الخميس، مارس 31، 2011

عالم عيال عيال … 9

مقدمة للتضامن ..

كلنا شخص واحد ..

لا بل كلنا كيان واحد ...

لا نحتاج لعنصرية ولا نحتاج لتحزب ....

*************

" يا مينا ، هتيجي تلعب ؟ "

" لا يا محمود ، خايف انزل من البيت "

ومرت أيام ...

" يا محمود ، هتيجي تلعب ؟ "

" لا يا مينا ، خايف انزل من البيت "

ومرت أيام ....

" واد يا مينا ، واد يا محمود ، انتم ما بتكلموش بعض ليه "

سأل كبير العيال مينا ومحمود هذا السؤال فرد محمود :

يا كبيرنا ، بصراحة كدا بقينا خايفين مينا وأنا نكلم بعض

وأكمل مينا :

اللي بيحصل يخلي كل واحد مننا ينظر للتاني نظرة كره .

تمتم كبير العيال بعبارات مبهمة ثم نظر لكلاهما وأشار لهما أن يحضرا إليه فهرول كلاهما وجلس الجميع على أسطح أحد المنازل وقال كبير العيال :

انتم عارفين التاريخ كويس ؟

هز كلاهما رأسه علامة النفي ، فاكمل كبير العيال ولم يعر انتباها لحركتيهما :

تاريخنا بيقول إننا هنا مع بعض من سنين السنين ، وجدود الجدود ، ما فرقش بينا أحد ، ولم يستطع ، لإننا كلنا بنبص للأرض دي ، اللي جمعتنا في مكان واحد ، والبلد دي اللي نسبتنا ليها علشان كدا كلنا هنا روح واحدة وحياة واحدة ، ولو الخطر هاجمنا زي ما عمل جدودنا احنا كمان هنعمل وهندافع عن أنفسنا ولا هنفرق مين فينا مينا ومين فينا محمود .

هز محمود ومينا رأسيهما علامة الموافقة فنظر لهما كبير العيال وسأل :

في عيونكم أسئلة يا ترى هي إيه ؟

سأل محمود :

في الحقيقة يا كبيرنا عايزين نعرف ليه حصل لنا اللي حصل دا ؟

فنظر له كبير العيال وأخذ نفس عميق ورد :

الحقيقة يا محمود ، اللي حصل دا لإننا عايزين إعادة تقييم من زمااااان ، عايزين نعدل الموازين علشان يبقى الميزان معدول ، لا زيادة ولا نقصان ، يعني التعليم عندنا محتاج يتعدل وكلنا متفقين على كدا ومن التعليم دا هنوضح للكل إن مفيش حاجة اسمها غرس الكره في النفوس عارفين ليه ؟

نظرا له وعيناهما تحمل الكثير من التسائل فاكمل :

العيب أه في المواد ولكن أصل العيب في اللي بيعلموا الطلاب والتلاميذ يعني مثلا مدرس مسيحي بيكره جاره المسلم فينقل الكره دا للتلاميذ ومدرس مسلم بيكره جاره المسيحي فينقل كرهه دا للتلاميذ ، وبالتالي الأطفال اللي زينا ، لسة عيال لما هتكبر هيكون جواها الكره دا اللي هو أصلا متسببش فيه علشان كدا لازم نخلي بالنا ونشوف المدرسين دول بينقلوا للطلاب لحب والخير والأمل والتفاؤل ولا الكره والظلم والضياع والفشل ؟

هو محمود رأسه ثم تنحنح مينا وسأل :

طب يا كبير ، ما فيه شيوخ بتفتي بموتنا وقتلنا ؟

نظر له كبير العيال ورد :

بص يا مينا ، ربنا الملك العدل ، وما بينزلش ديانة سماوية بتدعو للقتل ، والإسلام زي المسيحية بيدعي للخير والسلام والأمن ، حتى في أصعب الظروف ، وحتى لو فيه حروب فيه معاهدات وقيم ومبادئ والشيوخ دول ما يعرفوش حاجة عن الدين لإن الدين ما بيأمرش إنك تقتل لمجرد القتل ، لأ انت بتدافع عن نفسك ضد اللي بيهاجمك فقط ، لكن غير كدا دول ناس بتفسر على مزاجها ، وكمان عندك رجال من المسيحيين بيقولوا كلام يزيد من الفتنة والديانة المسيحية بريئة من كلامهم ، لكن بصوا لكلا الطرفين بيأخذ كلام الثاني ذريعة عشان يهاجمه ..

نظر له محمود ومينا ثم سأل محمود :

طب وحل الكلام دا إيه ؟

نظر لهما كبير العيال وأجاب :

الحل كان في إيد المسئولين ، كانوا حاسبوا كل الناس اللي بتتكلم بدون علم وبتسترزق من الدين وعمالة تتكلم بجهل لإن الأديان السماوية بتحض على العيش في سلام ومحبة وأمن أما غير كدا فمن أفعال البشر والبشر لازم يتحاسبوا على الأخطاء اللي بتسئ لناس تانية باسم الدين ..

صاح مينا ومحمود في نفس واحد :

واللي بيحصل اليومين دول مين السبب فيه المسلمين ولا المسيحيين ؟

نظر لهما كبير العيال ورد :

يا محمود انت ومينا ، الإسلام برئ من شرذمة جاهلة ما تعرفش حاجة وبتتكلم وبتعمل باسم الدين وبرئ من الهمجية بتاعتهم ، وكمان المسيحية بريئة من الشرذمة الجاهلة والعنصرية والهمجية بتاعتهم ..

وأخذ كبير العيال نفسا عميقا ثم قال :

العيب كل العيب ، في مَن يقول أنا ديني كذا أو كذا ، وهو بيتعامل مع غيره فأنت بتتعامل بأخلاقك ومبادئك وتعامل من أمامك على نفس الأساس فقد يكون الذي أمامك على نفس دينك ولكنه يسئ للجميع بأخلاقه والعكس صحيح ..

نظر له كلاهما وسأل مينا :

طب والأيام الجاية هنعمل إيه وهنواجه المشكلة إزاي ؟

هز كبير العيال رأسه وأجاب :

الأيام الجاية ما يعلم بها إلا الله ، ولكن علينا أن نقابلها كجسد واحد ونواجه أي تطرف أو عنصرية أو تحزب بقوة عشان ما يكبرش وما يوصلناش لحاجة أكبر من اللي بنشوفها دلوقتي ، بدل ما في يوم من الأيام نخلص على كل المصريين باسم الدين سواء كانوا مسلمين أو مسيحيين ..

ثم عاد ونظر لهما قائلا :

انتما الاثنين ، أساس ترابط هذا الشعب ، إن يوم كره مينا وجود محمود وكره محمود وجود مينا ، لن يكون هناك شعبا بل ستكون هناك مذابح دموية واعلما شيئا أن الذي يريد إهلاكك لن يفكر أيكم مسلم وأيكم مسيحي بل سيضع في رأسه إهلاك جنسية البلد التي تحملاها ..

واخذ نفسا عميقا وقال :

الموت لا يفرق بين مسلم ومسيحي ، فهو يختار الشخص ليس على حسب ديانته بل يختاره ولا يفرق بين وبين غيره عن طريق الديانة ، فحاولا انتما الاثنان أيضا ألا تفرقا بين بعضكما باسم الدين وعسى أن يفهم الجميع هذا ...

--------------------------------------

* ملحوظة :قد يكون ذلك البوست قديما ولكنه يناسب تلك الأحداث التي نحن فيها الآن ..

I.M.S.A

M.S.M.O

هناك 14 تعليقًا:

  1. معاك حق يا اسلام
    بس بجد مبقتش عارفة مين السبب
    والا جايز اكون انا السبب وانا مش عارفة
    بجد مخنوقة جدا
    ومعلش عشان بجد قفلت الكلام معاك
    ومتحاولش تتصل لاني اكيد مش هرد

    ردحذف
  2. رحاب :
    ولا يهمك المشكلة بجد في نفوس الضعفاء اللي بينفذوا من غير ما يفكروا
    //
    ما تقلقيش معييش رصيد عشان اتصل =))

    ردحذف
  3. مقال أكثر من ممتاز يا إسلام
    منى توفيق

    ردحذف
  4. hwa 7elw bas madash el7al
    wel 7war dah 7alo elwa7ed en 2lnas tefham ba3dha

    ردحذف
  5. خد راحتك في الجنان معنا حرية الرأي مكفولة للجميع حتي لو هتجنن علينا
    نظرا لوجود مشاكل في نظام التعليقات لغير معرفين برجاء عدم التعليق بغير معرف منعا لاختفاء التعليقات

    ده اكيد لشخص معين مش كده

    ردحذف
  6. مع انى كنت فاكر انها مدونتنا كلنا
    بس واضح ان الرد الاخير مضايق ناس
    تمام
    الرسالة وصلت

    ردحذف
  7. غير معرف لا أعلم ما المشكلة صراحة ولا أعلم ما الذي تقصده بتعليقك الجزء الأول ( خد راحتك في الجنان معنا حرية الرأي مكفولة للجميع حتي لو هتجنن علينا) موجودة منذ بداية المدونة الشق الثاني موضوع من شهر يناير نتيجة لو جود مشكلة تقنية عندنا في التعليقات الطويلة الغير معرفة ولا أمتلك الوقت الكافي لازم لإصلاحها ويمكنك أن تقرأ التعليقات الأخيرة في هذا البوست لتري سوء الفهم الذي حدث نتيجة تعليق طويل من غير معرف ولم ينزل وظن صاحيه إننا قمنا بحذفه
    http://klammganyn.blogspot.com/2011/01/blog-post.html
    لذلك قمت بإضافة هذا التنويه لأن الشق التقني والتصميمي والإدارة للمدونة أنا المسئول عنه مسئولية كاملة ونظرا لعدم استطاعتي في الوقت الحالي معالجة هذه المشكلة لذلك لزم التنويه حتي لا يظن البعض إن تعليقه حذف

    المدونة للجميع صراحة وليست حكر علي أحد ويسعدنا الثقة الغالية التي تمنحها إيانا وتشعر بإنها مدونتك
    ولا أعتقد إن هناك شخص عاقل يعبر عن رأي يظن إن الجميع سيتفق مع رأيه لا بد من حدوث اختلاف وإذا كانت جميع المواضيع في المدونة كل الزوار متفقين عليها فوجودها مثل عدمها لأن بدون الاختلاف لن تولد الأفكار والرؤي

    إذا كنت أنا أو إسلام نريد ارسال رسالة لأحد فلن يكون بأسلوب الأخ الأكبر والقمع وحذف تعليقات بل سنعلنها صراحة وستكون علي الملأ أو حتي إذا كان التعليق للرد عليه يريد بوست كامل فسنفرده له إذا كنا نمتلك الوقت الكافي لذلك
    بالإضافة أنا أو إسلام لا نتضايق من اختلاف الرأي فلا أعتقد إن رد أو تعليق سيضايقنا اللهم إلا إذا كان سب بعيد عن الموضوع مثلما حدث من قبل بالإضافة إذا كنت لا احترم رأيك المختلف فلا يحق لي الحديث إذا لإني عندها سأكون مجرد ديكتاتور

    تحياتي لك وأتمني إن تكون هذه الرسالة العلانية وصلت لك

    ردحذف
  8. منى توفيق :
    شكرا لك على رأيك ويسعدني تواجدك داخل البوست

    ردحذف
  9. غير معروف :
    وضعت حل من وجهة نظري في افهام من يقومون على تربية الأطفال حتى لا يتم غرس الكره بداخلهم من الصغر ..
    الحل قد يكون طويل المدى ولكن اثره سيكون بليغا ..
    //
    اتمنى أن يفهم كل البشر معنى الوحدة والاتحاد والمواطنة .
    ::
    يسعدني تواجدك ومشاركتك

    ردحذف
  10. غير معروف :
    المدونة مدونة الجميع ويحق للجميع المشاركة فيها وليست حكرا على فكر معين بل هي ساحة لتلاقي الافكار والاراء من اجل الوصول لحلول عديدة ..
    الاختلاف في الرأي لا يفسد للود قضية وكما وضح المجنون 2 " محمد " ان الاعتراض يكون على التعليقات التي بها اساءة مباشرة او سب او قذف اما دون ذلك حتى لو اعترضنا في كافة النقاط فهذا لا يعني نظام مراقبة الاخ الاكبر او الديكتاتورية بل هي مساحة للجميع للتعبير عن الاراء والحريات ..
    ::::
    منور المدونة دائما ..

    ردحذف
  11. ما احنا طول عمرنا مع بعض انا باللعب مع مارسيل وماريان
    ومحمود واحمد مع مينا واسحق ومحدش قال دا مسلم ولا مسيحى
    والفتنة اشد من القتل لو الفته دخلت وسطنا يبقى كدة هلكنا

    ردحذف
  12. سمراء النيل :
    دا الطبيعي لكن للاسف ناس كتير ما بتعرفش دا ووبتسير وراء كلام فارغ يؤدي بالمسيرة الى اسوأ ما يكون
    تحت اسم الدين والتفسير على حسب الرأي والقناعة الشخصية وليس على حسب التفسير الصحيح دون تلك الفتاوى التي تعتبر مهزلة
    //
    منورة البوست

    ردحذف
  13. فى وقت كنيسة القديسين ، واحد كتب على الفيس تعليق فى بوست متعصب .. المهم الشخص دا بيقول انا مسيحى وليا صحاب كتير اوى مسلمين بس عايز اسألكو .. انا مرة سمعت فى المترو واحد مشغل فيديو شيخ بيقول دماء النصارى واموالهم ونساءهم حلال للمسلمين .. ايه رد الاخوة المسلمين الموجودين ؟
    طبعا محدش رد عليه ..
    الامام الغزالى بيقول "إن انتشار الكفر في العالم يحمل نصف أوزاره متدينون بغضوا الله إلى خلقه بسوء صنيعهم وسوء كلامهم"
    و فيه تعصب من الطرفين ، جدا وبنسمع كلام غريب من الفاتيكان ومن رجال الكنيسة احيانا
    بس بيتهيألى ان التربية هى الاساس ، واكيد الام اللى توصى ابنها ميسلمش على زميله المسلم ، هى نفس الام اللى تمنع ابنها انه ياخد حاجة من زميله المسيحى
    ...
    بوست جميل بجد وياريت منحتاجوش الفترة الجاية

    ردحذف
  14. بلاك بيرل :
    اتمنى ان التعصب ينتهي امره في هذه البلد بل في جيمع انحاء العالم ولكن المقلق ان التعصب في كل شئ في حياتنا ، الكرة ، الدين ، وحتى المؤيدين والمعارضين للرئيس السابق p:
    //
    منورة البوست :)

    ردحذف

خد راحتك في الجنان معنا حرية الرأي مكفولة للجميع حتي لو هتجنن علينا
نظرا لوجود مشاكل في نظام التعليقات لغير معرفين برجاء عدم التعليق بغير معرف منعا لاختفاء التعليقات