الثلاثاء، مارس 29، 2011

مـــواقـــف ومـــش مــــواقــــف :: 2 ::

مقتطفات من مواقف ومش مواقف اردت للجميع المشاركة فيها من القديم ومن الحديث …

:::::::::::: /////////////// :::::::::: //////////////// ::::::::::: ///////////// ::::::::::

كنت اقرأ في كتاب لعنة الفراعنة – مش في الإنجليزي أوي عشان اقرأ نسخة فيليب فاندنبرج فكانت النسخة لأنيس منصور إصدار دار الشروق – وأوقفتني عبارة في صفحة 29 عن " لعنة دمنهور " وهي إرتفاع الحوادث في الطريق الزراعي قبل أو بعد مدينة دمنهور وقلت ياااه دا اللعنة موجودة لكن غيرت إتجاهها وسابت دمنهور – لإن الزمن بيتغير- وتساءلت ليه مسجلناش اللعنة الجديدة وهي لعنة " العياط " تأكيدا على كل حوادث القطارات هناك وعلى الرغم من كون دمنهور طريق زراعي والعياط طريق قطارات إلا إنهم بيتفقوا في حاجة دلوقتي كلاهما طريق الموت والخراب وفضح الفساد !!!!

********

على ألسنة أحد كهنة مصر وهو يخاطب رجل الحكم والحكمة " سولون " : انتم أطفال إذا ما قورنتم لما لدى المصريين من علم ...

أين هذا العلم وتلك العلوم في الوقت الراهن ؟ اه في المعابد والمتاحف وليست في كتب الدراسة والكتب العلمية بما يثبت بكل فشخرة إننا القرعة اللي بتتباها بشعر بنت اختها لإننا بنحب نتكلم عن الماضي وتاركين الحاضر والعلم الحديث فدا يثبت إننا إيه ؟ ...

************

حينما صرح المهاماترا غاندي محرر الهند من الإستعمار الإنجليزي وكان متبني سياسة اللا حرب تذكرت سياساتنا العربية منذ عام 1982 م والتي تقول لا حرب مع الأعداء وأهلا بالحرب مع الأخ والصديق وقلت لو كان غاندي عاش في الوطن العربي كان استغل سياسة اللا حرب والسلم ولا قال اضربوا وحاربوا الفساد لتتحرر الأمم والبشر والأراضي اعتقد الحل الصحيح هو عدم تخيل الأمر لإن غاندي هندي وإحنا عرب والربط بينا أفلام أميتاب باتشان ...

" الأمر قبل ثورة يناير والتي اثبتت إننا نستطيع أن ننفذ سياستنا الخاصة في الرد على الفساد ولكن اخشى من رد فعل المنتفعين "

*******

موقف من المواقف يجب أن اقف عليه هو موقف الناس من التعديلات الدستورية وخاصة هؤلاء الذين قالوا نعم من اجل نصرة الدين أو من اجل المادة الثانية من الدستور ، مما يثبت جهل البعض واستغلال الجماعات الإسلامية لهذا الأمر ساخبرك لماذا ؟ أولا لإن المادة الثانية من الدستور ليست ضمن المقترحات التي تم تعديلها ، فهذا بالتالي ليس له علاقة بالدين أو الموافقة على التعديلات بمعنى إن الناس البسيطة ضُحك عليها باسم الدين ..

ثانيا من يقول بإن الفقهاء سيحذفون المادة الثانية إن تم تعديل الدستور ، دعني اتذكر المادة الثانية إنها الخاصة بالشريعة الإسلامية مصدر التشريع في مصر أي الأحكام الصادرة في القضاء ، حسنا لا أظن إنها خاصة بالعبادة أو التعبد لله تعالى بل خاصة بالتشريع في الأحكام والقضاء – لا أظن إننا نطبق الشريعة بحذافيرها في الأحكام !! – المهم الناس اعتقدت إن تعديل الدستور سيلغي المادة الثانية دعني اسأل سؤال :

هل حين نقوم بالتعبد لله تعالى أو التوقف عن التعبد من يحاسبنا الله تعالى أم الدستور ؟

لا اريد أن اقول أن الناس لا تزال تعيش في حالة التغييب السياسي والثقافي ولكن هذه المرة ليس عن باسم النظام بل باسم الدين ...

*********************

مما أثار ضيقي بالفعل هو تصريح الشيخ محمد حسين يعقوب حين قال إنها غزوة صناديق ، وإن الفريق الفائز هو من أيده الله في تلك الغزوة وعلى الأخرين الرحيل من مصر ..

أليس هذا دعوة للفتنة ؟ ، لماذا تقول هذا ؟ ، هل اعترضنا على فوز من قال نعم ، لقد قلنا أن الأمر حرية وديمقراطية واحترام رغبات الأخر ، ولكنك للأسف استخدمت الأمر لغرض في نفس يعقوب دون الالتفات لحالة البلد الآن ؟؟؟

ما أثار الضحك بالفعل أن أمر المادة الثانية من الدستور مفتعل لإننا لن نقبل أن يتم محو الدين سواء كان إسلامي أو مسيحي من بلد يقطنها مصريون ...

شئ أخر أريد قوله نحن ننتمي للدين وليس الدين من ينتمي لنا والدليل على ذلك إن الدين حين قام قام على كتف رجل واحد وهو الرسول صلى الله عليه وسلم وانتشر بسبب ناس انتمت إليه ، وليس العكس ...

نحن أيضا ننتمي لتلك البلد التي ترعانا ويجب أن نحافظ عليها وألا نفرقها باسم الدين ..

I.M.S.A

M.S.M.O

هناك 11 تعليقًا:

  1. حمد الله بالسلامة يا اسلام
    والله معاك حق
    واحترت اعلق علي اي حزء الاول...؟؟؟
    طيب خلينا م الاخر زي ما دايما احب اقرأ المجلات ...دايما من الصفحة الاخيرة
    الدين...فاكرة اننا اتكلمنا في الموضوع ده ساعتين بحالهم علي الموبايل ....الدين جوانا ....ومهما يحصل كل واحد فينا هيفضل متمسك بدينه ....وكلام يعقوب يحسب عليه واصلا انا مش مقتنعة بيه ولا اصلا بحب اتابعه ...بكره اللي بيقحم الدين في كل شيء من غير اساس وده غير ان اساسا مكانش في صوت م الاول وليه صوتك بان وظهر دلوقت....وده غير تفصيل الدين والفتاوي علي مزاج الحاكم
    بالنسبة للدستور والدين ومدنية واسلامية....او مسيحية ...طبيعي ان الدين شيء مهم جدا لنا كبشر وكشعب عربي ومصري تحديدا فلو ان الدولة فرضت علينا دين بالقوة او حتي فرضت علينا علمانية ...لن نرضي ابدا مهما حصل ....الدستور مش هيفرض علينا وحتي ولو فرضوا علينا جوانا شيء ...وربنا اللي هيحاسبنا صحيح لكن الدعوة للفساد ششيء يحسب
    العلم ...اللي انت بتتكلم عنه راح وراحت ايامه....يا سلام لو احنا كشباب اللي مسكنا وزارة التربية والتعليم والتعليم العالي والله لا نخلي التعليم حاجة بجد تفرح ....مش حاجة تقهر بالشكل ده
    اسلام حاولت اكتب علي اد ما اقدر بس بجد مش قادرة اكمل ....تعبانة

    ردحذف
  2. أم عمرو وإيهاب30 مارس، 2011 5:15 م

    تسلم إيدك يا اسلام .. وحمد الله على سلامتك .. بالنسبة لجزئية نعم ولا فى الاستفتاء .. معاك ان كتير قالوا نعم باسم الدين .. مع ان زى ما قلت المادة التانية مش مذكورة فى التعديلات اصلا .. لكن أنا شايفة ان النتيجة واحدة أصلا .. مع نعم حيتعمل دستور جدي ومع لا حيتعمل دستور جديد برضه .. وايا كانت النتيجة نتمناها خير لمصر ان شاء الله

    ردحذف
  3. المقال كلو روعة تسلم ايدك يا اسلام
    بس كنت هقول حاجة واحدة كنت هتشل منها بجد
    بالنسبة ليوم الاستفتاء والمهازل اللي حصلت فيه واللي خلاني اشك في الناس اللي حواليا و اقول بجد دول و لا بيستعبطوا؟
    تخيل ..سمعت من الناس اللي رايحة تنتخب ان العلامة الخضراء بتاعة المسلمين والسوداء بتاعة المسيحيين و لا شيء اكثر من ذلك
    ولا تعليق

    ردحذف
  4. عارف ياإسلام ...
    في سلبيات كتييير ظهرت على ناس بعد الثورة
    بس في نفس الوقت في إيجابيات كتير ظهرت برضه على بعض الناس ...
    في ناس فاقت وفي ناس إتجننت ومابقتش عارفه هي بتقول إيه
    زي الأخ يعقوب طبعا !!!

    وزي الأخ إللي بيقولّك العلم للرجال والنساء جاهلات ده طالع
    على التليفزيون محموق ومقهور وبيقول " إزااااااي واحدة ( منتقبة ) تطلع على التليفزيون قدام البشرية تكلمهم وتخاطبهم " !!!!!!
    ـــــــــــــ
    وللأسف العلم والإختراعات والإبتكارات وقفت عند حقبة معينة
    وباقي الوقت بنقول وبنحكي عن الحقبة دي .. ونسينا أنفسنا
    بس والله كل شي راح يتعدل ولو بشكل بطيء شويه .. أنا حاسة بكده
    ـــــــــــــــ
    وطبعا نتيجة الإستفتاء كان نفسي تبقى " لا " .. مع إنه فعلا كده كده المفروض هيتعمل دستور جديد على المدى القريب ... بس كان نفسي الناس تبقى واعية أكتر من كده ...

    ــــــــــــــ
    وفي حاجات كتيرة في مصر بتمنى إنها تتغير جذريا من كل النواحي

    وضروري الناس الواعية تنشر ماعندها من وعي ولا تحتفظ به

    وأنا مبسوطه من شباب طنطا عشان بدأوا في نشاطات رائعة وهيكون ليها تأثير أكيد
    وإن شاءالله يحصل ده في كل محافظه وكل منطقه :)
    ـــــــــــــــــــ
    معلش طولت حبتين تلاته
    بس عشان البوست بتاعك محتاج رغي كتير
    بجد تسلم ياإسلام
    طول عمري مقتنعة بطريقة تفكيرك
    تحياتي
    ^_^

    ردحذف
  5. رحاب صالح :
    هدوءك في التحليل ، وصياغة الامر بطريقة لذيذة ان الدين بداخلنا ولا يسوقه أحد لنا , ولا يفرضه أحد علينا اتمنى أن يعيي الجميع هذا الأمر ..
    ///
    انتِ ناوية تمسكي إيه بس في البلد ، التعليم ولا الصحافة ولا ايه بالظبط
    لكن بصراحة لو تولينا عملية التعليم هنخليها افضل من كدا بكتير
    //
    منورة دايما يا رحاب

    ردحذف
  6. ام عمرو وايهاب :
    منورة البوست ، بالنسبة لنعم او لا كلاهما في طريق واحد بس زي ما بيقولوا ما كان من الاول ولا لازم اللف والدوران ..
    لكن وانا بتكلم ليس في نعم او لا ، ولكن اتحدث عن المعركة باسم الدين ..
    //
    منورة المدونة

    ردحذف
  7. سارة :
    دي العادة من المتخلفين ، والضحك على أصحاب العقول الضيقة من الناس ، والضحك على الفقراء والبسطاء باسم الدين والفتنة ، انهم يدعون لفتنة لكن دون أن يفهموا وان كانوا لا يفهموا فتلك مصيبة وان كانوا يفهمون ويفعلون هذا فتلك كارثة ..
    //
    منورة البوست ..

    ردحذف
  8. غادة :
    طولتي ايه بس ، امال فين المساحة والرأي
    اكتبي براحتك مفيش حجر للحريات والتعبير هنا ..
    //
    بخصوص يعقوب وأمثاله يقود كما قلت لاحداث فتنة خصوصا في تصريحاته ..
    وبخصوص اننا بنتكلم عن انجازات فترة ماضية فكل ما اخشاه ان نفضل تحدث عن تلك الفترات ولا نقدم جديد لهذا الوطن ..
    //
    تحياتي لكِ ومنورة المدونة

    ردحذف
  9. بالنسبة للعم زى ما انت قلت القرعة بتتباها بشعر بنت اختها
    اما التعديلات الدستورية فكانت اغلب الناس البسيطة مش فاهمة حاجة واضحك عليهم باسم الدين بس اللى قالولهم قولو نعم علشان المادة التانية هو فى حد مس المادة التانية لما يمسوها هيكون فى كلام لكن احنا بنسبق الاحداث وخلاص وبعدين لازم نبعد المصالح الشخصية عن اى حاجة ف البلد والا كانك يا ابو زيد ما غزيت (الثورة يعنى) لان ف راى انا ان الضحك ع الناس بالطريقة دى يعتبر مصالح شخصية ولازم كلنا نكون ايد واحدة مع مصلحة البلد المصلحة العامة وطبعا بالنسبة للشيخ اللى بيفتى من دماغه دا هو اى حاجة ف اى حاجة وخلاص يعنى ايه اللى قالو كذا يبقو كذا واللى قالو كذا يبقى كذا هو بيفتى بناءا ع ايه ايه دليله انا اعرف ان المشايخ لما حد يسالهم يقولك فى القراءن ربنا قال وف الاحاديث رسولنا الكريم قال هى دى الادله مش من دماغه وخلاص وربنا يهدى ويعمل اللى فيه الخير

    ردحذف
  10. سمراء النيل :
    منورة البوست ..
    بخصوص الكلام بفتاوي دينية طبعا بعد ما بقت دليفري ن بقينا بناخد كل يوم كلام جديد
    لكن المشكلة فيما يترتب على تلك التصريحات ..

    ردحذف
  11. المادة التانية بتقول ان اللغة العربية هى اللغة الرسمية للبلاد .. دا السبب الوحيد اللى يخلينى عايزاها تفضل موجودة .. الدين مش بمادة فى الدستور ، الدين المعاملة قبل ما يكون قانون مفروض عليك تطبقه !
    وبيتهيألى ان المسلمين عايشين فى اوروبا وفى اليابان حلو اوى ، مش بيتقتلوا كل يوم الصبح مرتين يعنى
    اما بالنسبة للعلم .. بيتهيألى الناس حاليا شاغلها التعليم والسياسة اكتر حاجة ، يعنى اهم حاجة تبقى فى برامج المرشحين اصلاح التعليم والدستور والاقتصاد ، الاقتصاد حتى مش مهم قد التعليم لان التعليم هو اللى هيبنى الاقتصاد الصح .. ربنا يستر

    ردحذف

خد راحتك في الجنان معنا حرية الرأي مكفولة للجميع حتي لو هتجنن علينا
نظرا لوجود مشاكل في نظام التعليقات لغير معرفين برجاء عدم التعليق بغير معرف منعا لاختفاء التعليقات