خرسانة + ستيل + قط = تيييييت

تييييييييييييييييييييت

أنا بحاول أحافظ علي المدونة نظيفة بس

بصراحة اللي بيحصل حوالي مش هيخلني امسك لساني كتير

الجمعة اللي فاتت المفروض كنت ابتدي في تصميم ورسم سيستم إنشائي

جميل كده وحليوة علشان هسلمه يوم السبت الصبح مفيش مشكلة كده

واليوم اللي بعده عندي رسم 3 لوح عواميد استيل وكويز علي الماشي

وديزاين عمود صغير كده عليه ونش بيتحرك فوقه ايه المشكلة؟

كليتنا واتعودنا علي البهدلة فيها

مش مشكلة إن دكتور الاستيل بعد ما لاقي نسبة نجاح الترم الأول

10% بحالهم قرر إن أي شخص يجيب أكتر من 6 من 10 في أي شيت

هيجيبه هو والمعيد اللي صحح له الشيت عنده في المكتب

حتي يعرف كيف ارتكب هذه الجريمة الشنعاء في حق هذه المادة الرائعة ؟

ايه المشكلة لما بيطلع عينك في رسم لوحة بتاع 3 - 4 ساعات إن مكانش أكتر

وفي الآخر يديك صفر ليه ؟ علشان سيادتك رسمت مسمار 2 مللي بايديك عيب كده يا بشمهندس

حد يرسم حاجة 2 مللي بايديه برضه إنت اتجننت .

بس كل الكلام ده مش مشكلة

كليتنا واتعودنا علي البهدلة والمرمطة فيها عادي

المشكلة الحقيقة إني لما أنام وأصحي ألاقي واحد

تييييييييييييييييييييت وابن تييييييييييييييييييييت

زي ممتاز القط وهولا ممتاز ولا يحزنون وخلتني اكره

كل فصائل القطط مع إنهم حيواناتي المفضلة

يكتب مقال زي المقال ده

المقال

أنا حطت المقال علشان مش أنا لوحدي اللي اتفقع لازم تشاركوني

ويضيف عليه كمان كاركاتير تحفة زي ده

يبقي كل اللي قادر أقوله بعد المقال ده يا أخي تييييييييييييييييييييت

وأنا قاعد أقرا المقال كنت هعيط خلاص مش قادر

أكيد الراجل ده بيتكلم عن بلد تانية بس في تشابه في الأسماء بين البلدين

أو أنا اللي بشوف نص الكوباية الفاضي ده إذا كان في كوباية

يبقي العيب في أنا لقد اصبحت أعمي لا أري إنجازات هذا العصر المبارك بالجمال والعلو

وبصراحة اتفقعت لما القط ينونو ويمسح جسمه في صاحبه ويقول

في السما اللي كتبت منها في 73 أحلي أنشودة للنصر

- ده علي أساس إنه كان بيحارب لوحده ومحدش معاه ومفيش خطة طويلة المدي أو أي تجهيزات قبل الحرب فعلا أنا مكنتش أعرف المعلومة دي قبل كده -

يوميها بس يا سيادة الريس عرفت إن الرئاسة مش جاه وأبهة وبروتوكولات وموتوسيكلات

- فعلا وتضبيط مصالح ولعب من تحت الترابيزة وإنك تذل شعب بالكامل هيموت علي رغيف عيش أو يطلع عينه علي أنبوبة بوتاجاز

علشان يعمل كوباية شاي مش هيطبخ علشان مفيش حاجة يطبخها وإن شباب يموت في وسط البحر لأ فعلا مهامك صعبة ياريس وخاصة في اختيار زبانية الجحيم -

لكن دايما إحنا بننسي .. أصلنا طماعين !!

- العيب طلع فينا احنا إحنا الكفرة التي لا تشكر إلهها علي ما منحها إياه

بس يا راجل ده إحنا طلعنا وحشين قوي ومش عارفين -

وإنت طلعتنا من القمقم يا ريس .. كنا فين وبقينا فين .. معدش حد في وجودك يا ريس ممكن يروح ورا الشمس .. وزوار الفجر يا ريس .. خدوها من قصيرها من يوم ما اختارك شعبنا عشان تكمل بينا المشوار .

- فعلا هم مبقوش زوار الفجر هم زوار طول الوقت

ومحدش بيروح ورا الشمس علشان ورا الشمس اتملي علي يد الفرعون السابق فبقوا بينزلوا تحت الأرض -

حتي في خبر ظريف جدا يدل علي صحة كلام نونوة هذا القط الصغير الذي يرتمي في أحضان سيده

اقتحام أمن الدولة لمنزل طالبة في جامعة عين شمس بحثا عن توكيلات

كده كفاية علي قوي من نونوة ابن تييييييييييييييييييييت ده علشان المرارة اللي اتفقعت

والمقال لينك بتاعه فوق بس أصحاب الأمراض وأصحاب الضمائر النظيفة وأعداءالنفاق

لا أنصحهم بقراءة هذا المقال حفاظا علي صحتهم ومنعها من التدهور

في الآخر مقدرش اقول حاجة في ابن تييييييييييييييييييييت

أكتر من اللي قالته الموسوعات دي عليه وسيوصم بالعار حتي نهاية التاريخ بأنه كلب من كلاب الدولة حتي القطط والكلاب بريئة منك ومن نفاقك أيها تييييييييييييييييييييت

ممتاز القط في وبيكيديا

- ملاحظة بسطية كان مكتوب فيها أن ممتاز القط هو كاتب صحفي ورئيس تحرير جريدة أخبار اليوم المصرية. منافق وكلب من كلاب الدوله لكن قامت إدارة الموقع بحذف الجزء الخاص بالسب -

ممتاز القط في المعرفة

- كنت اتمني أن اتكلم عن موضوع الملوخية وإنه كان خرمان علشان مفيش كوباية شاي يحبس بيها بعد الهبر اللي أكلها بس بصراحة حيوان زي ده كفاية عليه كده -

إذا لم أظهر خلال أيام اعلموا إني ذهبت لألمانيا لإجراء جراحة لمرارتي المفقوعة تضامنا مع سيادة رئيس الجمهورية واترجاه إنه يحنن قلب دكتور الاستيل علينا علشان نعدي من أم السنة اللي مش باين لها ملامح

M.S.M.O

I.M.S.A

Share |