الخميس، فبراير 04، 2010

21 عاما ....ومائة تدوينة

أحتفل اليوم بمناسبتين
أولا: عيد ميلادي 21
ثانيا:أن هذه هي التدوينة المائة
فقررت أن أشرك فرحتي هذه مع جميع زوار المدونة المقيمين عليها والعابرين
والبوفيه مفتوح للجميع
و شوية التورتات دول لي حاجة بسيطة كده
علشان اتغذي وابوظ الريجيم اللي أنا مش عامله





















بالنسبة للمدونة كفاية عليها التورتة دي دي يدوبك 100 موضوع

21 عاما علي هذه الأرض أي مايقرب من نصف عمري
إن لم يكن أزيد
إذا نظرت لهذه السنوات
لأبحث عما حققت في حياتي
و ما الذي أتوقع أن أفعله خلال السنوات القادمة
سأجد أن أفضل شئ في حققته في حياتي
هم أصدقائي
أستطيع أن افتخر بأن ما حققته علي هذه الأرض
هم أصدقاء أحبوني وأحببتهم
وقفنا معا في مواقف صعبة ومؤلمة
كنت أتمني أن أضع صورهم الحقيقة لكن لم أستطع طلب هذه الصور منهم
نظرا لضيق الوقت و انشغال الجميع بالامتحانات
لذلك وضعت صور رمزية لتعبر عن رؤيتي لهم


حجاج (شيكو)
بصراحة احترت بين مارتن لورنس و ويل سميث
علشان تكون صورة رمزية تعبر عن حجاج
فقررت أحط الاتنين لإني شايف أنه شبه مارتن بروح ويل سميث
أول مرة قابلته كنت لسه في إعدادي هندسة
في سكشن وصفية كنا بتناقش علي إسقاط المخروط
مكنتش أعرف إنه هيبقي زميل كفاح
وإن مخه هيضرب وهيحول من عمارة إلي مدني
علشان أقابله في أول سكشن رسم في أولي
برغم إنها كانت أكثر مادة محبتهش
لكنها كانت السبب في إني اتعرف
علي صديق بمعني الكلمة
ابن بلد وجدع و صاحب صاحبه
هيصاحبني في رحلة كفاح خلال كلية أشبه بجحيم دانتي
ومقدرش انسي وقفته معي يوم خطوبتي
كفاية إنه فضل صاحي معاي لغاية الظهر تاني يوم
أنا بجد بشكر الظروف اللي خلتني أعرف صديق مثلك يا حجاج

ضياء
ضياء بيفكرني بهارجاريد من هاري بوتر
إذا حكمت عليه بالشكل ستحكم عليه خطأ
يحمل بين طياته قلب برئ نقي
ووجه يعبر عن براءة الأطفال
وقابلته أيضا في سكشن رسم بس رسم إعدادي
كان لسه راجع من كويت بعدد قليل من اصدقاء
وأغلب الناس تحكم بالشكل فلم تكن تريد التعرف عليه
بس بجد قلبه كبير غير كمان يعتبرعبقري المجموعة
من غير قر ولا حسد تقديره كل عام جيد
ضياء قلبك زي عقلك كبير
بس ارحمني من الكلام عن الاستيل
علشان المادة دي دمها تقيل

محمود أشرف و إيهاب

مش هلاقي أحسن من Gyro Gearloose -عبقرينو-
وتمثال Le Penseur - المفكر لرودان-
علشان أعبر عن اتنين من أعز الأصدقاء
محمود أعرفه من أيام الثانوية
من أيام درس الرياضيات عند عمه جمال
بحس معاه إنه مرايتي بجد
أكتر حاجة بتعجبني فيه إنه بيفكر
وطبعا كمان مدني زي حالاتي
أي نعم أنا في عين شمس وهو في الزقايق
بس الجنون الهندسي لا يوجد له حدود
غير كمان إحنا الاتنين بنلعب hitman
ومستنيين نحدث الأجهزة علشان نعرف نلعب الإصدار الآخير منها
- محدش يتبرع لنا بأجهزة علشان نعرف نلعب -

إيهاب حبيب قلبي أنا عارف إني مقصر معاك
بس إنت عارف الظروف
وحشني المشي معاك وكل واحد بيكلم التاني عن مجال تخصصه
إيهاب هندسة اتصالات كل سنة الحمد لله تقديره جيد جدا
أعرفه من أيام إعدادي وقت ما كنت لسه منتقل جديد لعاشر
بس مقربناش من بعض غير في أيام الثانوية
علشان دروسنا كانت مع بعض

محمود وإيهاب معزتكم في قلبي كبيرة
وخاصة أنكم من الناس القليلة اللي بعتبرها مراية لي
وأتمني إني أشوفكم قريب



أحمد أخو سامر

دي أحسن صورة ممكن تتحط لواحد طوله 2 متر وبيلعب سلة
أحمد قبل ما يكون صاحبي فهو جاري و تقريبا أحسن جار سكنت جانبه لفترة طويلة
كنت بطلع عينه في مشوايري بالعربية بتاعته
وطلعت عينه وأنا بعزل
واتبهدل علشان يجي يحضر يوم الخطوبة
- بصراحة البهدلة بتاعة يوم الخطوبة تنفع فيلم كوميدي يحقق أعلي الإيرادات -
يعني بجد لو حد غيره كان قالي مش عايز أعرفك بعد النهاردة

أتمني أيضا أن ألقاك قريبا مع أخواتك سامر والتوأمين الحلويين مهاب وساندرا


كريم البنا (كيمو كونو)
دي أحلي صورة ممكن أحطهها لكريم
لأنه بيفكرني بعلاء ولي الدين
كشخص وكأسلوب
بحب قعد معاه و اتكلم معاه
لأنه بجد من أجمل الشخصيات
اللي عرفتها في حياتي
أعرفه من أيام الثانوية
ومهما قلت عنه مش قادر أوافي له
معزته في قلبي
كفاية الضحكة الصافية اللي بتطلع في قعدتنا

كريم وحشتني قعدة المذاكرة بتاعة شقة العزاب
بس سيادتك ميكانيكا وأنا مدني
والاثنين لا يجوزوا لبعض
بس علشان خاطرك هنجوزهم لبعض


أبو عوف
أبو عوف البرنس الكبير الصورة مرسومة عليك
أبو عوف عشرة ديسك واحد3 سنين عرفته من ساعة ما اتنقلت العاشر
وفي بيني وبينه قصص كتير مبتخلصش
بس مفيش داعي للفضائح
علشان الواد برضه مننا وعلينا
ومش هنقول إنه كان بيغش علي ورق مناديل
ولا أي حاجة
خليني قاعد ساكت أحسن بدل ما ننضرب
أبو عوف أكتر واحد استحمل هزاري الرخم اللي كان غالبا
بيتسبب بإصابته بإصابة جسدية بسيطة

أبو عوف وحشتيني قعدتك علي المشربية
وسواقتك وياريت أشوفك قريب ومتهربش زي العيد اللي فات
او تقولي ساعة واحدة وتيجي تاني يوم ما أنا عارف توقيت عيلة الطحان
الساعة عندهم بيوم


إسلام

سبتك في الآخر لغرض في نفس يعقوب
طبعا أنا عارف مستوي ثقافتك فمش هتعرف صورة مين دي
دي صورة Mr. Burns من مسلسل The Simpsons
طبعا أنا حطيتها علشان أنا رجل طيب
ومرضيتش افضحك واحط صورة كوهين اليهودي
اللي هو ابن عمك.
إسلام يا جماعة عشرة عمر طويلة وبعتبره أخوي فعلا
والله يرحم القصص اللي كانت بتتبدل و بتتحط في الكتاب
ونقعد نقرأ فيها والشرح الغير مفهوم شغال
بالإضافة إنه يعتبر السبب الرئيس في وجود هذه المدونة
وسبب مهم في انتشارها وجلب الزوار .
غير كمان بيني وبينه حاجات كتير مشتركة مهما قلت مش عارف أعدها.
طبعا علشان أنا راجل طيب فأنا شايف كفاية عليك فضيحة إنك يهودي
ومش عايز أفضح أكتر من كده ونقول علي الحاجات اللي بتحصل
ومحدش يعرفها شوفت أنا راجل طيب إزاي.

إسلام طبعا مينفعش أقول إني عايز اشوفك لأني بشوفك
أكتر ما بشوف نفسي - أصلا معندناش مرايات في البيت -
بس بجد أكتر حاجة بتعجبني في صداقتنا وناس كتير لم تفهمها بعد
هي روح التعاون والجماعة إننا واحد مش اتنين.


(أحمد علاء) و( أيمن صلاح) و( جمال )
و (حمدي )و(خالد عبد الناصر) و(عادل أمين)
و(عمرو طارق) و(كريم حسين)
و (كريم عرفة) و( محمد حازم) و(محمد سيد حسن)
و(محمد ضياء) و( محمود رجب) و(مرسي) و ......


كل أصحابي بجد أنتم أحسن حاجة حققتها في حياتي وكل شخص فيكم
له مكانة غالية داخل قلبي
كنت أتمني أن أكتب عن الجميع ولا أذكر الاسم فقط
كنت أتمني ولكن ليس كل ما يتمناه المرء يدركه
أتمني للجميع من كل قلبي أن يحقق النجاح في حياته
وأن يتعرف علي المزيد من الأصدقاء والأصحاب
الذين يدركون معني الصداقة الحقيقة وليس مجرد صداقة ظاهرية
وأعتذر لأي صديق سقط اسمه سهوا عني
♥ღ♥ღ♥ღ♥ღ♥ღ♥ღ♥ღ♥ღ♥ღ♥ღ♥ღ♥ღ♥ღ♥ღ♥ღ♥ღ♥ღ♥ღ♥ღ♥ღ♥ღ♥ღ
بالنسبة لاحتفال بالمدونة لتدوينة المائة في خلال ما يقارب ثلاثة أشهر
وبالتحديد من 16/11/2009
إلي 4/2/2010
استطعنا أن نحقق تقدم كبير سواء إن كان في المواضيع المتنوعة
أو في عدد الزوار
حسب إحصائيات GOOGLE
حصلنا علي حوالي 1200 زيارة من 27 دولة
في مقدمتهم مصر ثم السعودية
بمتوسط 3 صفحات في زيارة الواحدة وبمعدل 6 دقائق للزيارة الواحدة علي الموقع
وبمتوسط 20 زيارة في اليوم
16%من الزوار يأتون مباشرة
17% يأتون عن طريق محركات البحث
الباقي يأتي عن طريق Referring Sites
أما أكثر ما يثير السخرية
فإن أكثر كلمتين يؤدوا إلي المدونة هم تكت وفوازير جنسية
الأولي تؤدي إلي موضوع شباب تكت والثانية لفوازير رمضان
في النهاية أشكر جميع الزوار الذين تفاعلوا معنا
وأهدي لهم أفضل المواضيع من خلال مائة تدوينة
وأعدكم أن المواضيع القادمة أقوي


وكل سنة والجميع بخير

هناك 5 تعليقات:

  1. happy birth day again
    وشكرا على البوفيه
    وواضح ان اصدقائك توليفه رائعه
    ملهاش مثيل
    واشكرك شكر شخصى
    لوضع صوره اسلام
    وانا مش شايف فرق بين مستر بيرن
    وبين كوهين

    ردحذف
  2. مستر بيرن أكثر خبثا من كوهين
    بس لإمانة إسلام عنده شعر وعينه ملونة
    وعايز أجوزه وأفرح بيه

    ردحذف
  3. على الرغم من إني المفروض
    ما ادخلش النهاردا وانت عارف كويس
    بس رسالتك امبارح اثارت فضولي اني ادخل
    وطبعا عيد ميلادك 21 اللي بيثبت انك خلاص ما بقتش
    قاصــــــــــر ، قلت ادخل اقول لمحمد على المدونة
    كل سنة وانت طيب وعقبال " مش هقول اد ايه عشان ما افرحش فيك " تقريبا انت ذكرت الكل
    من عوف للبنا لأبو رجب وأشرف تقريبا ذكرت فصل 1/1 كله
    وكمان ضفت البرنس حجاج فتحية لفريق دربك المذاكري بعد إعتزالي عن هذا اللقب فى الثانوية العامة ..
    طبعا حضرتك ذكرت كل حاجة لكن مش عارف ليه يا أضوي مذكرتش أيام الهروب من المدرسة طالما ذكرت القصص ..
    ولا حصة اللغة الإنجليزية اللي كنا بنستناها " عشان نتخنق من المدرس ونقوله انت ما بتفهمش حاجة " ..
    تقريبا كدا يا محمد تاريخي وتارخك مش محتاج نقوله لإننا كدا كدا بنقوله دايما بينا وبين بعض ..
    وبخصوص الجواز يا رفيق الدرب والكفاح المسلح
    مش هخليك تفرح فيا ولو فرحت بيا مش قبل ما أفرح بيك يا كبير ..
    كل سنة وانت طيب يا محمد
    ويا رب يديم الأخوية بينا
    ومبروك علينا المدونة

    ردحذف
  4. يا حبيب قلبي إنت عارف في حاجات تانية مستخبية
    بس كفاية فضايح لحد كده علشان صورتك العامة أمام الوطن العربي

    ردحذف
  5. happy birthday :)
    وكل سنة والمدونة دايما فى جنون مستمر :)
    وربنا يديم عليك اصحابك ويخليهم ليك لان احلى حاجة فى الدنيا هيا الاصحاب اللى بجد

    ردحذف

خد راحتك في الجنان معنا حرية الرأي مكفولة للجميع حتي لو هتجنن علينا
نظرا لوجود مشاكل في نظام التعليقات لغير معرفين برجاء عدم التعليق بغير معرف منعا لاختفاء التعليقات