أول ممارسة ديمقراطية....:))

لما تبقي عاجز عن الكلام لما يكون بداخلك مشاعر متضاربة من الفرح والسعادة لما تكون مش عارف توصل المعاني والأحاسيس اللي انت بتحس بيها هي دي حالتي وحالة ناس كتير نزلوا النهارده من الصبح وصوتوا في الاستفتاء سواء صوتوا بنعم ولا مش مهم المهم إن الشعب المصري بيثبت كل يوم إنه شعب عظيم واللي شوفته النهارده يخليني اسال فين سيلي مان ونظيف اللي بيقولوا إن الشعب مش مستعد لديمقراطية ده العكس هو اللي صحيح.

أنا أول ما صحيت الصبح طلعت اجري علي البلكونة اشوف الأعداد عند اللجنة اللي جنبي عاملة ازاي كانت الأعداد قليلة والدنيا رايقة نزلت لجولة التسوق المعتادة قبل ما اروح اصوت ودخلت المدرسة ضباط الداخلية والجيش كانوا بره اللجنة :)

وكان في واحد واقف بره المدرسة رافع علم مصر وحاطط بادج لا للتعديلات الدستورية وكان في ناس بتروح تساله وبيتكلموا معاه وكان الحوار قمة في الرقي والتحضر برغم إن اللجنة اللي انا روحت صوت فيها بجوار شارع معروف باتجاهه السلفي بس مسمعتش لهم صوت غير الأيام اللي فاتت وخاصة بعد صلاة الجمعة امباراح لما قالوا إن التصويت بنعم واجب شرعي وإنك لو صوت نعم وطلع خطأ هنتحمل نحن الوزر!!!!
المدرسة اللي كنت فيها كان في 3 لجان في 3 ادوار فوق بعض المنظر كان جميل جدا وخاصة الحوارات الدائرة بين الستات الكبار وأهم حوار فيهم كان بين ست مسلمة كبيرة وجيرانها المسيحيين واضح إنهم نازلين مع بعض وبيتكلموا علي ايام الجيرة وايام زمان وإن مبارك خرب مصر وبيعيبوا علي رجال الدين اللي قالوا قولوا نعم أو لأ ،طابور الرجال كانت الحوارات بعيدة عن الاستفتاءات كانت عن اليابان واللي بيحصل في ليبيا علي باب اللجنة الرجل كان بيشرح لست بسيطة علي مكان نعم ولأ وقالها في حرية راي انت تختاري اللي انت عايزها اللجنة جيدة جدا الصناديق كلها شفافة ومقفولة القاضي كان موجود التأكد من البطاقة والشخص كان كويس جدا ، ورقة الاستفتاء اتاكدت من الختم وبصت علي الناس اللي جنبي الورق كان مختوم العيب الوحيد هو إن الناس كانت بتصوت وهي جنب بعض عند الستارة اللي مكانوش بيستخدموها وإن في وعي قليل نوعا ما الرجل اللي كنت بتكلم معاه واحنا داخلين بيسالني مش المفروض اكتب اسمي علي البطاقة؟! فهمته إن كده غلط وإن ده يبطل صوته وإنك هتمضي في الكشف وإنت بتاخد البطاقة، مضيت في الكشف والرجل اللي في اللجنة بيشكرني ايوه أمين اللجنة أنا مكنتش مصدق ساعتها إن دي مصر وحطيت صباعي في الحبر الفسفوري وخرجت وأنا خارج كان في رجل كبير  فوق الستين سنة عمال يدعي علي مبارك وهو بيعيط خلاني  وخلي كل الناس اللي واقفة تعيط من كتر الدعاء اللي كان بيدعيه علي مبارك ،بجد المنظر العام في مصر حاجة تشرف بجد،أنا مبسوط وفرحان فرح  ومنشكح انشكاحة التنين الأزرق الناري ومحدش يسال هو ايه التنين الأزرق الناري :D


أنا بصراحة مشفتش سلبيات غير حكاية الستارة وتقريبا الموضوع ده منتشر عند ناس كتير كلمتهم وإن الوعي كان قليل وكنا محتاجين ننزل الشارع أكتر من كده بس في أماكن تانية في تجاوزات من التيارات الإسلامية مبالغ فيها علي توجيه التصويت نحو نعم وصل لحد تكفير من يصوت بلا بس كده كويس إنهم بيظهروا لناس حقيقتهم بدري بدري والناس فهمت الليلة وحالة الذعر اللي هما فيها وبتخليهم يتصرفوا بالطريقة دي أكبر دليل علي إنهم غير مقبولين في الشارع وحجمهم أقل مما يدعون بكثير.


عامة أنا راضي بنسبة كبيرة عن سير عملية التصويت وخاصة إنها تعتبر اول مرة في شوية حاجات بسيطة بس مش هتاثر علي نزاهة الاستفتاء خاصة مع نشاط المراقبين علي الاستفتاء ونزاهة القضاة في كثير من الأماكن.


النهارده الصبح في جولة التسوق المعتادة ببقي بحط سماعات الموبايل وأنا ماشي ، أنا بحط الأغاني عندي بحيث تشتغل بطريقة عشوائية أول أغنية سمعتها النهارده كانت يا نسمة الحرية لعبد الوهاب تفتكروا الموضوع صدفة؟!


ونسيت اقولكم أهم حاجة حصلت لي النهارده إن بسبب حالة الانكشاح والسعادة والفرح اللي أنا فيها نسيت بطاقتي جوه مع أمين اللجنة بعد ما مضيت وحطيت صباعي في الحبر الفسفوري وروحت ومفتكرتش إني ممعيش بطاقة غير لما قررت اكتب البوست ده ورجعت اللجنة خدتها وأمين اللجنة بيقولي احنا قعدنا ننادي عليك بس انت ولا كنت هنا :)


كلمة أخيرة  النهارده قلت رأيي الصبح والنتيجة هتظهر بكره أي كانت النتيجة أنا هحترمها حتي لو كانت عكس اللي أنا كنت أتمناه لكن السؤال الذي يطرح نفسه هل يستطيع الآخر أن يقبل هذا؟!



برغم إني مكنتش عايز اصورها لكن لذكري أول ممارسة ديمقراطية في مصر ولن تكون الأخيرة :)

Share |