الثلاثاء، يناير 05، 2010

اديني فرصة وارميني فى الشغل ...

المثل القديم يقول لك اديني عمر وارميني فى البحر ولكن هذا مثلا قديما ، المثل الجديد يقول :

تديني فرصة وارميني فى الشغل !!

اديني فرصة وارميني فى الشغل مقال ساخر عن أنواع الفرص التي من الممكن أن توفرها لك الحكومة ..

اديني فرصة وارميني فى الشغل نظرة فى فرص العمل التي نراها ومطلوب منا أن نعمل بها بحكم كوننا جيل المتخرجين ..

اديني فرصة وارميني فى الشغل الكلام زي ما بيقولوا بالعامية ، أو بالبلدي أصل العربية دخلت الورشة محتاجة شوية تصليح عشان تبقى قد المسئولية ، والفصحي وقت فسحة يعني جري ولعب وتنطيط !!!

اول شغلانة معانا طبعا لا توفرها الحكومة لا دي شغلانة كدا زي ما بنقول عقبال ما ربنا يفرجها ، وهي أول ما تتخرج كدا زي الباشا بعد ما تدفع دم قلب أهلك فى الدراسة كفلوس وتبقى حياتك زي الزفت من ساعات المذاكرة الكتير تبص تلاقي نفسك قاعد مشرف على القهوة واخد مكان جنب كل الزمايل السابقين وشافوا الحياة وردي ادامهم وقالوا احنا الجيل الجديد ، وبعد ما السيد الوالد ابوك يعني يطلع عينك وهو بيبص لك ويقولك انت بقيت مسئول عن نفسك خليك راجل بقى واتحمل المسئولية هصرف عليك يعني لغاية ما تموت ، وطبعا لان انت شاب عندك دم " ممكن ما يكون عندك دم ، فى جيل كامل كدا " تقوم واقف وداخل على شغلانة من الشغلانات دي ..

اديني فرصة وارميني فى الشغل :

ربنا يكرمك كدا زي الباشا وتبقى سواق توك توك اد الدنيا وتنزل تشتغل سواق توك توك بين الطالبية والعمرانية والخط اللذيذ دا وتعمل لك فى اليوم 10 أو 15 جنيه وطبعا مطلوب منك تأكل نفسك وأهلك لو لزم الأمر بالمبلغ دا وانت حاطط حاجة فى بقك وساكت وتقول يا رب يعني لو كانوا شغلوني بشهادتي مش كنت عملت حاجة دلوقتي وطبعا من قرف التوك توك وزهقك ويا سلام تضحك بسخرية لو وصلت طالب لغاية الجامعة وهو بيتكلم عن الأحلام الوردية ، وتسمع شوية أغاني ما كنت بتطيق تسمعها وانت طالب لسعد الصغير واتباعه ، وتقول يا عم الكبير اديني فرصة وارميني فى الشغل !!!!

اديني فرصة وارميني فى الشغل :

ربنا يكرمك كدا زي البيه الفلاني وتكون ... لا مش وكيل نيابة ولا حاجة من الحاجات الجميلة دي لكن تبقى برنس واللقب دا إن شاء الله لما ربنا يسهلك وتبقى بياع سريح زي الفل وتدور على الجنيه وتعرض البضاعة والبناطيل على الزبون وغير كدا كتير وتبدأ تبقى انسان رخم ورزل وغتيت ودمك بارد وانت بتطلب فلوس لزوم الشاي بتاعك يعني اتنين تلاتة جنيه كدا فوق تمن البنطلون أو التي شيرت ، ووقتها تبص لأي ولد بيشتري منك إنه شاب تيت ما بيعرفش قيمة الفلوس اللي عمال يصرفها ، ووقتها تقول يا عم الكبير اديني فرصة وارميني فى الشغل !!!!

اديني فرصة وارميني فى الشغل :

لما تبقى راجل صاحب بضاعة يعني شوية أمشاط على فرش شعر على شوية كريمات ، وتبقى واقف ملمع كدا وتقول بجنيه ونص وتعالى بص وقربي يا مدام شبشب حمام والحاجات الظريفة دي ، وشغلك يبقى زي الفل مع بتوع البلدية وتجري ببضاعتك من الشمال لليمين دا كله هروبا من البلدية وعلشان خاطر شوية جنيهات آخر كل يوم ووقتها تقف وتقول يا عم الكبير اديني فرصة وارميني فى الشغل !!!

اديني فرصة وارميني فى الشغل :

لما ربنا يكرمك وتبقى جبت أخرك وبقيت من أصحاب الأملاك ويكون عندك عربية كبدة أو سجق أو سندوتشات جبنة فى أي موقف من المواقف العامة " احمد حلمي ، ميدان الجيزة ، النزهة الجديدة " وتبقى عندك الكبدة بتاعتك مدبوحة فين الله أعلم مش مهم ما تقلقش من كدا معدة الشعب المصري بتضرب ولا بيهمها ، ويبدأ شغل التغتيت عليك من بتوع الصحة والبلدية وقرفهم والرخصة دا غير غتاتة بتوع الموقف ولازم تدفع الأرضية ولو مش عارف الأرضية دي المكان اللي بتقف فيه يا برنس عشان تعرف تبيع ولا انت فاكر كدا كل حاجة زي ما بيقولوا سبهللة " لغاية دلوقتي محدش عارف معنى الكلمة دي " ، ووقتها تقول يا عم الكبير اديني فرصة وارميني فى الشغل !!!

اديني فرصة وارميني فى الشغل :

الشغلانة دي بقى تحرق دمك وتجيب لك السكر والضغط مش من التعب لا سمح الله لكن من اللي ممكن تشوفه ، لما تبقى كدا ربنا حارسك وصاينك زي ما بيقولوا كدا جارسون أد الدنيا فى كوفي شوب نضيف ومحترم " وسط البلد ، جنينة مول ، سيتي ستارز ، شارع شهاب ، جامعة الدول ، كارفور " أي مكان من المبالغ الوهمية وتحس إن شوية الشباب اللي تقول عليهم تيت وانت بالفم المليان قاعدين عمالين يدفعوا فلوس فى حاجات تافهة من وجهة نظرك وتقول الناس دي مش حاسة بحاجة ما بابا جاب وماما ادت وانا ابن .... عمال اشتغل ، وتبدأ فى النق والحسد والحقد الطبقي زي ما بيقولوا وتقول ليه هم مش انا وتعترض بقى على حكمة ربنا وترجع تستغفر ربنا وتقول يا عم الكبير اديني فرصة وارميني فى الشغل !!!

اديني فرصة وارميني فى الشغل :

تبقى فنان كبير وربنا يكرمك بشغلانة وتبقى عامل فى شركة قطاع خاص ، وتتحسر على ايام الدراسة والتعب وترجع البيت بعد فترة شغل 10 ساعات كدا ولا حاجة مش شايف ادامك وتقول انا بفهم احسن من الواد بتاع الحسابات لكن اهي حظوظ وواسطة وكوسة ومصالح ، وتقول يا عم الكبير اديني فرصة وارميني فى الشغل !!!

وهكذا من كل وظيفة شكل ولون وفى النهاية تقول نفس الجملة يا عم الكبير :

" اديني فرصة وارميني فى الشغل "

وانت مش محتاج اي شغل انت محتاج شغلانة كدا تدخلك شوية فلوس كويسين بدل ما تشحت طول الشهر ، محتاج شغلانة تبقى كويسة عشان تفتح بيت وتقعد فيه ولكن دا صعب شوية عشان خاطر العم الكبير مش هيديلك الفرصة دي يا جميل ، مهما عملت ، لحالة واحدة فيه فلان بيه ، وعلان باشا دخلوا أولادهم وقرايبهم مكانك يبقى انت ولا هم ، يا جدع اختشي على دمك يا بعيد ، اكيد هم انت تطلع مين انت ابن مين انت ، واحد عادي من الشعب لكن هم ولاد البشوات والبهوات ..

وفى الأخر برضو هتقعد وتقول اديني فرصة وارميني فى الشغل ..



I.M.S.A

M.S.M.O


هناك 6 تعليقات:

  1. طب حتى ياريت الواحد يلاقى شغلانة من دول ، لو بياع سريح قد الدنيا الازالة والبلدية وبتاع مش هيسيبوه فى حاله ، ولو عربية كبدة يبقى اتقفلت قبل ما تفتح بأمر من وزير الصحة شخصيا ، اما لو تكتك يبقى ان شاء الله تحرى واشتباه كل يوم
    امممم، طب مفيش وظيفة سواق قطر بقى عشان يخلص نهائى ؟
    شكرا على الموضوع :)

    ردحذف
  2. وهيا الشغلانات دي عادت بتأكل عيش يا عم
    التكتك بيتمسك لو مش مترخص وترخيصه بالشيئ الفلاني ولو اتمسك أقل حاجة 500 جنيه وساعات بتوصل لـ1500 جنيه يعني باللي انتا اشتغلت بيه طوال كام شهر
    عربيات الكبدة اخرتها الحبس بإذن الله بسبب الصحة والتراخيص غير البلطجية اللي هتتعامل معاهم بصفة يومية
    يعني لو ربنا كرمنا ممكن نلاقي سيبر او سنترال نشتغل فيه بملاليم ممكن نكون نفسنا بيها بعد 300 سنة او يزيد
    ياعم روق الطاسة مش مستاهلة

    ردحذف
  3. غير معروف شكرا على المرور
    والمشاركة الجيدة
    تسلم لكن بالنسبة لسواق قطار اعتقد
    العياط هتقوم بالواجب

    ردحذف
  4. تسلم يا وورلد إند على المرور
    سيبر أو سنترال
    فكرتني تقريبا ضرائب الملاهي لن تتركك فى حالك
    شكرا على المرور

    ردحذف
  5. دة موضوع الموسم و كل موسم من ساعة ما طلعنا على وش الدنيا
    طبعا احنا مش هنلوم على اللي بيشتغل الشغلانات دي بعد ما يتخرجمش أحسن ما يقعد زي خيبتها في البيت و أهله يصرفوا عليه ؟بس مصيبة المصائب إنهم مش بيسيبوه في حاله الله يخرب بيوتهم
    كا مرة أكون ماشية في الشارع ألاقي بتوع البلدية ربنا ينتقم منهم يكسروا لراجل غلبان عربية كبدة ولا لست و بنتها تلاجة حاجة ساقعة ولا ياخدوا شوية خضار بيسترزقوا منهم و تبقى الناس مقهورة و بتعيط سواء أصحاب الحاجة أو ناس واقفة تتفرج و دول بدم بارد قاعدين يضحكوا
    و الله حاجة تحرق الدم ربنا ينتقم منهم
    شكرا إسلام على موضوعاتك الجميلة اللي بتناقش مصايبنا في مصر

    ردحذف
  6. أهلا بكِ آية يسري
    مرورك وردك أكثر من رائع
    اتساءل إن كانوا هم بدلا من هؤلاء الذين يكسروا
    عربياتهم أو يسرقوا قوت يومهم كيف سيكون شعورهم
    مرورك منور
    ومرحبا بكِ فى مدونة المجانين

    ردحذف

خد راحتك في الجنان معنا حرية الرأي مكفولة للجميع حتي لو هتجنن علينا
نظرا لوجود مشاكل في نظام التعليقات لغير معرفين برجاء عدم التعليق بغير معرف منعا لاختفاء التعليقات