولوتيكية والذي يطلق عليه أعداء بولوتيكا معتقل سياسي أو ثقافي أو إجتماعي ..
ثانيا لدينا حرية أديان بمعنى مفيش مواطن من ديانة ما يعتدي على مواطن من ديانة أخرى ، لأ دا حتى البوذي موجود في بولوتيكا وواخد حقه تالت ومتلت ، وكمان مفيش مشاحنات ولا شجار ولا قتل ولا أي حاجة من اللي بيرددها أعداء بولوتيكا العظمى .
وكمان كل فرد لديه الحرية ومعانا فلوس نجيب اللي عايزينه وقت ما نحتاج على طول ،ن لا بنقدم على قروض من بنك ولا بنشحت ونبيع اللي ورانا واللي قدامنا ومعانا اللي يغطي الحديدة ، طبعا لإن حكومتنا نظيفة ومخليا معانا كل فلوس الدنيا دا إحنا حتى من كتر تلبية طلباتنا ما بنطلبش لا دا إحنا بنفكر في الحاجة وعلى طول نلاقيها أدامنا ...
ثالثا الشباب عندنا أول ما يخلصوا جامعات ومدارس بولوتيكا بيشتغلوا بسرعة الصاروخ ، معندناش شباب بيقعد على قهاوي بولتيكا ولا بيشرب مخدرات عشان همومه ولا بيحشش ولا أي أمر من تلك الأمور الغريبة التي يرددها الأعداء عنا ، لا نحن نعيش حياة كريمة جدا جدا ، وكمان مفيش بانجو وحشيش ولا الكلام الفارغ دا لإن شرطة بولوتيكا وأمنها مانعين الحاجات دي ونادرا ما تجدها في السوق ولا نصدق ما يقال عن كون أمن وشرطة بولوتيكا يبيعون تلك الأمور لحسابهم الشخصي ، ابدا لا نصدق هذا لكوننا نثق في أمانة الأمن البولوتيكي ...
وكمان شباب بولوتيكا ما بيتكلموش وخلاص ، لأ دا شباب واعي ومثقف ، يعني طول الوقت بيطالع الصحف والجرائد الأبحاث العلمية مش مقضينها خروجات وشات وبنات ونت والكلام الفارغ دا ، لأ دا انت أول ما تسأل شاب فيهم من رئيس دولة كذا وعاصمة الدولة الفلانية يرد عليك بأغنية زي الفل تبين لك مدى وعيه .
وكن نفسي اكمل باقي الخطاب لكن يا خسارة الحلم انتهى وصحيت من النوم اممممممم
المرة الجاية هبقى احلم واطول الحلم شوية واحلم بزيادة ...
                                                                                 إمضاء
شاب بولوتيكي ..

هناك 18 تعليقًا:

  1. تحيا بولوتيكا ، تلك الجمهورية الكرتونية المتخلفة

    ردحذف
  2. فى الحلم او فى المشمش

    ردحذف
  3. مش شايف انك مزودها شويه المره دى

    ردحذف
  4. صباح الورد
    دي اول زيارة
    بس بجد كلامك برغم انه قاسي حبتين تلاتة
    لكنه للأسف حقيقي جدا
    تقبل مروري

    ردحذف
  5. المصري أفندي :
    تحياتي لك
    منور البوست
    واتمنى أن يكون قد راق لك

    ردحذف
  6. Ms Venus :
    في المشمش يمكن
    لكن اتمنى أن يتم تحقيق هذا الحلم في يوم ما

    ردحذف
  7. غير معروف :
    مزودها يمكن
    لكن اعتقد إني لم اذكر حتى الحقيقة كاملة

    ردحذف
  8. رحاب صالح :
    اهلا بكِ في أول زيارة
    شكرا على ردك
    واتمنى تصحيح تلك الأوضاع الغريبة
    تحياتي واتمنى أن تستمري في زيارة المدونة

    ردحذف
  9. الواحد خلاص تملكه اليأس

    خلينا نقول يااا رب

    ردحذف
  10. نتمنى ان تكون هذه هى حياه الواقع
    ولكن للاسف الواقع مؤلم والحلم جميل
    ويا رب بلدنا تتحسن احسن واحسن

    ردحذف
  11. يا سلام آدي الأحلام ولا بلاش

    تقبل جناني الأول
    |:

    ردحذف
  12. tears :
    اليأس كلمة الضعفاء
    طالما يوجد صوت ولو 0.000001% يكون هناك أمل
    وطالما يوجد أمل فبالتأكيد سيأتي وقتا ويتحقق
    لا تفقدي الأمل ولتظلي على قول : يا رب فليس لنا غيره
    تحياتي ..

    ردحذف
  13. على باب الله :
    كلنا نحب بولوتيكا
    تحياتي ومنور البوست

    ردحذف
  14. غير معروف :
    بالتأكيد الواقع مؤلم
    ولكن يجب ان يتم تحسينه ولا بأس من أن نحلم
    عسى أن يتحقق هذا الحلم
    تحياتي لك
    ومنور البوست

    ردحذف
  15. Um il sa3af wil leef :
    يسعدني تواجدك وجنانك الأول
    وأتمنى ألا يكون الأخير
    منورة البوست

    ردحذف
  16. اممممم .. بس على فكرة شباب بولوتيكا مش وحشين فعلا ، يمكن ضايعين لان مفيش امل ومفيش هدف يقدروا يحققوه بالامكانيات المتاحة ، لكن اى شاب بولوتيكى لما يخرج بره ويلاقى الامكانيات والنظام اللى بيحاسبه على مجهوده وفى نفس الوقت بيحاسبه على تقصيره ساعتها بتظهر مواهبه
    يعنى لسه فيه امل
    وربنا يستر
    :D

    ردحذف
  17. بلاك :
    عندك حق اكيد احنا ضايعين
    بس اكيد برة بناخد حقنا
    والامل موجود وممكن بولوتيكا تتقدم وتطور
    منورة البوست

    ردحذف

خد راحتك في الجنان معنا حرية الرأي مكفولة للجميع حتي لو هتجنن علينا
نظرا لوجود مشاكل في نظام التعليقات لغير معرفين برجاء عدم التعليق بغير معرف منعا لاختفاء التعليقات