الجمعة، يناير 01، 2010

شباب تكت وعايز يتنكت ....

هناك شباب تكت ...

وإن كنت لا تعلم التكت ،

فالتكت يا ... هو تلك العلامة التي تجدها على المقتنيات ، والتكت هو ما تجده على المواد البلاستيكية أو الصينية ..

بينما عايز يتنِكِت وإن كنت لا تعلم النَكْت ، فانت يا .... لو جلست فى منزل مصري أصيل تجد الزوجة أو الأم لمصرية تقول لك البيت مترب وعايز يتنكت نكتة جامدة عشان ينضف ..

هكذا انت علمت معنى التِكِت والنَكْت

وشباب اليومين دول تشعر إنه شباب تيت ومحتاج أمور تنكته تجعله انسان منضبطا مرة أخرى ..

شباب تكت وعايز يتنكت :

الشباب الذي يسير مسقط لك البنطلون ولابس لك حزام عريض والبنطلون واقع لأبعد مدى وماشي كدا ولا كأنه مثلا بردان وكأن عادي يعني وبارد وهو ماشي والمفروض إن الكل يعمل كدا ويمكن لو ما عملت كدا تبقى انت الشاب اللي مش تمام ..

( لازم تاخد بالك من البوكسر ..

الله يخرب بيوتكم عرتونا )

شباب تكت وعايز يتنكت :

الشباب الذي يسير ضارب نظارة شمس بعشرة جنيه من العتبة " على فكرة تُباع بسبعة جنيهات عند سلم مترو جامعة القاهرة " ويشعرك إنه من بلد ثانية أو إنه ابن وزير الشباب والرياضة وتجده يسير ولا يرى سوى نفسه

"يذكرك بالحرس الخاص لن نقول حرس الحدود " ..

شباب تكت وعايز يتنكت :

الشباب الذي تجده فى أي خناقة يقوم بسرعة الصاروخ شد الحزام " أبو توكة كبيرة عشان تظبط تسقيط البنطلون " وداخل مكشف ويضرب يمين ويسار وكأنه عنترة بن شداد وطبعا النظارة موجودة والبنطلون مسقطه " اتساءل لماذا لا يسقط البنطلون نهائيا فى تلك المشاجرات ، اعتقد إنه ستر ربنا " ...

( ما شاء الله تجد مجموعة من الشباب فى الخناقة يا اما على بنت يا إما سبب تافه ) ..

شباب تكت وعايز يتنكت :

الشباب الذي تجده يسير والسيجارة فى فمه ولا ول سميث والسيجارة على جانب فمه مثلما كان يفعل زعيم العصابات ، وتجده حين يُطلب منه جريتين تجد السعال زي الفل وإن سألته تجري جريتين يقولك انا مستعد ألف الإستاد كله فى سجارتين ..

شباب تكت وعايز يتنكت :

الشباب الذي تجده يسير مع فتاة وحين تحادثه تجده اندفع مثل العملاق الأخضر للزود عنها ، وبعد ما يمل منها يقول لها أكيد هتلاقي انسان أحسن مني ويقدر مشاعرك ، وحين تنظر له وهي معه يقولك يا عم هتجوزها ودي خطيبتي " احنا كنا كدبناك لكن لو هي خطبتك فعلا وبتحترمها هتخلي الكل يتكلم عليكم " ...

شباب تكت وعايز يتنكت :

الشباب الذي تجده فى المترو واللبان فى فمه ويلبس نظارة شمس فى محطة مبارك وينظر لك من خلف النظارة

" ماشاء الله الشمس وصلت لتحت الأرض وفى النفق ولا يمكن والله أعلم يكون عم الشباب دا طه حسين "

شباب تكت وعايز يتنكت :

الشباب الذي تجده فى وسائل المواصلات جالس ويرى النساء وكبار السن ولا يقم ليجلسهم بمبدأ إنه ما صدق لقى مكان فاضي يتحشر فيه أو يمكن يقولك اقوم لهم ليه ؟ هم كانوا من بقية عيلتي ..

" افرض السيد الوالد أو السيدة الوالدة كانت مكان هؤلاء ، يا ترى هيكون ردة فعلك ايه ؟"

شباب تكت وعايز يتنكت :

الشباب الذي تجده فى الكافيهات يشرب سجائر وشيشة طول الليل ويصحى من الفجر عشان خاطر يقابل مزة جديدة أو ميعاد مع البنت بتاعته ..

" شوفه بقى لو فى وظيفة أو حتى يصحى يصلي الفجر نفسه مكسل ونايم تحت اللحاف ، يا عم النوم سلطان والجوع كافر " ...

شباب تكت وعايز يتنكت :

الشباب الذي تجده يشيت طوال الليل وجالس ع النت ويلعب كونكر ويصحى تحت عينيه سواد " على فكرة ممكن لا تكون عالم إن كان سواد من قلة النوم والشات أو من البانجو والحشيش " ..

" ويمكن لا تجد الحشيش بعد نظرية بانجو لكل مواطن "

شباب تكت وعايز يتنكت :

الشباب الذي تجده يحشش ويضرب بانجو ولو وصلت للأفيون موجود ولو معاه فلوس الهيروين يا ريت ، ويكلمك بكل ثقة عن ضرر التدخين ولا يحدثك عن ضرر الحشيش والمخدرات ..

( التدخين حاجة والحشيش حاجة تانية )

شباب تكت وعايز يتنكت :

الشباب الذي يشعرك بأنه واصل لكل شئ فى البلد طالما الجلسة فيها بنات ويرسم الدور أمامهم وفى النهاية تجده لا يعرف حاجة ..

" لو سألته مَن رئيس الحركة الفلسطينية لا يعلم ولكن إن سألته عن أحدث أغاني بدوي هتلاقيه بيجاوب زي الباشا "

( مين هيعرفه على بنات بدوي ولا حد تاني )

شباب تكت وعايز يتنكت :

الشباب الذي تجده فاتح لك القميص ومبين لك شعر الصدر حسين ولا كأنه أحمد رمزي فى زمانه ، ولا تدري هل هم شباب تتامري أو بدوي..

" الناس دي ما بتحسش ببرد فى صدرها ولا بيطبقوا دعاء اللمبي ( قلبي وشعر صدري غضبانين عليكِ ) "...

شباب تكت وعايز يتنكت :

الشباب الذي تجدهم فى الأفراح والمناسبات وأعياد الميلاد وغيرها يهزون وسطهم ولا أجدع رقاصة فى شارع الهرم لا والأكثر ولا سامية جمال فى زمانها وتجدهم يا عيني يرعشوا ويعملوا مثل الراقصات وينقصهم تقريبا إنك تخرج ورقة بخمسة وتنقطهم ..

( أخرهم خمسة جنيه لكن لو معاك عشرة انت حر ..)

شباب تكت وعايز يتنكت :

تجدهم راكبين سياراتهم ويسيرون بها ويتسابقون ولا كأنه فى دوري سباق السيارات وتجدهم يسيرون بسرعات جنونية ويجب أن يقود السيارة بذراع واحدة ولا أنجلينا جولي فى فيلم " Wanted " وحين تمر بسيارتك بجواره تجده ينظر لك شذرا وكأنك انت الغلطان ..

( باباه جاب العربية ومامته اعطته المفتاح دخلك انت ايه يا سخيف ؟ )

شباب تكت وعايز يتنكت :

الشباب الذي تجده واضعا اللبانة فى فمه مثل النساء ويرغي ولا أجدعها جلسة حريم وينم على كل البشر ولازم يجيب سيرة سوسو ولولو ويقولك أخر خبر إن بيبو فرقع جيجي ...

( ما هو لو مش عايز يتنكت مش هيقعد ويلعب بقه باللبان عمال على بطال )

شباب تكت وعايز يتنكت :

الشباب الذي تجده عبيط وأهبل وبيستهبل من أسرة العبيط باشا سخصيا حين تحدثه عن أخطائه وأن المفروض ألا يقوم بتلك الأمور ويخبرك بكل سخافة إنه لا يقصد وإن الأمر خارج عن إرادته حين يعاكس فتاة ويجد مَن يرد عليه كمثال ..

( طيب عملته ليه أصلا ولا لما خرج ليك واحد يرد عليك بقيت أهبل وعبيط )

شباب تكت وعايز يتنكت :

الشباب الذي تجد الأسورة أو الإنسيال فى يده وحين لا تجد الأسورة أو الإنسيال تجد ساعة تشبه ساعة بدوي فى يديه وكأن المفروض إن هذا الطبيعي والمفروض يمشي كدا لو مش عاجبك اعمل زيه ..

( بيحاول بكافة الطرق يلفت الأنظار تقريبا يا ضعف شخصية يا ضعف نظر )

شباب تكت وعايز يتنكت :

الشباب الذي تجد السلسلة فى رقبته ولا أجدع كلب دوبر مان فى البلد ومش بعيد يشترك بعد كدا فى كلاب الشرطة وتجده فاتح القميص للآخر عشان يعرفك إن النجم لابس سلسلة ومش بعيد يلبس لك ذهب ويقولك مش غلط ..

( بتفهم فى الموضة ، لأ ، طيب يبقى اتعلم وهتعرف أي نوع من الأجناس بيلبس الحاجات دي )

شباب تكت وعايز يتنكت :

الشباب الذي تجدهم يسيرون يهزون فى وسطهم وهم ماشيين ويشعرونك إنهم من الجنس الثالث أو هناك أمرا ليس مظبوطا فيهم لا تعلم هل يتعلم كيف يكون فتاة مثلا ؟؟

( تجده يمشي وهو بيهز زي البنت اللي لابسة كعب عالي )

شباب تكت وعايز يتنكت :

الشباب الذي تجده فى المترو أو أي وسيلة مواصلات واقفا على الباب ولا ينزل فى المحطة التي يقف بها المترو وتجده واقفا ضارب لك نظرة الغبي بيه ابن تخلف باشا وعجبك عجبك مش عجبك اضرب رأسك فى باب المترو أو انزل المحطة التالية ..

( يا عم الغلس باشا اركن على أي جنب فى المترو خلي الناس تعرف تنزل ) ..

شباب تكت وعايز يتنكت :

الشباب الذي يصعد إلى وسائل المواصلات من أتوبيس لمترو وحتى لو كان توك توك ليس من أجل الوصول للمكان الذي ينشده لكن فقط لكي يميل على هذه ويلمس هذه !!!

" لو المصونة اختك كانت مكان البنت اللي انت لمستها دي كنت هتقبلها على أختك ولا أيه ظروفك ولا اختك مش ممكن تقع فى موقف زي دا "

شباب تكت وعايز يتنكت :

الشباب الذي تجده ضارب لك النظارة وفاتح لك القميص وواقف على ناصية أي شارع وواقف يعاكس فى تلك ويلقي بكلامه على هذه ويرمي بكلمة وتيجي تكلمه يقولك احنا بنتسلى ..

" طيب ما ممكن برضو حد يتسلى بحد من عندك ولا ساعتها ممكن تتشاجر ، سؤال لو حد من عائلة الفتاة التي تعاكسها تشاجر معك ماذا ستفعل ؟ "

شباب تكت وعايز يتنكت :

الشباب الذي تجده فى الأفراح والمناسبات ذاهب فقط لكي يشرب الحشيش أو البانجو لأنهم متواجدون بكثرة فى تلك المناسبات ويجعلك متأكدا من أمر واحد وهو أن الشباب أصحاب دماغ عالية جدا ..

( أعلى من برج القاهرة بدورين ...) .

شباب تكت وعايز يتنكت :

الشباب التكت فى كل حتة فى مصر لدرجة تشعرك إن كل الشباب عايزة تتنكت أو على الأقل محتاجة تتنضف من جديد أو يبقوا شباب أو بمعنى أصح رجالة بدل لعبة التخفي دي ..


I.M.S.A.

M.S.M.O

هناك 4 تعليقات:

  1. klam gamil,,,,bs aked enta betekalem 3la el 3'alebeya el 3ozma mn el shabab de ,,,maho mesh kol wa7ed m3ah 3arabeya w mashy bosor3a yeb2a 3ayez yetneket maho momken yeb2a mesta3gel walla 7aga

    gr8 topic ya sa7by

    ..:: Hoksha ::.. ( Mohamed Hazem

    ردحذف
  2. Mohamed Hazem
    mnwar mdwant el mganyn
    shokran 3la el mror

    ردحذف
  3. أما شباب عايز يتنكت صحيح
    :))))

    بجد إنت ذكرت مواقف هنا في الجون
    وفعلا هو ده بقى حال أغلب الشباب
    ربنا يهديكم ياشباب الأمه العربيه بقى

    بس أحلى شي أسلوبك الساخر موتني من الضحك
    :))))
    تحياتي
    ^_^

    ردحذف
  4. غادة محسن :
    منوراني دايما
    ومنورة البوست والمدونة
    تحياتي لكِ وشكرا على التعليق الرائع
    وايتها خدمة اديني عرفتك معنى يتنكت

    ردحذف

خد راحتك في الجنان معنا حرية الرأي مكفولة للجميع حتي لو هتجنن علينا
نظرا لوجود مشاكل في نظام التعليقات لغير معرفين برجاء عدم التعليق بغير معرف منعا لاختفاء التعليقات